„Нема поделба, нема раскол меѓу Европејците и ние мора да го зачуваме тоа. Ова е нашата мисија број еден оваа година“, рече тој во обраќањето преку видео врска на конференцијата во Литванија.
„Европа си помага себеси. Не и помага на Украина да се спротивстави на Русија, ова и помага на Европа да се спротивстави на руската агресија“, додаде тој.
Голем дел од Украина остана без греење и струја по најразорните воздушни напади на Русија врз нејзината електрична мрежа, а жителите на Киев беа предупредени да се подготват за понатамошни напади и да набават вода, храна и топла облека.
Владите на Европската унија во четвртокот беа поделени околу тоа на кое ниво да ги ограничат цените на руската нафта за да ја ограничат способноста на Москва да ја финансира војната, при што Зеленски ги повика лидерите на ЕУ да се договорат за предлог од 30 долари.
„Намалувањето на цената е многу важно. Слушаме за (предлози да се постави горната граница за барел на) 60 или 70 долари. Таквите зборови повеќе звучат како отстапка (кон Русија)“, предупреди Зеленски.
„Но, јас сум многу благодарен на нашите балтички и полски колеги за нивните предлози, сосема разумни, да се ограничи цената на 30 долари за барел. Тоа е многу подобра идеја“, додаде украинскиот претседател. Членките на ЕУ во средата не успеаја да постигнат договор за ограничување на цената на руската нафта, бидејќи земјите беа поделени по предлогот на групата Г7 - граница од 65 до 70 долари за барел.
Полска сака плафонот да биде 30 долари, тврдејќи дека со трошоците за руско производство проценети на 20 долари за барел, предлогот на Г7 би овозможил преголем профит за Москва. Литванија и Естонија ја поддржуваат Полска.