Власта го одби предлогот за брза собраниска седница за уставни измени, како што побара лидерот на ВМРО-ДПМНЕ Мицкоски со цел, како што тврди, да се види дека неговите сопартијци нема да дадат ниту еден глас ЗА. Вицепремиерот за евроинтеграции Бојан Маричиќ вели дека е рано да се зборува за вметнување на Бугарите во македонскиот Устав, но кога ќе дојде време очекува широк консензус од политичките партии. Процесот според Маричиќ нема да биде едноставен, но сите опции за обезбедување на двотретинско мнозинство вели дека се на маса, вклучувајќи и барање поединечна поддршка од опозициски пратеници.
„Сите опции се на располагање. Ние како Влада ќе понудиме платформа за поддршка на европските интеграции и сигурен сум дека ќе има можност таа платформа да ја подржат широк консензус на пратеници во Собранието. ВМРО-ДПМНЕ и Мицкоски треба еднаш да дадат поддршка на нашите стратешки цели. Го пропуштија тоа за НАТО, што е жално за сите нас, но не би требало да го пропуштат за ЕУ. “
СДСМ нема двотретинско мнозинство и од таа причина избегнува брза седница за уставни измени, напиша лидерот на ВМРО-ДПМНЕ Христијан Мицкоски на фејсбук.
„Aко навистина верува власта дека има 80 пратеници, тогаш нема подобар начин да се потврдат тие политики и да се “вивнеме” со нив кон европските височини, а и ќе се спасат од мене во политиката. Ниту имаат подршка во парламентот за уставни измени, ниту пак ја заслужуваат овие политички изманици. Оттука прашањето околу уставните измени за ВМРО-ДПМНЕ е затворено. А, власта се плаши од избори затоа што нема поддршка.“
Овој став денеска го повтори и потпретседателката на ВМРО-ДПМНЕ Димитриеска Кочоска.
„ За нас тоа прашање е затворено, мнозинството го немаат и затоа не е ставено на гласање.“
Додека за уставните измени власта нема одредено временска рамка, за спроведување на препораките од историската комисија има рок од две години. Уверуваат дека промените во учебниците за Македонија и Бугарија ќе бидат реципрочни.
„Тој текст којшто е договорен и Бугарија и Македонија подеднакво имаат обврска да го имплементираат во својот систем и тоа функционира на принцип на реципроцитет, односно важечка е само доколку заедно ги имплементираме во двата системи. Секако ќе бидеме внимателни да го заштитиме нашиот интерес, бидејќи им веруваме на луѓето коишто работат таму, а сите чекори во врска со имплементација на договореното ќе бидат координирани со нашите филтри на институциите и со комисиите за учебници, со сите оние други инстанци во Министерството за образование и наука и Владата и нема да направиме ниту еден чекор еднострано. “
Договореното меѓу мешовитата историска комисија, опозцијата го оцени како штетно за македонските национални интереси и додаваат дека бугарските историчари веќе слават победа.