Падна рускиот бастион во Украина – Лиман. Руските воени сили, односно околу 5.000 војници кои што беа опколени од страна на украинската војска се повлекоа од градот, а веста ја потврди и официјална Москва. Од Киев соопштија дека одбранбените сили веќе се влезени во досегашното руско упориште, а ваквата ситуација на терен е психолошки значајна, но и значаен чекор напред кон ослободување на Донбас. Украинските сили почнаа да ја наметнуваат својата волја и да го диктираат темпото, а не само да се бранат, а со тоа го трасираат патот кон независноста и територијалниот интегритет, порача претседателот Володимир Зеленски.
Имаме суштински резултати на истокот на нашата Украина, а и јавно се достапни доволно информации, па сите и слушнаа што се случува во Лиман, регионот Доњецк. Тоа се чекори кои што навистина ни значат, а јас сум благодарен на сите наши борци што го спроведоа овој елемент од нашиот одбранбен план кој е навистина важен.
Анектирањето на четирите украински региони од страна на Русија предизвикаа бурни реакции од страна на западот. Американскиот претседател Џо Бајден оцени Путин никого не заплашил со заканите и ќе се брани секоја педа од НАТО територијата.
Америка е целосно спремна заедно со нашите НАТО сојузници да го браниме секој сантиметар од НАТО територијата, секој еден сантиметар. Затоа, г-не Путин да не бидам погрешно разбран за тоа што го велам, секој сантиметар.
Одлуката за анексија на четирите региони, Доњецк, Луганск, Херсон и Запорожје ја отфрли и Турција, која не ја призна ниту анексијата на Крим во 2014 година.
Откако вчера Зеленски аплицираше за членство во НАТО, засега малку надеж има дека ќе добие експресно членство. По барањето на Зеленски, Украина по скратен пат да влезе во Алијансата, советникот за национална безбедност на САД, Џејк Саливен оцени дека процесот на зачленување ќе се остави за некое друго време, но поддршката на терен ќе остане.
Оваа недела најавивме значаен нов пакет од оружје од милијарда долари кој вклучува 18 нови високомобилни артилерии за Украина што е дел од нашата долгорочна посветеност да ги зајакнеме украинските вооружени сили за претстојните години, а очекуваме да имаме уште една најава за безбедносни системи наредната недела.
Во меѓувреме руските патроли го киднапирале Игор Мурашов, генералниот директор на најголемата европска нуклеарна централа стационирана во Запорожје, објави Петро Котин, претседателот на операторот Енергоатом. Засега како што вели неговата судбина е непозната.