На првите неколку тренинзи репрезентацијата работеше во некомплетен состав, а бројката е зголемена откако се приклучија поискусните, кои имаа и клупски обврски: Кирил Лазаров, Стојанче Стоилов, Никола Маркоски, Влатко Митков. За денеска е најавено доаѓање и на Велко Маркоски, а последни ќе дојдат Филип Миркуловски и Дејан Манасков, кои со своите екипи во Бундес лигата имаат натпревари од редовното коло на 26.декември (понеделник).

Селекторот Лино Червар деновиве има можност со играчите да работи на новитетите кои ги планира во играта на нашата репрезентација. Во Маврово ќе се тренира до 30.декември, а потоа ќе следуваат два слободни дена. Подготовките ќе продолжат во Скопје во СРЦ „Кале“, а на 3 јануари Македонија ќе одигра контролен дуел со Босна и Херцеговина. Со истиот ривал ќе бидат одиграни уште два натпревара, но од затворен тип.

Заедно со сениорската репрезентација на Македонија во Маврово е и јуниорската селекција, која се подготува за натпреварите од квалификациската група за Светското првенство во Алжир 2017 година. Групата ќе се игра во Скопје, а ривали на Македонија се селекциите на: Полска, Португалија и на Турција. Натпреварите ќе се играат од 4 до 6.јануари 2017 година во СРЦ „Кале“ во Скопје. /МИА

Датум на објава: петок, 23 декември 2016 во 12:46
www.kanal5.com.mk

коментари

остави коментар