За власта извештајот на ЕК го препознава напредокот на државата

За власта извештајот на ЕК го препознава напредокот на државата, за опозицијата ја покажува негрижата на владата за спроведување на реформите.

Власта и опозицијата вчера излегоа со различно толкување на Извештајот што Европската комисија го објави за земјава. Додека за власта Извештајот е позитивен и ја препознава одржливоста на реформите, опозицијата со критика дека документот ја покажува системската негрижа на Владата за спроведување на реформите во општеството.

Вицепремиерот Бојан Маричиќ вчера на заедничката прес-конференција со евроамбасадорот Дејвид Гир, рече дека како земја која преговара за полноправно членство во Европската Унија и која е во процес на скрининг, Македонија доби позитивен годишен Извештај на Европската комисија за 2022, прв по отворањето на преговорите во јули оваа година.

Маричиќ нагласи дека по направената анализа на Извештајот, го радува тоа што може да се каже оти земјата има одржливи реформи и препознаен напредок.

– На самиот почеток, Европската комисија го поздравува почетокот на преговарачкиот процес, што беше потврдено и од страна на комесарот Вархеји со изјавата дека „Одржувањето на Меѓувладината конференција на 19 јули 2022 година е нова пресвртница во односите меѓу Македонија и ЕУ, бидејќи пристапните преговори започнаа“. Ова е признание за континуираната посветеност на Македонија и постигнувањата во спроведувањето на реформите, особено во Кластерот „Фундаментални вредности“, каде се оценува дека напредокот во правосудството расте и се бара да продолжи трендот на независно и самостојно работење, истакна тој.

Маричиќ и европскиот амбасадор Гир ги анализираа дел од кластерите, а главен акцент беше ставен на работата на Собранието.

– Имаме јасна критика за доцнење при носењето на законите, за што причина се блокадите од страна на опозицијата. Се нагласува потребата Собранието да биде форум за конструктивен политички дијалог, особено за ЕУ реформската агенда и заедно со Владата да работат на планирање на законодавната агенда, со приоритет на уставните измени, додаде Маричиќ.

Гир во своето обраќање посочи дека е потребен напор од сите политички партии со цел да се засили улогата на Собранието.

Оценката за вкупната подготвеност на земјата за 2022 година е „добро ниво на подготвеност“, информираше вицепремиерот. Тој посочи дека од аспект на остварениот напредок, задржано е темпото на напредок или има подобрување во 23 од вкупно 43 области и поглавја, додека во останатите 20 области има ограничен или помал напредок. Од аспект на подготвеноста во околу 90 отсто од областите имаме делумна или добра подготвеност.

– Ова покажува дека и покрај сите внатрешни, но и надворешни предизвици со кои се соочуваме, сепак имаме стабилен континуитет во вкупната подготвеност на земјата, што треба да биде поттик повеќе за сите нас. Македонија недвосмислено ја потврди стратешката определба кон Унијата, во еден нов геополитички контекст, меѓу другото и со фактот што беше прва земја од регионот која се придружи кон сите осуди, санкции и рестриктивни мерки поврзани со руската агресија на Украина со постигнување на 100 проценти усогласеност со Заедничката надворешна и безбедносна политика на ЕУ, додаде тој.

Маричиќ порача дека очекуваат земјата и регионот да бидат вклучени во механизмите на ЕУ за снабдување со енергија и храна. Како особено важен дел ја посочи констатацијата на Комисијата дека процесот на скрининг се одвива непречено, а земјата покажува високо ниво на посветеност.

Во однос на делот на медиумите, во одговор на новинарско прашање, Маричиќ рече дека во Извештајот на ЕК, останува оценката дека медиумите во Македонија имаат соодветна средина за слобода за критичко новинарство.

– Во делот на слобода на изразување и медиуми, останува оценката дека медиумите имаат соодветна средина за работа која обезбедува критичко новинарство, но ни останува обврската за усогласувањето со правото на ЕУ за аудиовизуелни медиумски услуги и реформирање на националниот радиодифузен сервис и подобрување на работничките права на медиумските работници, рече Маричиќ.

Дека земјава има остварено напредок во текот на минатата година, се согласува и премиерот Димитар Ковачевски, кој нагласи дека дополнително и исклучително важно е тоа што во последниот Извештај на ЕК е нотирано оти земјата ги почна преговорите со ЕУ.

Одговарајќи на новинарско прашање вчера на прес-конференција со министерот земјоделство, шумарство и водостопанство Љупчо Николовски, тој посочи дека ова е прв Извештај на ЕК во историјата на извештаите каде што опозицијата е полошо оценета од Владата.

– Тоа е поради блокадите во Собранието, а нефункционалноста не е предизвикана од Владата, туку од опозицијата. Тоа е нотирано и во самиот извештај, вели Ковачевски.

Премиерот додаде дека на последната седница во Собрание посветена на пратенички прашања, ги повикал сите политички партии и пратеници заедно и обединето да се соочат со предизвиците за полесно справување со енергетската и економска криза, како и побрз пристап кон ЕУ.

– Веќе сме во процес на преговори, а во тек е скринингот. Во ноември почнува и билатералниот скрининг. Целта е целиот скрининг процес да заврши до ноември следната година. Следниот Извештај на Европската Комисија сигурно ќе биде подетален, бидејќи ќе содржи дополнително и податоци од објаснувачкиот скрининг и билатералниот скрининг, појаснува премиерот.

Како што додаде Ковачевски, во билатералниот скрининг, преговарачкиот тим на Македонија ќе презентира во кој дел и колку државата е усогласена и напредната и порача дека е значајно сите во општеството да бидат дел од евроинтеграциите, бидејќи, како што вели, тоа е процес што ќе трае најмалку осум години.

И шефот на дипломатијата Бујар Османи вчера на неговиот Фејсбук-профил го истакна напредокот на земјава во однос на надворешната политика, што е потврден со највисока оцека во Извештајот на Европската комисија.

– Највисока оценка – многу добар напредок – во извештајот на Европската комисија за напредокот остварен во надворешната политика, почеток на преговорите со ЕУ како историски момент што означува нова фаза во пристапниот процес на земјава, целосна усогласеност со Заедничката надворешна и безбедносна политика на ЕУ, докажан доверлив партнер и стратешки ориентиран кон основните принципи и вредности на ЕУ, значаен придонес во регионалните односи и иницијативи, потенцираше министерот на Фејсбук.

Евроамбасадорот Гир вчера на предавањето на Извештајот на ЕК на претседателката на Врховниот суд, Беса Адеми, рече дека нотирањето на активностите и напорите на овој Суд во Извештајот на ЕК е силен знак за неговата посветеност и придонес во реформскиот процес и дека реформите треба да продолжат со истата посветеност во интерес на граѓаните. Амбасадорот истакна дека професионалноста е најсилната гаранција за ефикасноста и за независноста на секое судство и дека капацитетот на институциите е од суштинско значење за остварувањето на правдата.

Пратеникот од СДСМ Миле Талески, пак, оцени дека Извештајот го препознава напредокот и одржливоста на реформскиот процес и го поздравува почетокот на преговорите со ЕУ со одржувањето на првата Меѓувладина конференција.

– Споредено со другите држави од Западен Балкан, Македонија сè уште стои најдобро во регионот во Кластерот „Фундаментални вредности“, а оценката за вкупната подготвеност гласи „добро ниво на подготвеност“. Позитивниот извештај на ЕК е признание за напорите на Владата и парламентарното мнозинството предводени од СДСМ за реализација на реформите важни за евроинтегративниот процес, рече Талески.

Како што нагласи тој, додека сите честитаат на позитивниот извештај, единствено ВМРО-ДПМНЕ како „докажана антиевропска партија шири лаги и ја извртува содржината“ на Извештајот и оти критиката на ВМРО-ДПМНЕ е целосно спротивна на оценката на ЕК дека државата има издржан реформски напредок кон ЕУ.

– Вистината е дека во Извештајот најмногу критика има за опозицијата, предводена од ВМРО-ДПМНЕ и нивните блокади во Собранието каде имаме јасна критика за доцнење при носењето на законите, за што причина се блокадите од страна на опозицијата. ВМРО-ДПМНЕ нема никакво право да дава оценка за Извештајот, затоа што нашата држава најлошите извештаи од Европската комисија ги имаше токму за време на владеење на ВМРО-ДПМНЕ. Па така, во Извештајот од 2016 година, последната година од владеењето на ВМРО-ДПМНЕ стои дека имаме заробени институции, судски органи, регулаторни тела и медиуми, каде меѓуетничките односи се оценувале како кршливи, биле нотирани притисоци врз јавната администрација, рече Талески.

Опозициската ВМРО-ДПМНЕ, пак, со став дека Европската комисија, како и во изминатите извештаи, и во овој Извештај прави детална и посветена вивисекција на правните, политичките и економските состојби во државата и оттука ја поздравуваат посветеноста на ЕК и ЕУ за деталната анализа на македонското законодавство, но и за имплементацијата на истото.

– Овој годишен Извештај јасно ја покажува системската негрижа на Владата за спроведување на реформите во општеството. Главен заклучок на овој Извештај, кој се однесува на работењето на властите, е дека кај Владата во Македонија нема сериозна и суштинска посветеност на реформи. Постои недостаток на одлучни чекори за да се изгради моментум и да се продолжи процесот на преговори со ЕУ. Владата прибегнува кон ад хок иницијативи, кои ги заменуваат системските реформски пристапи, рече Стефан Андоновски, меѓународен секретар на ВМРО-ДПМНЕ.

Според него, ако се погледнат шесте клучни кластери, ќе се забележи дека земјава нема подобра оценка од претходните години во ниту еден од нив и оти во секој од кластерите, државата се смета како умерено подготвена, што е иста оценка со годините претходно.

– Огромен проблем за Владата е што Европската комисија ја наведува оценката дека нема никаков напредок во спроведување токму на препораките од ЕК од изминатата година. Тоа се однесува особено на препораките за реформа на јавната администрација, градење на конкуренција на пазарот, слободно движење на стоки и работници, како и правото на интелектуална сопственост. Ова значи дека Владата воопшто не ги земала предвид препораките на Европската комисија, оценува тој.

Според него, што се однесува до Собранието како главна институција за развивање на демократијата, Извештајот го пронаоѓа она што тие како опозиција подолго го нарекувале „самоволие на спикерот Џафери“.

– Извештајот го забележува повеќемесечното незакажување на седници за пратенички прашања, што се рашири од пред локалните избори во 2021 година, па се до април 2022 година. А, дури и за ЕУ е евидентно она што само Ковачевски не сака да го види – дека тој се плаши од дебата во Собранието, бега од истата, навредува, клевети и омаловажува. Најголемата болка на оваа Влада во Собранието, е исто така забележана од Извештајот. Законите со лажно европско знаменце со кои сомнителни законски решенија се обидуваат да се протуркаат низ Собранието, а истите продолжуваат да бидат проблем и за ЕУ. Според Извештајот донесени се вкупно 81 закон по скратена постапка. Затоа, ЕК ја споменува и злоупотребата на европското знаменце во носење на законите по кратка постапка. Според ЕК, овие закони треба да бидат значително ограничени бидејќи ги намалуваат можностите за инклузивни законодавни процеси и значајни дебати, рече Андоновски.

Тој наведува и дека големи критики во Извештајот се ставени и во делот на реформата на јавната администрација, затоа што таа останува на истото ниво на подготвеност, како и во изминатите години – оценета со нема напредок и државата е само умерено подготвена.

Директорката на Институтот за европска политика (ЕПИ) Симонида Кацарска за МИА оцени дека е очекувано тоа што Европската комисија во извештајот генерално држи позитивен тон во однос на посветеноста на властите на ЕУ агендата, со оглед на тоа дека имавме пробив во јули во однос на процесот на отворање на преговорите и формален почеток на скрининг процесот.

Кацарска оценува дека во повеќето поглавја има одреден напредок и, вели, ако погледнеме споредбено со минатите години, нивото на подготвеност за преземање на обврските од членството останува релативно исто.

– Единственото поглавје во кое имаме зголемено ниво на подготвеност за преземање на обврските за членство е во поглавјето за заедничката надворешна безбедносна политика, вели Кацарска за МИА коментирајќи го Извештајот на ЕК.

Кацарска, меѓутоа, оценува дека и покрај напредокот, очигледно е дека има многу области во кои препораките се повторуваат и тие стагнираат.

– Дополнително, исклучително загрижуваат негативните проценки на Комисијата во однос на капацитетот за управување со средствата од претпристапните фондови кои се повторуваат неколку години по ред, вели за МИА директорката на ЕПИ Кацарска.

Извештајот на ЕК објавен во средата, е прв извештај за земјава по одржувањето на Првата меѓувладина конференција на 19 јули годинава. Во изминатите извештаи, почнувајќи од 2009 година, Еврокомисијата препорачуваше отворање пристапни преговори, додека во март 2020 година, Советот на ЕУ ја одобри одлуката за почеток на преговорите, но поради блокадата на Бугарија, не беа отпочнати се до јули. /МИА.

Столтенберг: Предусловот на Путин за прекин на огнот е Украина да отстапи уште повеќе земја

Прес-конференција на Генералниот секретар на НАТО, Јенс Столтенберг во Белата куќа, по неговиот состанок со претседателот на САД, Џо Бајден.

Во продолжение целосната изјава на Генералниот секретар на НАТО:

Добар ден. Само што имав добра средба со претседателот Бајден, разговаравме за претстојниот Самит на НАТО овде во Вашингтон следниот месец, каде што ќе ја прославиме 75-годишнината од најуспешната Алијанса во историјата, НАТО. Но и каде носиме важни одлуки за иднината. Не помалку за трошоците за одбрана, а со претседателот ги споделив новите бројки што ги имаме, кои покажуваат дека оваа година 23 сојузници ќе потрошат 2% од БДП или повеќе за одбраната, што е двојно повеќе од пред само четири години и покажува дека повеќе и повеќе сојузници сега навистина се засилуваат и инвестираат повеќе во нашата безбедност. Ќе донесеме и важни одлуки за Украина. Очекувам НАТО да преземе водечка улога во обезбедувањето безбедносна помош и обука, а исто така и дека сојузниците ќе ѝ дадат поголема воена и финансиска поддршка на Украина. Така, со нетрпение очекувам да се вратам во Вашингтон за да присуствувам на Самитот на НАТО и да го прославам НАТО овде во Вашингтон следниот месец.

Прашање: Пакет за Украина, за што се работи, што очекувате?

Па, очекувам дека кога шефовите на држави и влади ќе се состанат овде во Вашингтон следниот месец, всушност за неколку недели, да се согласиме дека НАТО ќе преземе водечка улога во обезбедувањето безбедносна помош и обука. Очекувам дека ова ќе биде предводено од генерал со три ѕвезди, тоа ќе биде да обезбеди логистика, поддршка за поставување на капацитетите што и се потребни на Украина. Најверојатно ќе биде лоциран во Визбаден, Германија, во американскиот објект таму и ќе има околу 100 лица кои ќе ја организираат и олеснуваат безбедносната помош за Украина. Ова е важно бидејќи ќе обезбеди поголема предвидливост, поголема одговорност кога станува збор за нашата поддршка за Украина. А исто така го намалува товарот на САД. Се разбира, ја поздравувам одлуката на американскиот Конгрес да одвои 60 милијарди дополнителни американски долари за Украина. Но, го поздравувам и фактот што всушност европските сојузници и Канада се совпаѓаат со она што го прават САД. И давајќи му на НАТО поголема улога, ќе се погрижиме товарот на САД да се намали и да имаме поголема долгорочна поддршка за Украина.

Прашање: Дали постои некаква загриженост дека користењето на финансиии од руските фондови, како и проширувањето во дозволувањето оружје да влезе во земјата, навистина е загрижува дека тоа ја турка Русија да прави работи што тие веројатно вообичаено не би ги направила и каков е нашиот одговор на барање за мир од самата Русија?

Пред сè, ја поздравувам одлуката на земјите од Г7, сојузниците на НАТО да ги искористат демобилизираните руски средства за финансирање заем за Украина за да им помогнат да добијат поголема финансиска поддршка од Западот за да се осигураат дека можат да се спротивстават на руската агресија.

Второ, го поздравувам мировниот самит што се одржа во Швајцарија во текот на викендот. Ова покажува дека има широка национална поддршка за Украина. Но, знаеме и дека она што се случува околу преговарачката маса е нераскинливо поврзано со ситуацијата на бојното поле. И се додека претседателот Путин верува дека можат да победат на бојното поле, нема да има траен мир во Украина. Значи, ако сакате мир во Украина, најдобриот начин да го постигнете тоа е да ја зајакнете Украина, нејзините воени капацитети, за да можат да преговараат од позиција на сила и да обезбедат Украина да надвладее и да опстане како суверена независна нација.

Прашање: За понудата на Русија за мир?

Русија навистина не доставила понуда. Претседателот Путин рече дека предуслов за прекин на огнот е Украина да отстапи уште повеќе земја, да се откаже од сите четири провинции што Русија ги анектираше без да ги контролира. Значи, не само што Украина треба да се откаже од земјата што Русија ја контролира денес, туку и Украина треба да се откаже од земјиштето што Русија не го контролира денес. Тоа беше предуслов за прекин на огнот. Ова не е мировна понуда. Ова е предлог дека Русија всушност треба да ги постигне своите воени цели со тоа што ќе ја убеди Украина да се откаже од својот суверенитет и територијален интегритет.

Прашање: Можете ли да ги разјасните вашите коментари за распоредувањето на нуклеарното оружје, нуклеарното оружје на НАТО, и како тоа не би било сфатено како ескалација од страна на Русите?

Па, НАТО има со децении нуклеарно одвраќање. Тоа не е ништо ново, не е ново ниту тоа што го модернизираме ова нуклеарно одвраќање. Ги заменуваме старите авиони, со нов авион од петтата генерација и САД го модернизираат оружјето што го распоредија. Значи ова не е ништо ново. Ова е модернизација на нуклеарното одвраќање на НАТО, кое трае веќе некое време, а ние бевме транспарентни за тоа и се соопштува многу години.

Прашање: Ќе се зголеми ли бројот на оружје?

Не, нема планови за зголемување на бројот на оружје, она што го правиме е дека ги заменуваме авионите со нови авиони од петта генерација, а САД го модернизираат оружјето. Значи, ова е модернизација на нуклеарното одвраќање што го имаме многу години. Тоа не е ништо ново и тоа е нешто што го комунициравме долго време.

Спајиќ задоцнил 4 минути на средбата со претседателот на Бугарија, Радев ја напуштил Владата

Премиерот на Црна Гора задоцнил 4 минути на средбата со претседателот на Бугарија, Радев ја напуштил Владата.

Откажана е средбата меѓу премиерот на Црна Гора Милојко Спајиќ и претседателот на Бугарија Румен Радев. Како што соопштија за „Вијести“ од Владата, договорената средба меѓу Спајиќ и претседателот на Бугарија во зградата на Владата доцнела, поради што делегацијата предводена од Радев ја напуштила зградата по четири минути чекање.

– Со амбасадата на Бугарија беше договорено средбата да се одржи во приемната сала во Владата во 17 часот, бидејќи премиерот Милојко Спајиќ имаше голема желба да се сретне со претседателот Радев и покрај набиената агенда. Претходната средба на премиерот со германската компанија траела три минути подолго од планираното, а делегацијата на претседателот на Бугарија Румен Радев по четири минути чекање ја напуштила зградата на Владата – изјавија за „Вијести“ од Владата. Од владата дополнително за „Вијести“ објаснуваат дека средбата требало да се одржи во истата сала каде што се одржала средбата со претставниците на компанијата и дека причината за нејзиното одложување е тоа што просторот треба да се подготви за нова средба. Домаќин на посетата на претседателот на Бугарија е претседателот на Црна Гора, Јаков Милатовиќ.

Шефот на НАТО и се закани на Кина

 Шефот на НАТО, Јенс Столтенберг, за Би-Би-Си изјави дека Кина треба да се соочи со последици за поддршката на руската војна во Украина доколку не го промени своето однесување.

Столтенберг рече дека Пекинг „се обидува да седне на две столчиња“ поддржувајќи ги воените напори на Русија додека ги одржува односите со европските сојузници.

-Ова нема да функционира на долг рок, изјави Столтенберг во интервјуто за време на посетата на Вашингтон.

Во опширното интервју Столтенберг зборуваше и за нуклеарното оружје и трошоците за одбрана. Запрашан што би можеле да направат членките на НАТО во врска со поддршката на Кина за Русија, Столтенберг рече дека има „тековна дискусија“ за можните санкции.

Столтенберг е во посета на Вашингтон. Рускиот претседател Владимир Путин, пак, денеска оди во Северна Кореја. Минатиот месец беше во Кина.

-Русија во моментов се повеќе се усогласува со авторитарните лидери, изјави Столтенберг.

Тој рече дека Северна Кореја испратила артилериски гранати во Русија, а за возврат Русија обезбедила напредна технологија за ракетните и нуклеарните програми на Северна Кореја.

-Така Северна Кореја и помага на Русија да води агресивна војна против Украина, заклучи генералниот секретар на НАТО. /МИА

притисни ентер