Утре напладне ќе продолжи седницата за избор на нова Влада

Во Собранието вечерва заврши расправата за избор на новата влада. 

Според опозициската ВМРО-ДПМНЕ, поединечните предлог-имиња во новата влада се доказ дека СДСМ нема избор и иднина на која треба да и се верува, а од владејачките партии, пак, сметаат дека се реализирани сите ветувања.

Собраниската седница за избор на новата влада продолжува утре во 12 часот.

Според пратеничката Дафина Стојановска од ВМРО-ДПМНЕ, дискутабилно е прашањето дали станува збор за избор на нова влада, бидејќи, како што рече, изненадувачки е што целата гарнитура на стари ни нови активисти на СДСМ „пеат во еден глас" дека ова е најдемократски чин по оставката на Зоран Заев.

Таа во своето излагање на собраниската седница рече дека во владата на Ковачевски има 11 кадри на СДСМ, шест на ДУИ, три на Алтернатива и еден на ЛДП, а додаде дека владата на Ковачевски брои девет нови и 11 стари имиња.

-Поединечните предлог-имиња се само доказ дека СДСМ нема избор и иднина на која треба да и се верува и даде шанса. ДУИ, пак, и покрај зелената агенда, докажува дека не е подготовена за никакви промени. Убедена сум дека и самата ДУИ знае дека и тоа како треба да се менува, но и да ги менува ликовите со сомнителни документи за завршено образование. Тоа не се ликови со кои ќе влеземе во Европската Унија. Помалите коалициски партнери во континуитет ја продолжуваат праксата на коалицирање, не смеејќи да не дадат глас и да се спротивстават за сметка на некое семејно вработување или некој тендер, рече Стојановска.

Пратеникот Павле Трајанов од Демократскиот сојуз во своето излагање нагласи неколку приоритети на кои треба новата влада да се посвети.

-Прво, доста е со говори, стратегии, платформи за реформи во правосудниот систем, да направиме кредибилен судски систем, законите да важат за сите. Да обезбедиме фер судење и правда, да се преиспитаат монтираните судски процеси. Ако нема правда, нема ниту мир. Ако нема правна сигурност, бега капиталот, но и младите. Второ, од понеделник натаму, силна и бескомпромисна борба против тешките облици на криминал и високата корупција, рече Трајанов.

Тој напомена дека седум институции се вклучени во откривање и сузбивање на криминалот, но тие како што рече, се партизирани, некоординирани. Затоа пратеникот Трајанов предлага Закон за борба против тешките облици на криминал и висока корупција, како и формирање на независна Агенција за борба против криминалот.

-Трето, коренити реформи на изборните правила. Македонија да биде една изборна единица, законски услови за рамноправен политички натпревар. Четврто, имплементација на европските стандарди и реформи согласно поглавјата за членство во ЕУ, независно што и натаму трае блокадата од Бугарија, рече Трајанов.

Исто така, тој напомена дека е потребно да се отвори расправа за системски промени, преку промени на Уставот за јакнење на одговорноста, отворање на расправа за Бадентер, затоа што, како што рече, се злоупотребува или селективно се применува.

-Имаме и конкретни идеи за младите, по завршување на високо образование, да можат да работат година дена во приватен сектор или државни институции, на сметка на Буџетот. За економските аспекти, енергетската криза, пандемијата и други значајни прашања ќе разговараме и во наредниот период. Но мораме да ги департизираме виталните државни институции, да им дадеме шанса на способните и креативните, на младите, додаде Трајанов.

Пратеничката на СДСМ Лидија Тасевска во рамки на собраниската седница во својата реплика нагласи дека во 2017 година Владата предводена од СДСМ наследи девастиран здравствен систем, и мораше одново да го враќа дигнитетот професијата на лекарите и општо на сите здравствени работници.

Според пратеничката на ВМРО-ДПМНЕ, Рашела Мизрахи, новата влада има едвај мнозинство во Парламентот, нема политички легитимет и ја нема довербата од граѓаните, ниту пак идеја како да се соочува со проблемите понатаму.

-Доказ за тоа е владината програма, плагијат на онаа на Заев. Неверојатни 583 пати се споменува зборот „ќе". Не верувам во чуда, но ќе ви треба чудо да не извадите од гнилежот на Заев. Луѓето сакаат одговори и одговорност, а не спинови и лаги. Народот сака одговорност за Ласкарци, за пожарите кои се случија во летото, за судството, за обвинителството, за економија, за цените, платата, за Клиничката болница, за образование, за незавршен пат Скопје – Охрид, за воздухот, за сите лаги, за јазикот, историја, и за се што е преговарано со соседите за нацијата, додаде Мизрахи.

Собраниската расправа за избор на нова влада трае најмногу два дена, а за изборот на владиниот состав се гласа по нејзиното завршување, односно најдоцна до 24 часот вториот ден или во случајов во недела до полноќ. Владата е избрана ако за неа гласаат мнозинството од вкупниот број пратеници во Собранието.

Оризопроизводителите најавуваат протест ако поддршка за арпата не добијат повеќе земјоделци

Производителите на ориз од кочанскиот регион бараат што повеќе земјоделци да бидат опфатени со финансиската помош – три денари за килограм предадена арпа, а за тоа е неопходно, велат, рокот за предавање на арпата да се продолжи до јуни.

На Министерството за земјоделство му даваат рок од две недели да најде начин како ова да го спроведе. Во спротивно, најавија, ќе организираат нови протести и ќе ги блокираат магистралните патишта.

Производителите до петок очекуваат ресорното Министерство да организира средба на која ќе ги образложат барањата, но се надеваат и дека ќа се најде заедничко решение за да се избегне блокирањето на сообраќајниците.

-Нашите сознанија се дека само на 15 отсто од земјоделците кои успеале до 15 декември да ги предадат произведените количини, им е исплатена финансиската помош од КОВИД мерките. Тие временски не можеа да стигнат да ја продадат арпата, зашто жетвата на оризот завршува до крајот на октомври, ниту пак откупувачите физички со своите капацитети можеа да стигнат да ги исполнат условите. Исто така, не се опфатени ниту земјоделците кои арпата ја преработиле во бел ориз. Затоа бараме, редовните субвенции да останат по 3.000 денари за декар и да бидат исплатени за 15 дена, а рокот за откуп на арпата заради добивање дополнителната финансиска помош да се продолжи до јуни. Ако не добиеме позитивен одговор, ќе излеземе на протести со блокада на патиштата, изјави земјоделецот Здравко Коцев од Облешево.

Земјоделците кои произведуваат ориз се во дилема како ќе ја почнат сеидбената сезона оваа година поради драстично зголемените трошоци на вештачките ѓубрива и заштитните препарати.

-Една вреќа ѓубре од 25 килограми сега чини 1.650 денари, а ќе се покачат и цените на хербицидите, што значи дека трошоците по декар се зголемени за сто отсто. Со сегашните откупни цени не можеме да ги покриеме давачките, а не станува збор за заработувачка. Затоа очекуваме арпата да се откупува по 40 денари, а белиот ориз по 80 денари за килограм, истакна Стојче Ташевски, земјоделец од Облешево. /МИА

Одложено првото рочиште за случајот „Софтвери“ поради отсуство на една од обвинетите

Екс владиниот секретар Драги Рашковски од домашен притвор денеска беше спроведен во скопскиот кривичен суд каде започна судењето за набавката на сообраќајните софтвери.

Но рочиштето беше одложено поради отсуство на една од обвинетите и очекувањето на Апелација да се произнесе по жалбата на Рашковски според кој Обвинителството на незаконски начин прибавило докази против него, заради што вети интересен судски процес.

-Не може да имате во кој Обвинителството на својот компјутер во Word направиле текстуални пораки и заборавиле да го сменат времето и во една секунда има 43 пораки. Јас проверував, Гинисовиот рекорд е дека за педесет и нешто секунди можете да испишете една порака а не 43 во една секунда. Не може во 2015 година средства да потекнуваат од кривично дело од 2017, не треба да сте ни правник. Едноставно Холивуд да го режира ова не може така да го направи, вели Рашковски.

Освен по жалбата за доказите, Апелација треба да одлучи и по жалбата на Рашковски за одлуката на судот да му го замрзне имотот во април лани додека траеше истрагата по што и антикорупционерите дојдоа до сознанија дека стан од 65 квадрати во Скопје и земјиште од 11 илјади квадратни метри во викенд населбата Побожје, префрлил на своите малолетни деца. Рашковски тврди дека нема разлика во имотниот лист во времето пред и по завршувањето на функцијата во Влада, освен во подароците на децата.

-Од 2017 година кога сум влегол на функција до 2021 кога сум излегол, ќе видите дека не постои разлика освен подароците на моите две деца прибрани од родендени, крштевки, мекици итн. Друг податок за зголемување на имотот не постои. Значи сето тоа е само префрлено, како секој родител, ние сме традиционална земја, вели Рашковски.

Обвинителката Ивана Трајчева уверува дека во случајот се постапувало како и во други предмети. Вели и дека располага со цврсти докази против Рашковски и останатите обвинети.

-Постапувањето на Обвинителството во овој предмет ништо не се разликува од постапувањето во други предмети а за кои има правосилни судски одлуки и се познати во јавност како Рекет и 27 Април.Во суштина станува збор за докази од кои ќе се докажат сите факти кои се наведени во диспозитивот на обвинителниот акт, за секоја постапка посебно како и за хонорарците а и за кривичното дело перење пари, вели Трајчева.

Рашковски и уште шест лица одговараат за злоупотреба на службената положба и перење пари. Ден пред судењето тој во допис до медиумите, тврдеше дека системот за сообраќајни прекршоци кој никогаш употребен а исплатен над 70 илјади евра, ќе спасуваше животи на улиците. Следно рочиште е закажано за 24 февруари.

СДСМ: Законите важат за сите подеднакво, денеска тоа го потврди и Транспаренси

Соопштение за јавност - реакција на прес-конференцијата на Наум Стоилковски од ВМРО-ДПМНЕ.

Законите важат за сите подеднакво, без разлика за кое име и презиме станува збор, а тоа е потврдено и со случајот којшто го споменува ВМРО-ДПМНЕ.

Фактите се дека има судска пресуда за овој случај, потврдена и од Апелацискиот суд. Споменатите лица се осудени на затворска казна и ја имаат издржано казната.

Од ВМРО-ДПМНЕ очигледно не можат да се воздржат од пласирање на невистини и конструкции.

Денешниот Извештај на Транспаренси интернешнл потврдува дека законите важат за сите.

Една од главните причини за напредокот од 24 места е тоа што земјата има преземено конкретни чекори за кривично гонење на високи функционери од власта.

Центар за комуникации со јавноста на СДСМ

притисни ентер