Власта ветува модел за прочистување во судството во првите 100 дена

Прочистување на судството и обвинителството вети новата Влада

Прочистување на судството и обвинителството вети новата Влада, а веќе вчера министерот за правда Бојан Маричиќ најави дефинирање на моделот до истекот на првите 100 дена од мандатот.

Маричиќ и вицепремиерот за борба против корупцијата и криминалот Љупчо Николовски ветуваат дека концептот и моделот ќе бидат дефинирани во комуникација со сите чинители во правосудниот сектор.

– И од претседателот на Судскиот совет и од претседателот на Советот на јавни обвинители добивам уверување дека заедно ќе работиме на овој модел, како и од државниот јавен обвинител и од претседателот на Врховниот суд. Сите тие ќе се вклучат ефективно во креирањето на моделот, но и во неговото спроведување. Без партнери во овие клучни институции тешко ќе успееме. Поради тоа ми е важно и одржувам дневна комуникација со сите нив со цел да направиме модел во којшто јавноста ќе верува, да ги отвориме судските институции за поголема отчетност, пристапност кон граѓаните и јавноста и на тој начин да ги тргнеме сите шпекулации, целата мистерија поврзана со судската власт за да може јавноста да верува и да има двонасочна комуникација со судските власти, рече Маричиќ на вчерашниот брифинг со новинарите.

Идејата е, како што појасни Маричиќ, да има концепт во којшто ќе има проверка на имотот на судиите и на обвинителите, проверка на случаите коишто се застарени или блиску до застарување, проверка на случаите коишто се случиле од висока корупција или висок јавен интерес. Ќе има и ефективна постапка за оние судии и обвинители кај кои ќе се утврди одговорност за непостапување и непрофесионално настапување.

Според вицепремиерот Николовски, процесот на прочистување на правосудството е еден од клучните темели на коалицискиот договор на Владата. На прес-конференцијата во Владата, Николовски рече дека тој процес веќе е започнат со одредени проверки на потеклото на имотот на носителите на јавни функции.

– Бев директно вклучен во самите разговори за договорот. Клучно за државата во моментов се правдата, економијата, борбата против корупцијата, екологијата и уште некои приоритети. Денес кога сите нашите соседи ни се пријатели, кога сме дел од безбедносниот сојуз НАТО, кога се остварени стратешките цели на државата, почнуваме преговори со ЕУ, треба да се зафатиме со работа дома. Граѓаните ја испратија својата порака, сакаат да има одговорност, рече Николовски.

Целта на овој процес, како што појаснуваат надлежните, е да се врати довербата кај граѓаните во правосудниот систем, но и добрите професионалци, односно оние кои добро си ја вршат работата, да бидат наградени, а оние кои не ја вршат добро работата и кои ја зајакнуваат недовербата во правосудниот систем, да бидат отстранети од тој систем. /МИА

Модуларната болница почна да ги пополнува капацитетите

47 болнички кревети се зафатени од вкупно 77.

Ковид кризата се продлабочува.

Модуларната болница која е сместена до инфективната клиника почна да ги пополнува капацитетите 47 болнички кревети се зафатени од вкупно 77.

И вчера министерството за здравство соопшти 640 инфицирани од коронавирусот и 12 починати.

Во Скопје и натаму има најмногу активни случаи. А предничат општините Аеродром, Карпош и Центар.

Во Струмица и Штип пренаменија и други болнички одделенија за ковид пациенти, а согласно растечкиот тренд на заразени со тешка клиничка слика, не е исклучена можноста во некои од регионите повторно да биде укинат мој термин и здравствените работници да бидат фокусирани само на третманот на болни од корона.

Рекорден број на нови случаи со Ковид-19 во Бугарија

Во Бугарија се потврдени 1.595 случаи на коронавирус.

Починале 16 лица, објавено е денес на официјалниот сајт за следење на состојбата со коронавирусот.

Во последните 24 часа се тестирани 9.038 лица, од кои 17,65 отсто биле позитивни на вирусот, пренесе „БТА“.

Досега во Бугарија заболеле 34.930 лица, од кои 16.033 активни случаи, а најмногу заболени има во Софија, Пловдив и Благоевград.

Хоспитализирани се 1.792 пациенти, од кои 112 на одделот за интензивна нега.

До сега од коронавирусот во таа земја починале 1.064 лица.

Лице од Велешта тешко повредено од соселани

Четириесет годишен жител од струшко Велешта синоќа бил нападнат и тешко повреден од лица од истото село.

Портпаролот на СВР Охрид Стефан Димоски денеска информира дека И.И. (40) бил хоспитализиран во Општата болница во Струга, со тешки повреди на главата.

– По преземени мерки, полициските службеници констатирале дека И.И., на авто-плац кај селото Долна Белица, бил физички нападнат од Г.О. и А.О. од селото Велешта. Против напаѓачите, ОВР Струга ќе поднесе соодветна пријава, изјави Димоски./МИА

притисни ентер