Заев: Пред Берлинскиот процес очекувам средба со Борисов, со кој ќе разговараме за Гоце Делчев

 Премиерот Зоран Заев денеска најави дека првата официјална посета како премиер новата Влада очекува да биде на Бугарија, каде што со премиерот Бојко Борисов ќе разговараат за Гоце Делчев.

Заев очекува дека посетата ќе се одржи пред закажаното одржување на Берлинскиот процес на 10 ноември, со кој заеднички претседаваат Македонија и Бугарија.

-Очекуваме во периодот, не подоцна, од 10 ноември да направиме една средба. Секако јас сакам да ја посетам Република Бугарија и да биде мојата прва официјална посета како претседател на Владата заради тоа што навистина имаме и прашања за разговори, а тоа е токму прашањето за ова следно историско поглавје, а тоа Гоце Делчев како историска личност и овој период од историјата. На 10 – 11 ноември се очекува да се одржи Берлинскиот процес каде што сме домаќини ние и Бугарија заедно, што ќе се одржи во Софија. Очекуваме овие денови да добиеме и повратна информација од Бугарија за да можеме да седнеме да поразговараме на подготовката за Берлинскиот процес, секако и за ова отворено прашање, рече Заев.

Вели дека е добро што заедничката Комисија за историски и образовни прашања работи за изнаоѓање заедничко решение, изразувајќи уверување дека ќе испорачаат опции на иницијативи на решение на проблемот.

-Генерално нашето очекување е час поскоро да седнеме да изнајдеме решенија на ова прашање, да го подготвиме и бидеме навистина одлични во организацијата на Берлинскиот процес. Кажувам одлични во констелација и на Ковид-19 кризата што опстојува, но секако и очекувајќи до крајот на годината да се одржи првата меѓувладина конференција, вели Заев.

На новинарско прашање што лично мисли, дали Гоце Делчев е Македонец или Бугарин, Заев рече дека Гоце Делчев е македонски револуционер, но исто така е факт дека Бугарија и Бугарите го сметаат исто така за бугарски револуционер.

-Гоце Делчев е македонски револуционер, но исто така е факт дека Бугарија и Бугарите го сметаат исто така за бугарски револуционер. Факт е дека имаме наш град што се вика Делчево, во Бугарија има град Гоце Делчев, имаме споменици во Македонија и во Бугарија. Заедно со премиерот Борисов се поклонивме во Благоевград на споменикот на Гоце Делчев но и заедно се поклонивме и на гробот на Гоце Делчев овде во Скопје, и реалноста и фактите се тие, рече Заев на заедничката прес-конференција со новиот ЕУ амбасадор Дејвид Гир.

Го повтори ставот дека низ историските личности треба да гледаме основа за градење на уште поголемо пријателство и соработка помеѓу двете земји и двата народа и оти не е добро како за европската иднина на Балканот, така и за регионот на Југоисточна Европа, историските моменти да се избегнуваат и се ставаат „под тепих".

-Затоа имаме и договори за доброседство и соработка, за да можеме и во иднина да ги решиме и овие прашања, прашања што треба да не обединуваат, што ќе ја споменат нашата заедничка историја како нешто што било светост за граѓаните кои живееле во тој период конкретно крајот на 19 и почетокот на 20 век, кога револуцоиниерите овде се бореле за социјални права, за слобода…и верувам можеме низ решение што ќе носи соработка и уште поголемо пријателство ќе бидат предизвиците низ кои што ќе ја димензионираме европската иднина, оцени Заев.

Вториот човек на Ватикан позитивен на коронавирусот

Италијанскиот кардинал Пјетро Паролин, државен секретар и втор човек на Ватикан, како и неговиот заменик, се позитивни на коронавирусот, соопшти денеска ватиканската медиумска служба.

„Паролин (67) е позитивен на Ковид, но со благи симптоми и сега е во изолација", изјави Матео Бруни, директор на медиумската служба.

Позитивен е и неговиот заменик Едгар Пења Пара, венецуелски надбискуп, и нема симптоми, додаде тој.

И двајцата биле вакцинирани против вирусот.

Папата Франциск (85), кој исто така е вакциниран, често се среќава со Паролин, кој му е десна рака и добар познавач на дипломатските прашања.

Проди: Час поскоро да продолжи проширувањето на ЕУ со сите земји од Западен Балкан

Обраќањето тој го искористи токму да го посвети на Македонија.

Поранешниот претседател на Европската комисија, Романо Проди, денеска во обраќање пред учесниците на онлајн-церемонијата на доделување на Светската награда за хуманизам ја повтори неопходноста од продолжување на процесот на проширување на Европската унија со земјите од Западен Балкан.

Обраќањето тој го искористи токму да го посвети на Македонија и потешкотиите со кои се соочува земјата на нејзиниот евроинтеграциски пат, особено неговото изненадување од одлуката на Франција да не даде зелено светло за отпочнување на преговорите со Македонија за членство.

– Сметам дека процесот на проширување на ЕУ мора да се заокружи. Европа е мешавина на германска, саксонска, словенска култура и сите ние сме едно, токму поради нашето мултикултурното наследство. Сакам оттука да дадам силна порака, час поскоро да почне процесот на евроинтеградција на сите земји од Балканот во ЕУ, во спротивно Европа нема да биде целосна. Знам дека многубројното членство во ЕУ значи мултициплирање на проблемите и остава повеќе простор за отворени прашања, но има позитивни промени во политиката. Токму во име на хуманизмот, велам дека тој е единствен, универзален начин за наше сплотување заедно со сите наши различности во потеклото и културата, рече Проди.

Проди кој и самиот е лауреат на Светската награда за хуманизам за 2019 година и на свеченоста на примопредавањето на наградата во Охрид пред три години посочи на потребата од неизоставно забрзување на процесот на присоединување на државите од Балканот кон Европската унија, притоа предупредувајќи дека нема да има целосен и траен мир во Европа се додека сите земји од континентот не станат дел од големото европско семејство. /МИА

Јанчев: Обезбедена помош за опожарените куќи во с. Возарци

Градоначалникот на Општина Кавадарци Митко Јанчев соопшти дека е обезбедена помош за двете семејства од село Возарци чии куќи беа зафатени од пожар.

Службите на општината процениле дека во едната опожарена куќа е причинета материјална штета во износ од 60 илјади денари а во другата во износ од 200 илјади денари.

Општината Кавадарци ќе додели сума од 20 илјади денари за едното и 60 илјади денари за другото семејство како надоместок за штетата од пожарот.

Градоначалникот Митко Јанчев соопшти дека останатиот дел од вкупната сума потребна за санирање на овие домови ќе биде покриена од страна на неговата семејна компанија „Кожувчанка“.

Јанчев упати и апел да се внимава при употребата на грејни тела за да се избегнат вакви ситуации.

притисни ентер