Фенербахче по продолжение ја совлада Барселона

Кошаркарите на Фенербахче по дополнителните пет минути ја победија Барселона синоќа на домашен терен во натпревар од 30-то последно коло од Евролигата.

Воедно со тоа ја прекинаа серијата од три порази. Богдан Богдановиќ со 15 и Никола Калиниќ со 13 поени беа најефикасни кај победникот, додека Тајрис Рајс беше најефикасен на дуелот со 19 поени.

Резултати на синоќа одиграните дуели од оваа рунда: Фенербахче – Барселона 68:65, Бамберг – Галатасарај 79:84, Макаби – Панатинаикос 61:81 и Басконија – Жалгирис 79:84.

Вечерва се играат последните четири натпревари од лигашкиот дел: Дарушафака – Црвена Звезда, ЦСКА Москва – Олимпијакос, Армани Милано – Уникс и Реал Мадрид – Анадолу Ефес.

Победникот од натпреварот Дарушафака – Црвена Звезда ќе биде последниот осми учесник во плеј офот. Седумте првопласирани екипи се веќе познати : Реал Мадрид, ЦСКА Москва, Олимпијакос, Панатинаикос, Фенербахче, Анадолу Ефес и Басконија.

Табела: Реал Мадрид 22-7 (победи-порази), ЦСКА Москва 21-8, Олимпијакос 19-10, Панатинаикос 19-11, Фенербахче 18-12, Анадолу Ефес 17-12, Басконија 17-13, Црвена Звезда 16-13, Дарушафака 15-14, Жалгирис 14-16, Барселона 12-18, Галатасарај 11-19, Бамберг 10-20, Макаби 10-20, Армани Милано 8-21 и Уникс 7-22. 

Вардар поразен и од ПСЖ

Ракометарите на Вардар го загубија мечот за третото место на Ф4 турнирот во Келн против ПСЖ со 29-28 (14-15).

„Црвено-црните“ беа подобриот тим и имаа водство во поголем дел од дуелот, одиграа подобро од вчера против Монпелје, но сепак потклекнаа на крајот и го завршија турнирот со два порази за два дена.

Лука Циндриќ беше најефикасен кај Вардар со седум гола, Македа постигна шест, а Страхиња Милиќ имаше девет интервенции.

Прв стрелец на мечот беше Недим Ремили од ПСЖ со девет гола.

Новиот европски шампион ќе биде познат по финалето меѓу Нант - Монпелје, кое е со почеток од 18 часот. /МИА

Емери за ПСЖ: Таму шефот е еден - Нејмар

Новоназначениот менаџер на Арсенал, Унаи Емери направи многу интересно откритие за својот поранешен клуб, Пари Сен Жермен и најмногу за супер ѕвездата на тимот - Нејмар.

Неколкупати во сезоната, Бразилецот создаваше проблеми во соблекувалната, а и Емери призна дека тоа било вистина. 

- Знам кога сум главна и одговорна личност и кога не сум. Ова е процес кој тренерот треба да го доживее и кој го асимилира со време и искуство. Во секој клуб треба да знаеш каква е твојата улога и каква е кон останатите. Јас сум на мислење дека лидер на ПСЖ е Нејмар, изјави Емери за „Франс Фудбал“.

Според шпанскиот стратег, Нејмар ја напуштил Барселона за Париз само за да биде во улогата на лидер - нешто, што на „Камп Ноу“ не било можно покрај Лео Меси.

- Нејмар дојде во ПСЖ да биде лидер, да помине преку овој процес и еден ден да биде најдобриот во светот. Во Манчестер Сити на чело е Пеп (Гвардиола). Во ПСЖ, тоа е во Нејмар, вели Емери.

Тој призна дека не се чувствувал удобно од огромното влијание на поранешниот играч на Барселона.

- Пред неколку месеци, играч на ПСЖ ми пријде и ми рече: „Oваа година си променет“. Беше очигледно. Не можам да сум истиот тренер со и без Нејмар. Минавме низ период на адаптација со играчот. Требаше да се запознаеме едни со други. Да ги тренираш Меси, Роналдо или Нејмар, не е лесно. Тие се најдобри во светот, па затоа мора да се прилагодите на нив. Видете го Гвардиола во Сити. Тој е среќен затоа што нема толку голема фигура против себе, изјави новиот тренер на „топџиите“. /МИА

Јувентус се насочува кон Марсијал по откажувањето на Мората

Јувентус ќе се насочи кон Антони Марсијал откако не успеа да постигне договор со напаѓачот на Челзи, Алваро Мората. 

Претставниците на италијанскиот шампион се сретнале со фудбалерот на тимот од Лондон и неговиот агент, но не постигнале договор.

Финансиските барања на шпанскиот напаѓач се причината за раководството на „бјанконерите“ да погледне кон Манчестер Јунајтед и францускиот напаѓач.

Торинското издание „Тутоспорт“ вели дека од Јувентус ќе се обидат да го убедат францускиот репрезентативец да премине на „Алијанц“ стадионот. 

Марсијал во моментов добива 3,5 милиони евра по сезона, но неговиот договор истекува летото 2019 година. /МИА

притисни ентер