МИА и ИТАР-ТАСС потпишаа договор за соработка

Директорите на МИА и на ИТАР-ТАСС, Љупчо Јакимоски и Сергеј Михајлов, денеска во Сочи потпишаа договор за соработка меѓу националните новински агенции на Македонија и на Русија.

Договорот, потпишан во рамките на шестото Генералното собрание на Црноморската асоцијација на новински агенции - БСАННА, предвидува размена на вести и други прес материјали, пренесување искуства, како и обука на новинари.

Преку соработката со ИТАР-ТАСС, МИА ќе им овозможи на своите корисници директен линк до случувањата во Русија, но и подобро информирање на руската јавност за настаните во Македонија.

Руската ИТАР-ТАСС е една од најголемите агенции во светот со историја долга 110 години, со развиена дописничка мрежа и целосна глобална покриеност.

ИТАР-ТАСС денеска во Сочи, градот домаќин на Зимските олимписки игри во 2014 година, го презеде и претседавањето со Црноморската асоцијација на национални новински агенции - БСАННА, чиј полноправен член е и МИА.

На шестото Генерално собрание на БСАННА во Сочи, меѓу другото, е договорена поинтензивна соработка меѓу агенциите членки, а е иницирано и воспоставување новинарски награди, фото конкурси, меѓусебна техничка поддршка и размена на искуства. Следен домаќин на Генералното собрание на БСАННА, што се одржува еднаш годишно, ќе биде ерменската национална новинска агенција Арменпрес.

БСАННА е формирана во 2006 година и ги обединува националните новински агенции од регионот на Црното Море и ЈИЕ. Целта на оваа еснафска асоцијација е промоција на пријателство и добрососедски односи, зацврстување на соработката меѓу агенциите во регионот. Членки на БСАННА, покрај МИА и ИТАР-ТАСС, се и турската Анадолија, бугарската БТА, грчката АНА-МПА, романската АГЕРПРЕС, албанската АТА, молдавската Молдпрес, српската Танјуг, хрватската ХИНА, азербејџанската АЗЕРТАЏ, грузиската ГХН, ерменската Арменпрес и украинската новинска агенција УКРИНФОРМ.
притисни ентер