ВМРО-ДПМНЕ и коалицијата поднесоа законски измени за бришење на т.н. „Пржинска Влада“

ВМРО-ДПМНЕ нема да го условува укинувањето на техничката Влада со брзи предвремени избори, но бара уште во среда по скратена постапка овие измени да се најдат на дневен ред. 

Моделот кој произлезе од пржинскиот договор за 100 дена Влада пред избори во која учестувуваат министри од опозицијата е нефункционален, а тоа се покажа пред последниот изборен циклус- смета опозициската ВМРО-ДПМНЕ која денеска ги достави предлог-измените на законот за Влада во Собранието.

Поддршка за брза процедура ВМРО-ДПМНЕ засега доби само од БЕСА на Биљал Касами. СДСМ не верува дека опозицијата поднесува безусловен предлог-закон. Бараат најпрво да се постигне конзенсус од четирите најголеми политички партии, исто како што беше и договорено да се воведе техничка Влада во 2015та. Со оглед на тоа што избори ќе има во 2024та година, има време да се разговара за измени на Законот за Влада, вели координаторот на СДСМ Митрески.

ДУИ нема ништо против предлогот на ВМРО-ДПМНЕ, бидејќи укинувањето на техничка Влада беше и дел од договорот за коалиција меѓу Заев и Ахмети во август 2020та година, велат од партијата. Сепак и тие сметаат дека е потребна анализа, дебата и согласност од поголемите партии во Собрание.

Доколку партиите постигнат консензус и го променат законот со кој техничката Влада би заминала во историјата, сепак на местото на Ковачевски, 100 дена пред избори ќе седне премиер Албанец. Од партијата на Ахмети велат дека овој договор постигнат меѓу нивниот лидер и поранешниот премиер Заев важи за политичка, а не за техничка Влада, и за тоа воопшто не е потребен консензус.

Манифестација „Цртање на асфалт" на Детски културен центар „Карпош"

ЈУ Детски културен центар „Карпош" денеска организира манифестација „Цртање на асфалт", во која учествуваат најмалите, односно децата од сите градинки од Скопје и околината.

Манифестација, како што информираат од Детски културен центар, е посветена на денот на македонските просветители Св.Кирил и Методиј, кои се едни од најзначајните личности во македонската историја.

ДКЦ Карпош за манифестацијата ќе обезбеди материјали за цртање (креди во боја), ќе организира пригодна програма, како и запознавање на децата за значењето и одбележувањето на овој голем ден како празник.

Децата од предучилишните установи, како и изминатите години ќе можат да ја изразат својата креативност со своите цртежи кои ќе бидат по слободен избор. Манифестацијата ќе се одржи на плочникот позади Соборен храм, посочуваат од Детски културен центар.

Бајден Во Токио се сретна со јапонскиот цар и премиерот Кишида

Претседателот на САД, Џо Бајден имаше средба со јапонскиот цар Нарухито во кралската палата во Токио, за време на своето патување во Азија.

Станува збор за прв состанок, откако двајцата се сретнаа во декември 2013 година. Тогаш Нарухито беше престолонаследник, а Бајден потпретседател на САД, информираше Кралската прес агенција.

Ова е вторпат, актуелниот јапонски цар, кој го презеде тронот на 1 мај 2019 година, да биде домаќин на американски претседател за време на државна посета. Претходно, тоа беше Доналд Трамп.

Американскиот претседал потоа се сретна и со неговиот „добар пријател", премиерот Фумио Кишида, кого го уверуваше дека САД се целосно посветени на одбраната на Јапонија, за време на засилени тензии со Кина и последици од рускиот напад на Украина, пишуваат медиуми.

Една од темите беше и Северна Кореја. Бајден денеска ќе се сретне и со семејства на Јапонци, кои пред неколку години беа киднапирани за да обучуваат шпиони во Северна Кореја

Главната тема на дводневната посета на Бајден на земјата, каде ќе се сретне и со лидерите на Јапонија, Индија, Австралија, ќе биде започнување Инфо-пацифичката економска рамка, широк план што го поддржува економскиот столб на САД во Азија.

– Американско-јапонската алијанса долго беше основа за мир и напредок во Индо-пацификот, а САД се длабоко посветени на јапонската одбрана, изјави Бајден на почетокот на разговорот во палатата Акаска во централно Токио.

ММФ: Меѓународната заедница треба да ги намали трговските бариери за да се бори со инфлацијата

 Меѓународната заедница треба да ги намали трговските бариери, за да се бори со инфлацијата. 

Оваа препорака ја има во заедничката статија, објавена денеска од извршната директорка на Меѓународниот монетарен фонд (ММФ), Кристалина Георгиева, нејзиниот прв заменик Гита Гопинат и директорката на Одделот на стратегија, политика и анализа на ММФ, Џејла Пазарбасиоглу.

Авторите повикаа на „враќање на довербата во глобалниот систем, заснован на правила".

„Можеме да започнеме уште сега со намалување на трговските бариери, за да се надмине недостигот и да се намалат цените на продуктите и другите стоки. Не само државите, туку и компаниите треба да го диверзифицираат увозот, за да се обезбедат синџири за снабдување и да се зачуваат огромните деловни придобивки од глобалната интеграција".

Во објавениот текст се забележува дека тензиите околу трговијата, технолошките стандарди и безбедноста, „се зголемуваат со години, поткопувајќи ги растот и довербата во сегашниот глобален економски систем".

Според ММФ, „само несигурноста околу трговската политика довела до пад на светскиот БДП за речиси еден процент во 2019 година. Во меѓувреме, од почетокот на војната во Украина, околу 30 држави ја ограничија трговијата со храна, енергија и со други клучни стоки".

притисни ентер