Кратко, јасно и во препознатлив стил. Виктор Орбан немаше конкретен одговор на прашањето на унгарски новинар, зошто Груевски имал привилегиран статус во однос за на останатите баратели на азил во земјата.

-Г-не Орбан, како може поранешниот македонски премиер илегално да влезе во Унгарија и зошто не е во транзитната зона?

-Тоа е правно прашање, ве молиме контактирајте правници. , изјави Орбан

Многу појасен од Орбан, беше неговиот шеф на кабинет, кој на прес конференција откри дека Груевски барањето за азил го најавил уште пред да стапне на унгарска територија. Гергели Гулијаш посочува дека екс премиерот намерата за азил ја искажал од унгарска амбасада, но надвор од Македонија, пред да дојде во Будимпешта и формално да го поднесе барањето. Тој одби да прецизира дали се работи за унгарската амбасада во Србија, како шо гласеше прашањето на новинарите.

-Поранешниот македонски премиер даде долго интервју во Будмпешта. Како што знаете, од безбедносни причини, тој го поднесе барањето во Службата за имиграција и азил во Будимпешта, наместо во транзитниот центар. Не знаеме дали во Унгарија дошол по копнен или воздушен пат и воедно ги отфрламе информациите дека на каков било начин сме му помогнале. До овој момент, не сме добиле барање за екстрадиција од Македонија, вели Гергели Гулијаш, шеф на кабинетот на унгарскиот премиер Орбан

Македонското министерство за правда денеска информираше дека барањето за екстрадиција е подготвено и оти се чека целата документација да биде преведена на унгарски јазик во Кривичниот суд.

За правната процедура телефонски разговарале и министрите за надворешни работи Димитров и Сијарто. Шефот на унгарската дипломатија оценил дека барањето политички азил е правно, а не политичко прашање. Димитров пак, укажал на парадоксалноста да се бара политички азил во земја членка на Европската Унија од личност, во чие владеење, земјата била окарактериризирана како заробена држава токму од самата Унија.