Македонија

Џафери: Спроведовме европски избори и придонесовме во европското поведение на земјата

Техничката влада го положи тестот, смета Талат Џафери кој на прес конференција се осврна на работата на владата во изминатите 100 дена. 

Очекува, како што рече, европскиот пат да го продолжи новата извршна власт, но немаше конкретен одговор на прашањето дали е подготвен да замине во опозиција по изјавите на лидерот на ВМРО-ДПМНЕ, Христијан Мицкоски, дека нема да преговара за коалиција со интегративците.

-Јас сум премиер и размислувам за мандатот што треба да го завршам. Тоа се прашања на органите на партијата и во тој контекст да завршат преговорите, другото е прашање на исходот од преговорите за состав на нова влада,- изјави – Талат Џафери – Технички премиер.

Откако вчера Државната изборна комисија ги објави првичните официјални изборни резултати почнаа да течат роковите за приговори за Претседателските и Парламентарните избори, кои завршуваат вечерва. Досега не добиле ниту еден приговор, и ако остане така во рок од 24 часа Комисијата ќе ги објави конечните резултати од изборите. До Собранието треба да го достави извештајот за резултатите од Претседателските избори, по што според најавите собранискиот спикер Јован Митрески ќе ја закаже за в недела напладне собраниската седница за инаугурација на новоизбраната претседателка на државата Гордана Силјановска Давкова.

Согласно новиот собраниски Деловник, новоизбраниот парламентарен состав треба да ја одржи конститутивната седница најдоцна до 28 мај, односно најдоцна 20 дена по одржаните избори. Конститутивната седница ќе трае најмногу три дена, а треба да ја свика сегашниот претседател на Собранието, Јован Митрески. Најдоцна десет дена по конститутивната собраниска седница треба да биде доделен мандатот за формирање Влада на партијата или партиите со најголем број пратенички мандати на изборите – во случајот ВМРО-ДПМНЕ и коалицијата. Мандатот на Мицкоски ќе му го додели претседателката Силјановска Давкова. Мандаторот, пак, во рок од 20 дена од денот на доверувањето на мандатот, на Собранието му поднесува програма и го предлага составот на новата Владата, која се гласа со мнозинство гласови во Собранието – односни 61 пратеник. Согласно роковите, Македонија би требало да ја добие новата Влада најдоцна до 27 јуни, а во меѓувреме продолжува мандатот на техничката Влада.

Свет

Шоу во тајванскиот парламент- пратеник го украде законот, сите го бркаат, снимката е хит(ВИДЕО)

Тајвански пратеник стана хит на социјалните мрежи откако се обиде да го спречи усвојувањето на закон на бизарен начин: го грабна законот и истрча од Претставничкиот дом.

Инцидентот се случил денеска, непосредно пред новоизбраниот претседател Лаи Чинг-те да ја преземе функцијата, пренесе Јутарњи лист.

Утринската седница веќе била напната, пратениците викаа и се туркаа, уште пред да се донесе законот. Ситуацијата ескалирала кога пратеникот, кој го добил прекарот „Бил бандит“ го грабнал законот и истрчал кон излезот, додека останатите го бркале.

Видеото споделено на социјалната мрежа Х, собра повеќе од девет милиони прегледи, а во коментарите има и шеги на сметка на пратеникот.

„Тој ги зеде работите во свои раце! Вакви ситуации гледаме само во филмовите“, напишал еден во коментар, додека други шпекулираат дека Тајван ги произведува повеќето компјутерски чипови во светот, но судејќи според видеото, можеби немаат фотокопири.

Здравје

Европска пчеларска асоцијација: На пазарот од 46 до 88% од медот е фалсификат

Европскиот пазар е преплавен со лажен мед, а во зависност од државите, тие сочинуваат од 46 до дури 88 отсто од продадениот мед.

Ова алармантно предупредување го издаде Европската пчеларска асоцијација по повод Светскиот ден на пчелите, 20 мај, во која се наведува дека се одбележува во „најтешкото време за пчеларството овој век“.

- Пазарот на мед е преплавен со фалсификати од 46% до 88%, во зависност од која држава во Европа доаѓа. Потрошувачите имаат сѐ помалку можност да добијат вистински мед, а пчеларите имаат сѐ помалку можност да ги пласираат добиените пчелни производи поради ваквата нелојална конкуренција. Во некои региони пчеларите веќе масовно го напуштаат пчеларството поради неподносливата финансиска состојба. Се плашиме дека тоа нема да стане генерален тренд доколку итно не се промени моменталната состојба. Откажувањето на пчеларите од пчеларството доведува до непроценливи штети на приносите во земјоделството. Затоа што нема пчели без пчелари. Поради климатските промени пчелите не можат сами да преживеат – пишува во соопштението објавено на сајтот на Европската пчеларска асоцијација.

Од ова здружение предупредуваат дека мора итно да се работи на отстранување на фалсификуваниот мед од пазарот.

- На потрошувачите на мед мора да им се обезбеди вистински пчелен мед со сите придобивки што ги носи за виталноста и здравјето на луѓето. Фалсификатите се само шеќер и ништо друго, дури можат да содржат и материи штетни за здравјето - нагласуваат во Европската пчеларска асоцијација.

Посочуваат и дека потрошувачите имаат највисока гаранција за квалитет кога медот го купуваат директно од пчеларите од нивниот крај, а доколку го купат во продавница треба да внимаваат на земјата на потекло.

На сајтот на Европската пчеларска асоцијација пишува дека лажниот мед може да содржи неколку штетни материи опасни по здравјето на луѓето.

- Фалсификуваниот мед може да содржи дури и натриум хидроксид (каустична сода), вештачки ензими (кои се додаваат и во таканаречениот вегански „мед“ кој всушност не постои, бидејќи нема мед без пчели), вештачки вкусови, вештачки бои и ниско квалитетни шеќери, кои се додаваат при фалсификување и можат да претставуваат ризик за здравјето на луѓето. Во ваквиот лажен мед нема ни најмала биолошка вредност што пчелниот мед му ја дава на човечкото тело – пишува на веб-страницата на Европската пчеларска асоцијација.

Свет

Авион со запален мотор принудно слета во Индија- 179 патници и екипажот во шок (ВИДЕО)

Авион на „Ер Индија“ со 179 патници и членови на екипажот принудно слетал откако избувнал пожар во еден од моторите на авионот.

Како што објави „Дејлимејл“, се работи за лет од Бангалор до Кочи, а инцидентот се случил минатиот викенд.

Набрзо по полетувањето избувнал пожар на еден од моторите на авионот. Чудо е што никој не е повреден при овој инцидент. За проблемот била известена контролата на летање, била издадена тревога и пожарот бил изгаснат 20-тина минути по неговото избувнување.

На социјалните мрежи е објавен клип снимен од еден од патниците во авионот, кој седел на десната страна. Во позадина се слушаат гласовите на преплашените патници.

„Ве молам, останете на вашите места. Сè е под контрола“, се слуша преку системот за јавно обраќање откако некои од преплашените патници се обиделе да го напуштат запалениот авион.

Набрзо бил активиран и воден топ, кој брзо го изгаснал пожарот.

"Сите бевме исплашени. Плачевме. Персоналот беше професионален, ни помогна и бевме безбедни за една минута. Многу сме им благодарни", рекол еден неименуван патник.

Во соопштението на „Ер Индија“ се наведува дека пожарот го зафатил десниот мотор на авионот, поради што е извршено итно слетување, при што соодветните служби за итни случаи го изгаснале пожарот и ги евакуирале патниците:

„Жалиме за предизвиканите непријатности и работиме на алтернативни аранжмани за нашите клиенти што поскоро да стигнат до својата дестинација“, се вели во соопштението.

притисни ентер