Амбасадорот на Израел во ОН, Гилад Ердан, категорично ги отфрли повиците за прекин на огнот. Тој пред Советот за безбедност на ОН рече дека „прекинот на огнот само ја зајакнува контролата на Хамас врз Газа“ и испраќа порака дека „на Хамас му е простено за неговите намерни злосторства“.

Тој исто така рече дека „угнетувањето на населението во Газа од страна на Хамас“ добило „зелено светло на меѓународната заедница“. Ердан додаде дека „без воен притисок врз Хамас, ниту една дипломатија не може да гарантира ослободување на заложниците“.

Американскиот претставник Роберт Вуд на седницата рече дека САД не поддржуваат итен прекин на огнот.

-Иако САД силно поддржуваат траен мир, во кој и Израелците и Палестинците можат да живеат во мир и безбедност, ние не ги поддржуваме повиците за итен прекин на огнот. Тоа само ќе го посее семето на следната војна бидејќи Хамас не сака траен мир, рече Вуд пред Советот за безбедност на ОН.

САД се една од постојаните членки што имаат право на вето на резолуцијата. Советот за безбедност на ОН подоцна денеска ќе гласа за резолуцијата претставена од Обединетите Арапски Емирати, која повикува на „итен хуманитарен прекин на огнот во Газа“. /МИА

Израелскиот премиер Бенјамин Нетанјаху денеска ја критикуваше палестинската управа откако палестинскиот премиер Мухамед Штаје во изјава за Блумберг изрази надеж дека Хамас ќе биде партнер во управувањето со Газа по војната меѓу Израел и организацијата, пренесе Бета.

-Нема да има Хамас, ние ќе го елиминираме. Фактот дека тоа е предлог на палестинската управа само ја зајакнува мојата политика: палестинската управа не е решението, рече Нетанјаху, пренесоа израелските медиуми.

Како што пренесе Агенцијата, Рамала соработува со администрацијата на американскиот претседател Џозеф Бајден за планот за управување со Појасот Газа по завршувањето на војната, иако премиерот Штаје изрази надеж дека Хамас ќе биде партнер во тој процес.

Американски официјални претставници неодамна се сретнале со палестинскиот премиер за да разговараат за планот за повоена Газа.

-Нема да одиме таму според израелскиот воен план. Нашиот народ е таму. Треба да составиме механизам, нешто на што работиме со меѓународната заедница, рече палестинскиот премиер.

Нетанјаху во неколку наврати ја отфрли идејата палестинската управа да ја води Газа по војната, обвинувајќи ја дека го поддржува тероризмот преку образование, им плаќа на терористите и не ги осудува нападите на Хамас на 7 октомври врз јужен Израел што ја започна војната. /МИА

Безбедноста на спортските натпревари, новиот закон за спорт, работа со младите категории, како и странските искуства беа меѓу темите на кои разговараа спортските новинари од Југоисточна Европа (ЈИЕ) на годишниот Самит одржан денеска во македонското Собрание.

На собирот во Скопје присуствуваа и звучни имиња на македонскиот и балканскиот спорт кои беа наградени со признанија за својот придонес и постигнати резултати.

Министерот за внатрешни работи Оливер Спасовски на македонската легенда во маратонско пливање, 84-годишниот Дики Бојаџи свечено му додели награда за заслуги во спортот. Од своја страна, претседателот на Македонскиот олимписки комитет (МОК), Даниел Димевски на првиот човек на Олимпискиот комитет на Србија (ОКС) и легендарен кошаркарски тренер Божидар Маљковиќ му го додели високото признание на МОК, „Златна Олимпија“ за личниот придонес во развојот на олимпизмот и спортот.

„МОК и ОКС имаат долгогодишна блиска соработка, која е интензивирана во пресрет на Олимписките игри 2024 во Париз“, соопшти МОК.