Влада: Производството на струја се зголемува и во јануари има и продажба на ноќни вишоци

На денешната прес-конференција на портпаролите на Владата, Душко Арсовски и Муамет Хоџа и соработникот за енергетика, Виктор Андонов, беа презентирани најновите информации за енергетската состојба во земјата .

На денешната прес-конференција на портпаролите на Владата, Душко Арсовски и Муамет Хоџа и соработникот за енергетика, Виктор Андонов, беа презентирани најновите информации за енергетската состојба во земјата и одлуките од вчерашната 121 владина седница.

„Пред крајот на месец јануари, а во пикот на грејната сезона успеавме со добро менаџирање на работата на енергетските објекти за производство на електрична енергија 100% да ги задоволиме потребите на регулираниот пазар за домаќинствата и малите потрошувачи, како и објектите од виталната државна инфраструктура. Согласно законските обврски за 2023 година, ЕСМ имаат обврска само 50% да го снабдуваат регулираниот пазар со произведената електрична енергија од нивните капацитети, но за полесно справување со кризата Владата му даде обврска на ЕСМ да го зголеми своето производство и 100% да го снабдува регулираниот пазар, односно домаќинствата и малите потрошувачи“, рече соработникот за енергетика, Андонов.

Соработникот Андонов додаде дека за полесно справување со кризата и намалување на инфлаторните движења на цените на основните прехранбени производи, Владата го задолжи ЕСМ да обезбеди електрична енергија по фиксни и субвенционирани цени, пониски од пазарните.

Во месец јануари, ЕСМ целосно ги задоволи потребите на домаќинствата и малите потрошувачи од сопствено производство, додека во поголемиот дел од месецот, и дополнителните снабдувања за таргетираните сектори исто така беа обезбедени од сопственото производство на ЕСМ, без притоа да се направат дополнителни набавки. Ова е резултат, на заложбите на Владата, да се стават во функција сите расположливи енергетски капацитети, и после долг временски период, сите расположливи капацитети, вклучувајќи го и ТЕЦ Неготино беа вклучени во мрежа во текот на месец јануари. Постигнати се клучните цели што си ги постави Владата, цената на електричната енергија за најголемиот дел од домаќинствата не е зголемена, додека за малите потрошувачи е намалена за околу 20 проценти, додека домашното производство се зголемува и е стабилизирано во услови на европска енергетска криза“, истакна Андонов.

Тој рече дека во месец јануари бележиме производство и извоз на ноќни вишоци на електрична енергија и потенцираше дека од почетокот на годината произведени и продадени се вкупно 3.390 MWh ноќни вишоци на електрична енергија од кои 1.140 Mwh по цена од 103 евра за мегават час и 2.540 Мwh по цена од 98 евра по мегават час.

„Енергетскиот дневен биланс за ден 24 јануари, покажува дека вкупното домашно производство на електрична енергија изнесува 16.579 Мwh електрична енергија, од кои 11.325 Mwh се од термоелектрани, а 5.254 MWh се од обновливи извори. Со ова производство на електрична енергија 100% се задоволени потребите на домаќинствата и малите потрошувачи, како и потребите за дополнителни снабдувања за училишта, прехранбена индустрија и други витални државни субјекти“, соопшти Андонов.

Воедно тој констатираше дека електро-енергетскиот систем во државата е стабилен и функционален и во периодот што следува заради најавени врнежи на снег и постудено време, рече дека состојбата будно ќе се следи и навремено ќе се носат соодветни мерки, а јавноста за истото ќе биде навремено информирана.

Портпаролот Арсовски информираше за Планот за воспоставување Национален електронски идентитет за секој граѓанин што беше разгледан и усвоен на вчерашната седница на Владата, заедно со План за реализација.

Тој рече дека проектот овозможува две основни функционалности, електронска идентификација и електронски потпис, со можност понатаму да бидат проширени и треба да се користи во сите деловни процеси и трансакции кои користат електронски услуги без разлика дали тие се услуги од јавниот сектор, приватниот сектор, интеракции помеѓу поединци или претставуваат склучување договори помеѓу неколку физички лица.

„Овој проект го сметаме за носечки столб за дигиталната трансформација на општеството, со тоа што ќе овозможува унифициран пристап за користење на електронските услуги и размената на податоци, како во државата така и надвор од неа“, истакна портпаролот Арсовски.

Портпаролот Хоџа информираше за Програмата за работа на Владата за 2023 година, која беше усвоена на последната седница.

„Главните цели и приоритетите на оваа програма се: Обезбедување забрзан, одржлив и инклузивен економски раст, повисок животен стандард и квалитет на живот на граѓаните, успешно водење на пристапните преговори со Европската Унија, унапредување на енергетската транзиција, инвестирање во енергетска ефикасност и зелен развој, намалување на аерозагадувањето и влијанието на климатските промени, справување со последиците од светската пандемија предизвикана од КОВИД-19 и други кризи, унапредување на одбранбената политика во функција на развојот, независноста, територијалниот интегритет, безбедноста на граѓаните и колективната безбедност, целосно спроведување на Охридскиот рамковен договор, градење на граѓанска држава со етничка и социјална кохезија, врз принципите на меѓусебна толеранција и почитување, обезбедување на владеење на правото и независност на правосудството, подигнување на квалитетот на образованието достапно за сите, развој и унапредување на културата и спортот, како и професионална и ефикасна јавна администрација“, истакна портпаролот Хоџа, се наведува во соопштението од Владата.

Рикен нов генерален директор на Борусија Дортмунд

 Поранешниот германски фудбалер Ларс Рикен (47) е назначен за нов генерален директор на Борусија Дортмунд, соопшти бундеслигашот

Рикен речиси целата своја играчка кариера ја помина во Борусија Дортмунд, а од 2001 година е на чело на клупскиот тренинг центар. На новата должност ќе стапи на 1 мај.

Рикен доаѓа на местото на Ханс-Јоаким Вацке, кој претходно оваа сезона најави дека ќе се пензионира на крајот од сезоната.

„Уверен сум дека со неверојатната сила на овој клуб ќе оствариме големи победи“, порача Рикен.

Борусија Дортмунд во моментов е петтопласирана во Бундеслигата, а на почетокот на мај ќе игра против Пари Сен Жермен во полуфиналето од Лигата на шампионите. /МИА

Гласањето за претседател во затворот Идризово се одвива без проблеми

Во затворот Идризово гласањето за претседателските избори денеска се одвива без проблеми, иформираат за МИА од Избирачкиот одбор. 

-Подготвките за гласањето завршија одлично. Гласањето започна во 7 часот и се одвива без проблеми. Во Избирачкиот список за ова гласачко место број 2536 се запишани 887 избирачи, а до пладне на гласање излегоа 235, изјави за МИА членот на Избирачкиот одбор Тони Трајковски.

Согласно Избирачкиот список денеска треба да гласаат 2.147 лица кои се на издржување казна затвор или се во притвор.

За претседателските избори денеска гласаат и болните и изнемоштените и лицата во старските домови.

Членови на Избирачките одбори ги посетуваат во нивните домови за да гласаат и 6.935 болни и изнемоштени лица, чии пријави беа прифатени.

Запишани се и 534 избирачи, кои поднеле пријава за гласање, во посебниот извод од Избирачкиот список за лица кои за време на изборите се наоѓаат во установи за вон семејно згрижување, како и двајца избирачи со статус на внатрешно раселени лица, согласно евиденцијата на Министерството за труд и социјална политика.

Право на глас на седмите претседателски избори имаат 1.814.317 избирачи. Избирачките места се отвораат во 7 часот, а гласањето трае до 19 часот. Се гласа на 3480 избирачки места во целата земја.

Украина ги укина конзуларните услуги за воено способните машки државјани во странство

Украина ги укина конзуларните услуги на воено способните Украинци кои живеат во странство, освен за оние кои треба да се вратат во Украина.

Британските медиуми пренесуваат дека украинското Министерство за надворешни работи се уште не ја коментирало мерката, која се чини дека има за цел да го зголеми бројот на регрути за војната против Русија.

Шефот на украинската дипломатија, Дмитро Кулеба, изјави дека украинската Влада наскоро ќе издаде објаснување во врска со конзуларните услуги за воено способните мажи во странство.

„Престојот во странство не го ослободува граѓанинот од обврските кон татковината“, истакна Кулеба во објава на Х.

Кулеба додава дека заштитата на правата и интересите на украинските граѓани во странство отсекогаш била и останува приоритет на Министерството за надворешни работи, но дека сега сто тоа изгледа како воено способното лице кое заминало во странство на својата земја и покажува дека прашањето за опстанок не го загрижува, а потоа доаѓа и сака да добива услуги од државата.

„Ако тие луѓе мислат дека некој таму, далеку на фронтот, ќе се бори и ќе го дава својот живот за оваа земја, а некој ќе седи во странство, а истовремено ќе добива услуги од оваа земја, тогаш тоа не функционира така," додаде Кулеба. /МИА

притисни ентер