Македонија

Владата ќе ја разреши Афрона Верзиволи од главен ревизор на ИПА фондови

Од Владата велат дека сега најважно е вниманието да се насочи кон истрага за сомнежите за злоупотреби на ИПА Фондовите.

Владата ќе ја разреши Афрона Верзиволи од главен ревизор на ИПА фондови

По најавите од Делегацијата на ЕУ дека ќе испитува дали Владата поставила несоодветна ревизорка за контрола на европските пари во Македонија, од „Илинденска“ бр.2 соопштија дека назначената Афрона Верзиволи утре ќе биде разрешена од местото ревизор на ИПА фондовите. Образложение нема, ниту пак објаснување дали таа на 30 јули била именувана иако не поседувала лиценца за ревизор..

Од Владата велат дека сега најважно е вниманието да се насочи кон истрага за сомнежите за злоупотреби на ИПА Фондовите, за кои велат постои и пишан траг и нотификација од Европската канцеларија за борба против измами (ОЛАФ).

- Ја известуваме јавноста дека назначената Афрона Верзиволи во текот на утрешниот ден ќе биде разрешена од местото ревизор на ИПА фондовите. Пренасочувањето на вниманието кон други теми го толкуваме како бегство од одговорност за ваквите злоупотреби. Одговорност ќе има – велат од Владата..

Реагираа и од „Вреди“, на чиј предлог е назначена Верзиволи. Од коалицијата објаснуваат дека тие уште пред неколку денови го повлекле нејзиното именување како ревизорка на ИПА фондовите, но и признаваат дека таа немала соодветен сертификат.

-Ја информираме јавноста дека коалицијата ВЛЕН уште пред неколку дена го повлече именувањето на Афрона Вервизоли како ревизорка на ИПА фондовите. Иако Вервизоли има одлично CV и значително професионално искуство, донесовме одлука таа да биде привремено заменета со друг кадар од нашите редови. Оваа одлука е направена со цел да се осигура дека сите строги стандарди и барања на Европската Унија ќе бидат целосно исполнети, додека Афрона ја заврши својата обврска со добивање на сертификатот, велат од „Вреди“.

Од СДСМ, пак, сметаат дека Верзиволи ќе биде повлечена благодарение на нивниот притисок и оној од јавноста. Од опозициската партија реагираат дека Мицкоски е решен, како што велат, по секоја цена, да постави блиски луѓе, па откако ќе сфати дека не поминуваат во јавноста, ги повлекува.

- Благодарение на притисокот на СДСМ и јавноста, уште еден таков кадар Афрона Верзиволи, ќе биде повлечен. Но, очигледно Мицкоски нема да се откаже од овој начин на именување кадри. За него и ВМРО-ДПМНЕ број еден приоритет е послушноста и партиската припадност, а квалификациите изгледа се на последно место. Токму оваа политика ги обесхрабрува граѓаните и професионалците кои ја губат довербата во институциите и бараат работа надвор од државата. Не е ни чудно што владата е катастрофа, со ваква кадровска политика не може повеќе да се очекува – стои во реакцијата на СДСМ.

Биографијата на Верзиволи не беше објавена, а по инфомациите во јавноста дека таа имала единствено искуство од работа во банка, случајот предизвика интерес и во Делегацијата на ЕУ во Скопје, од каде најавија дека ЕУ внимателно ќе ги испита именувањата од оваа перспектива, нагласувајќи дека „важно е сите назначувања на надлежни позиции во државните институции да се вршат со почитување на сите законски услови за работното место и релевантна стручност“.

Претседателката на ДКСК, Татјана Димитровска за Канал 5 потврди дека и тие постапуваат по пријава за назначување на несоодветно лице за главен ревизор на претпристапната помош од ЕУ и дека доставиле барања до Владата и Ревизорското тело за ИПА фондови во Скопје за информации за нејзината стручност и дали ги исполнува законските услови за да биде главен ревизор за ИПА фондовите.

Главниот ревизор за ИПА фондовите и целото ревизорско тело отчет даваат пред ЕУ, а за оваа позиција постојат строго дефинирани услови.

Свет

Видео: Еден загинат, и 50 повредени во уривање на зграда во Бангкок по земјотресот

Најмалку едно лице загина, а 50 други се повредени откако висококатница во изградба се урна во Бангкок по силниот земјотрес што во петокот го погоди соседен Мјанмар, соопштија тајландските власти.

Видео: Еден загинат, и 50 повредени во уривање на зграда во Бангкок по земјотресот

Службите за итни случаи претходно соопштија дека 50 лица се наоѓале во зградата што се урна во паркот Чатучак по земјотресот што го погоди Мјанмар, Тајланд, а бил почувствуван и во југозападна Кина.

Силен земјотрес со јачина од 7,7 степени според Рихтеровата скала го погоди центарот на Мјанмар, соопшти Американскиот геолошки институт. Епицентарот бил на 16 километри северозападно од градот Сагаинг, на длабочина од 10 километри, соопшти USGS.

Силни потреси биле почувствувани стотици километри подалеку во Тајланд и југозападна Кина.

Зградите во Бангкок обично не се дизајнирани да издржат земјотреси, па штетата може да биде значителна, пренесе Би-Б-Си.

Тајландската влада одржува итен состанок.

Македонија

Приведени двајца возачи кои удриле пешаци во Скопје

 Двајца возачи кои вчера со возила удриле пешаци во Скопје се лишени од слобода, а возилата им се одземени.

Приведени двајца возачи кои удриле пешаци во Скопје

Како што соопшти денеска МВР, полициски службеници од СВР Скопје го лишиле од слобода скопјанецот И.С.(45), затоа што вчера околу 21:50 часот во Скопје, на крстосницата од ул.„Адем Демачи“ со ул.„Методија Митевски“, со патничко возило „фиат“ со скопски регистарски таблички удрил во пешакот А.А.(57) од Скопје.

-Пешакот е пренесен за укажување на лекарска помош во ГОБ „Св. Наум Охридски“, каде му се констатирани тешки телесни повреди. Известен е јавен обвинител, а увид извршила екипа од СВР Скопје И.С. е задржан во полициска станица, а возилото е одземено за понатамошна постапка, велат од МВР.

Оттаму соопштуваат дека полициски службеници од СВР Скопје го лишиле од слобода Б.Х.(52) од Република Турција, со живеалиште во Скопје, затоа што вчера околу 17:30 часот во Скопје, на крстосницата од ул.„Филип Втори Македонски“ со ул.„Мирче Ацев“, со патничко возило „цитроен“ со скопски регистарски таблички удрил во Л.М.(48) од Скопје.

-Во несреќата со тешки телесни повреди се здобила Л.М., констатирани во ГОБ „Св.Наум Охридски“. Увид на местото на несреќата извршила екипа од СВР Скопје, а по наредба на јавен обвинител возачот е задржан во полициска станица, а возилото е одземено за понатамошна постапка. По целосно расчистување и документирање на случаите, ќе бидат поднесени соодветни пријави, се наведува во соопштението.

Свет

Белата куќа му одговори на Путин: Украинците одредуваат кој ќе управува со Украина

Управувањето на Украина го одредува нејзиниот Устав и народот на земјата, изјави портпаролот на Советот за национална безбедност на Белата куќа коментирајќи ги изјавите на рускиот претседател Владимир Путин.

Белата куќа му одговори на Путин: Украинците одредуваат кој ќе управува со Украина

Управувањето на Украина го одредува нејзиниот Устав и народот на земјата, изјави портпаролот на Советот за национална безбедност на Белата куќа коментирајќи ги изјавите на рускиот претседател Владимир Путин, кој предложи воспоставување привремена администрација во Украина.

Засега нема коментар од Украина во врска со изјавата на Путин.

Рускиот претседател Владимир Путин синоќа рече дека треба да се смета како опција ставањето на Украина, која тој ја нападна во 2022 година, под администрација на Обединетите нации за да се овозможи одржување нови избори во земјата.

- Таква практика постои и во принцип, се разбира, може да се разговара за можноста за привремена администрација на ОН со САД, европските земји и, се разбира, и со нашите партнери и пријатели, рече Путин за време на состанокот со војниците на нуклеарна подморница во базата во Архангелск.

Како што пренесе ДПА, целта е да се одржат демократски избори на кои на власт ќе дојде влада способна да дејствува за мировен договор.

- Потоа ќе почнеме преговори за мировен договор, ќе потпишеме легитимни документи кои се признати во светот и се безбедни и стабилни, рече Путин.

Руската влада постојано се обидуваше да го дискредитира легитимитетот на украинскиот претседател Володимир Зеленски.

Редовниот мандат на Зеленски заврши во мај 2024 година, но не може да се закажат избори поради воената состојба која е во сила веќе три години. Путин, исто така, постојано се повикуваше на нацистички слики и реторика од Втората светска војна за да ја оправда инвазијата на Украина, и покрај фактот што Зеленски е Евреин.

Украинскиот парламент во февруари усвои резолуција со која се потврдува легитимноста на Зеленски со јасно мнозинство. Многумина во Украина веруваат дека одржувањето на избори во услови на тековниот конфликт би било непрактично и нефер, бидејќи би било тешко да се обезбеди учество на војници и раселени цивили.

На меѓународно ниво, Зеленски и понатаму е признат како претседател.

Путин, исто така, повтори дека Русија претпочита мирно решение на конфликтот со Украина, „но не на нејзина сметка“.

Тој рече дека е подготвен да преговара – вклучително и со Европејците, но истакна дека Русија нема да биде измамена.

Во воена смисла, рускиот претседател еднаш рече дека е сигурен дека Москва ќе победи. Руските сили веќе зазедоа 99 проценти од Луганската област и повеќе од 70 отсто од областите Доњецк, Херсон и Запорожје, кои Москва исто така ги анектираше.

притисни ентер