Министерот за образование Жан-Мишел Бланкер за телевизијата БФМ изјави дека сите деца треба да посетуваат настава во живо доколку немаат добра причина да не одат на училиште, додека родителите не треба да се плашат.
По карантинот, кој траеше од средината на март до средината на мај, Франција постепено ги отвори сите училишта во последната недела пред летните одмори, бидејќи властите беа загрижени за заостанатите лекции во училиштата.
Франција е една од најтешко погодените земји во Европа со коронавирус, со повеќе од 30 000 жртви.
Бројот на заразени се зголемува во последните неколку недели, со повеќе од 5000 нови инфекции на ден, регистрирани минатата недела.
Во првите три недели од јули имало помалку од илјада заразени на ден.
Бланкер наведува дека сите училишта се подготвени за отворање, но Министерството има планови за часови преку интернет, доколку се воведе карантин во најтешко погодените области.
„Образованието е можност, нè обединува“, напиша претседателот Емануел Макрон на Твитер.
„Новата учебна година има многу предизвици, но барем повторно сме заедно“, додаде тој.
Децата изгледаат исто толку ентузијастички.
Ле Паризиен разговарал со тројца браќа ученици, кои наведуваат дека периодот поминат во карантин со часови преку интернет без пријатели траел премногу долго.
„Не сме ги виделе нашите пријатели веќе шест месеци“, рече момчето Матје за „Ле Паризиен“.