Во Франција почина возач на автобус, брутално го претепале патници без маски

Возач на автобус во Франција починал во понеделникот откако биле нападнат затоа што не сакал да им дозволи на патниците без маска да се качат во возилото, јавува Би-Би-Си.

Носењето маски во Франција, каде досега починале 30.000 луѓе од ковид-19, е прогласено за задолжително.

Нападот што доведе до апсење на пет лица се случи во неделата вечерта во градот Бајон во југозападна Франција. Според синдикален извор, возачот, кој бил во своите педесетти години, се обидел да спречи маж со куче кој не носел маска да се качи во автобусот.

Тој побарал да се качат уште четворица патници без маски, кои не го слушнале викањето на возачот и влегле во автобусот. Возачот потоа бил нападнат и претепан , по што завршил во болница со сериозни повреди на главата. Кога пристигнал во болницата, тој бил во несвест и лекарите го прогласиле за мртов во понеделникот.

Петте лица се приведени во понеделникот и ставени во притвор. Јавниот транспорт беше прекинат некое време во понеделникот, бидејќи другите возачи одбиле да возат во знак на протест за бруталниот напад врз нивниот колега.

Жан-Рене Етегарај, градоначалникот на Бајон, им се обрати на вработените во транспортната компанија во понеделникот.

„Сведоци сме на исклучително насилен и варварски чин“, рече тој, повикувајќи ги надлежните органи да ги казнат сторителите со цел да бидат пример за другите.

Камерон Дијаз конечно призна зошто ја прекина актерската кариера (ВИДЕО)

Поранешната холивудска ѕвезда Камерон Дијаз ги откри причините зошто се повлече од филмската индустрија, велејќи дека нашла мир кога престанала да работи.

47-годишната Дијаз беше гостинка на подкастот на Гвинет Палтроу In goop Health: The Sessions и разговара со актерката за нејзиниот бизнис со вино, за тоа како менталитетот се менува со стареењето, како и влијанието на нејзината кариера врз квалитетот на животот и врските.

„Решив дека сакам нешто поразлично од животот“, рече Дијаз, додавајќи дека работела долго и напорно на правењето филмови. „Не ми остануваше простор за личен живот“, вели таа.

За време на нејзината 20-годишна кариера (1994-2014), Дијаз беше номинирана за четири Златни глобуси. Најпозната е по нејзините улоги во филмови како „Маска“ (1994), ,,Има нешто за Мери” (1998) и ,,Небо од ванила”(2001).

Кога Палтроу ја праша како се чувствува откако ја остави успешната актерска кариера, Дијаз рече дека нашла мир во својата душа. „Конечно се грижам за себе“.

Поранешната актерка изјави дека решила навистина да се фокусира на нејзините односи со семејството и пријателите откако многу години им ја предала контролата на одредени аспекти од нејзиниот живот на другите луѓе.

„Кога снимате филм, тоа е совршен изговор - тие ве поседуваат. Вие сте таму 12 часа на ден со месеци и немате време за ништо друго“, рече таа.

„Актерите се инфантилизирани. Ние сме ставени во позиција каде што сè друго е згрижено“.

Дијаз рече дека никогаш не се чувствувала пријатно во таков живот и дека морала да преземе одговорност по пензионирањето. Таа вели дека одлучила да стане независна и докажала дека може да се грижи за себе како возрасна личност.

Таа откри и колку е „интензивно“ да се биде во центарот на вниманието на јавноста цело време.

Дијаз има објавено две книги, ,,Книга за тело” и ,,Книга за долговечноста”. Пред пет години, таа се омажи за пејачот на рок бендот „Шарлот“, Бенџи Маден. Претходно оваа година, тие ја добија ќерката, Радикс Маден.

Експлозијата во Бејрут направила кратер од 124 метри (ВИДЕО)

Катастрофалната експлозија што се случи во пристаништето во Бејрут, во која што загинаа најмалку 135 лица, ќе ја чини државата најмалку 15 милијарди долари.

Во експлозијата починале најмалку 135 лица , околу 5.000 се повредени, а повеќе од 300.000 луѓе се раселени од нивните домови.

Стотици се исчезнати и се стравува дека бројот на загинати ќе продолжи да расте.

Властите во Бејрут прогласија двонеделна вонредна состојба.

Според Си-Ен-Ен, дијаметарот на кратерот во Бејрут што бил направен со експлозијата е голем околу 124 метри.

Си-Ен-Ен ги објави информациите засновани врз анализа на сателитски снимки.

Ова значи дека кратерот е поголем од фудбалско игралиште. Си-Ен-Ен додава дека нивната проценка може да варира на повеќе или помалку од 10 метри.


Мелбурн е град на духови , почна четвртиот степен на карантин (ВИДЕО)

Вториот по големина град во Австралија, Мелбурн влезе во првиот ден од шестнеделниот карантин и повеќето продавници и канцеларии се затворени, додека властите се борат против вториот бран на пандемијата.

Продавниците се затворени, а улиците се напуштени во овој град со пет милиони жители, главниот град на австралиската држава Викторија, каде што во последните 24 часа се евидентирани 471 случаи на инфекција со коронавирус и осум смртни случаи поврзани со инфекцијата.

Австралија сега бележи вкупно околу 20,000 заболени и 255 смртни случаи, што е сè уште многу помалку отколку во многу други развиени земји.

Но, порастот на инфекцијата во државата Викторија се заканува дека ќе се прелее во остатокот од земјата. Нов Јужен Велс вчера забележа 12 нови случаи на ковид-19, односно вкупно 483.

„Веќе еднаш ја исправивме таа крива, повторно ќе ја исправиме“, изјави министерот за здравство Грег Хант пред новинарите.

Премиерот на Викторија, Даниел Ендрјус, ги повика жителите на Мелбурн, кои со недели живеат со поблаги карантински мерки, да останат мирни и покрај зголемената побарувачка за продукти во супермаркетите.

„Нема потреба луѓето да прават резерви со храна за повеќе месеци“, им рече Ендрус на новинарите во Мелбурн.

Кланиците се меѓу ретките компании на кои што им е дозволено да останат отворени во Мелбурн, иако има намален број работна сила.

„Се обидовме да постигнеме рамнотежа помеѓу намалувањето на движењето, со што ќе се намали бројот на случаи, но без да се загрозат потребите на граѓани во супермаркетите“, додаде Ендрјус.

Националната стапка на невработеност ќе се искачи на околу 10 проценти благодарение на обновените рестриктивни мерки во државата Викторија, рече австралискиот премиер Скот Морисон.

„Овие мерки ќе имаат многу значајно негативно влијание врз нашиот пат кон закрепнување“, рече премиерот.

притисни ентер