Ќе успеат ли СПЦ и МПЦ-ОА да ги завршат навреме сите техничко – организациони детали, за македонската црква на 12 јуни на Духовден, кога во Цариград ќе има заедничката богослужба со која ќе чиноначалствуваат македонскиот архиепископ Стефан и вселенскиот патријарх Вартоломеј, да го добие Томосот за автокефалност? Српскиот патријарх Порфириј во својот говор вчера рече дека двата Синода ќе разработат заеднички на процедурата, но ниту од македонска ниту од српска страна нема информации кога барањето ќе биде испратено..
Ако стигне навреме, за очекување е од Цариград поглаварот на МПЦ-ОА да се врати со официјалниот акт од Патријаршијата за афтокевалноста на црквата како Охридска архиепископија, со оглед на позитивниот став на Вартоломеј.. Вселенскиот патријарх синоќа во интервју за грчката телевизија ЕРТ рече дека е историски момент што шизмата која траеше речиси шест децении, по иницијатива на Вселенската патријаршија, заврши, изразувајќи задоволство од последните случувања во црковното прашање.
-Во изминатиот период, пред нашата одлука, беше започнат дијалог со црквата на Скопје, но нашата одлука ѝ олесни на црквата на Србија и во четвртокот на 19 мај, Неговото Блаженство патријархот Порфириј, поглаварот на СПЦ го покани поглаварот на Охридската црква и имаа заедничка литургија во Белград. Ова нè исполнува со задоволство. Тоа е историски момент. Една шизма што траеше околу шест децении, по иницијатива на Вселенската патријаршија, заврши, беше отстранета и влегуваме во нов период, изјави – Вселенски Патријарх Вартоломеј.
Признавањето на автокефалноста на МПЦ ОА од страна на СПЦ, го поздрави и Руската православна Црква. Заменик-претседателот на Одделот за надворешни односи на Московската патријаршија, протојереј Николај Балашов, во изјава за ТАС, вели дека ова ќе биде тема на разговор на следниот состанок на Светиот синод на Руската православна црква.
-Се радуваме заедно со нашите браќа Срби и Македонци. Овој настан го чекавме многу години. И сега дојде часот на Божјата волја. Верувам дека Светиот синод на Руската православна црква ќе даде соодветен одговор на својот следен состанок.-Николај Балашов - Заменик-претседателот на Одделот за надворешни односи на Московската патријаршија.
Засега се уште коментар нема од Бугарската Православана Црква, но црковниот историчар и аналитичар Горан Благоев вели дека БПЦ и покрај задоцнетото делување, ќе мора да ја признае МПЦ ОА.
-Бугарската православна црква ќе мора да ја признае македонската како една од многуте православни цркви во светот, а не како единствената со која има директно заедничко историско минато. Прашањето беше СПЦ пред се да се согласи да ја признае автокефалноста на МПЦ. Сега на претстојниот празник Духовден, кој е по Педестница кој годинава е во јуни, Македонскиот Синод ќе има општо служење со Цариградскиот Патријарх Вартоломеј, што значи дека Македонија влегува како полноправен член во семејството на православните цркви.изјави – Горан Благоев – Црковен аналитичар.
И додека се очекува следниот чекор до конечен автокефален статус, реакциите и честитките по вчерашната литургија не стивнуваат. Денеска и од кабинетот на шефот на државата Стево Пендаровски соопштија дека тој остварил телефонски разговор со патријархот Порфириј, на кој му се заблагодарил за одлуката, оценувајќи ја како можност за градење нови релации меѓу македонската и српската православна црква и надминување на горчливите теми од минатото, и дека целиот процес ќе заврши со скоро потпишување на Томосот од Вселенскиот Патријарх.
Премиерот Ковачевски, пак по враќањето од Рим, денеска го посети Синодот на МПЦ и лично им честиташе на поглаварот гг. Стефан за историската одлука.