Грција останува силен лобист и поддржувач на Македонија во претстојниот процес на преговори со Европската Унија, ова е клучната порака што произлезе од работната средба меѓу премиерот Заев и грчкиот колега Мицотакис во Атина. Очекувано, главната тема било спроведувањето на обврските од Преспанскиот договор, со приоритет на работатата на мешовитите комисии за образовни прашања и за заштитните марки и брендови. И за двајцата, приоритет се поголема економска соработка и интензивирањето на интерконекцијата за природен гас.
-Влеговме во НАТО, почнуваме преговори со ЕУ, првата меѓувладина конферецнија се очекува во декември. Многу сме среќни., вели Зоран Заев, претседател на Владата
-Mислам дека можеме да ги унапредиме, особено, економските односи, зашто бизнис релациите меѓу двете земји, отсекогаш биле силни. Имаме многу за што да зборуваме, изјави Кирјакос Мицотакис, премиер на Грција.
Ова е трета средба меѓу двајцата премиери, по смената на власта во Грција, од кога почна и промената на реториката на Мицотакис во однос на Преспанскиот договор, а веќе следниот месец се очекува посета на грчките комори на Скопје на разговори за брендот на имињата на продуктите.
На разговорите на македонската делегација и претходеше и средба со грчката претсеателка Катерина Сакеларопулу, на која било констатирано дека спогодбата го решила тридецениското отворено прашање и создало сојуз и партнерство меѓу соседите. Претпладнето, Заев се обрати и на панелот посветен на иднината на Западен Балкан на конференцијата на Економист. Порача дека Балканот нема друга алтернатива освен евроатланската и дека очекува Македонија да ги почне преговорите во декември.
-За мене е многу важно да му покажеме на остатокот од светот, особено за регионот од Југоисточна Европа, дека секој договор, секое пријателство, секое ракување, носи бенефит за нашите граѓаните. Стратегијата за сите земји нѐ води да направиме реформи во нашите земји, да го подобриме квалитетот на животот за нашите граѓани, изјави Зоран Заев.
Дел од владината делегација во Атина беа и Вицепремиерите Димитров и Фатмир Битиќи, како и шефот на дипломатијата, Бујар Османи, кои остварија средба со грчкиот министер за надворешни работи, Никос Дендиас.