Преку организациите овозможено им е волонтирање во различни земји низ Европа, па на тој начин младите се запознаваат и со културата и јазикот во државата во која се ангажирани.
Зошто е добро да се волонитра, е прашање на кое не може да се даде еден одговор, а од волонтерските здруженија сметаат дека човекот треба да даде дел од себе за општеството во кое живее.
„Волонтирањето е неисцрпен извор на инспирација, нови познанства и пријателства. Знам дека многу млади се активни и се надевам дека поголем дел од нив ќе се вклучуваат што повеќе во волонтерски активности. Сметам дека човекот треба да посвети дел од своето време за општеството“- Андреј Наумовски, волонтерски центар-Скопје.
На младите волонтери им е потребен лидер кој ќе биде посветен и ќе ги насочи за нивните обврски. Проблем може да настане, сметаат познавачите на оваа дејност, во моментот кога во граѓанските организации има многу волонтери, но нема кој да ги води.
„Секој волонтер бара внимание. Треба да има волонтерски координатор во секоја организација кој ќе врши координација. Најчестата грешка што се прави е кога имаме наплив на волонтери и нема кој да ги менаџира“.-Златко Талевски, МКЦ Битола.
Освен испраќање на волонтери од Македонија во странство, и нашата земја е популарна за волонтирање на млади луѓе кои доаѓаат од различни европски држави како Турција, Финска, Франција, Белгија, и Германија, кои остануваат и до една година во Македонија.
Дека волонтерството е благородна дејност покажува и примерот за учениците волонтери од Тетово, кои собраа свои средства за реновирање на детското одделение во Клиничката болница во градот под Шара.
Се проценува дека околу 15 отсто од работоспособното население е вклучено во одредена неформална волонтерска активност, која не подразбира злоупотреба на трудот или неплатена работа.