Тоа е дел од планот во три фази за испорака на муниција, изјави Фројдинг, кој е шеф на специјалниот штаб на Бундесверот за Украина од почетокот на руската агресија, објави ДВ.
Според него, потребите на Украина за артилериска муниција ќе се задоволат во три фази. По првата, итна фаза, на среден рок ќе биде поддржана чешката иницијатива за набавка на муниција.
„Ќе преземеме над 180.000 парчиња муниција, кои се планирани да бидат испорачани во Украина од почетокот на летото до крајот на годината“, рече генералот.
Покрај чешката иницијатива, Германија склучи и билатерален договор со кој се предвидува испорака на уште 100.000 артилериски гранати од четвртиот квартал оваа година. Кристијан Фројдинг не сакал детално да објасни со која земја е склучен договорот за испорака.
Чешката Република организира купување до 800.000 парчиња артилериска муниција за Украина. Иницијативата започна на крајот на февруари. Оттогаш, 20 земји од ЕУ и НАТО се приклучија на кампањата, меѓу кои Германија, Франција, Данска, Холандија и Канада.
Според Фројдинг, моменталната најитна потреба на Украина е „артилерија и друга муниција и наведувани проектили за модерни системи за воздушна одбрана и оклопни борбени возила“.
Фројдинг зборувал и за обуката на украинските војници во Германија. Минатата година, 10.000 припадници на вооружените сили на Украина беа обучени на германските воени полигони, а уште 3.000 до 4.000 луѓе ќе бидат обучени во првите месеци од 2024 година.
Германското Министерство за одбрана ќе биде подготвено да понуди таква можност на уште повеќе војници од Украина во 2024 година.
„Фокусот секогаш е на обуката за вооружените системи што им ги обезбедуваме на украинските вооружени сили и тактичката обука, обуката на операторите, како и обуката на техничари за нивно одржување и поправка“, рече Фројдинг.
Колегите во Германија се изненадени од способноста на украинските војници, како и од брзината со која тие „се навикнуваат на целосно нови системи за оружје“..