Тие кон соопштението прикачиле и фотографии од снопови пари што биле пронајдени во домот на осомничениот. Тие тврдат дека осомничениот агент го користел својот мобилен телефон за фотографирање документи со детални информации за локацијата на воените контролни пунктови во регионот Запорожје. Тој потоа им ги пренесувал на Русите споменатите информации.
Заедно со сноповите пари, на фотографиите се и СИМ-картички издадени од руски мобилни оператори, боксер, два ножа и прирачник за учење англиски јазик. Пронајдени се и докази за постојана комуникација со претставници на полицијата и државните органи на Руската Федерација, вклучително и блиски роднини на осомничениот агент“, се вели во соопштението.
Генерал-мајор Виктор Јахун, кој бил заменик-шеф на СБУ до 2015 година, тврди дека овој случај докажува дека е потребно темелно чистење на службата, која долго време имала блиски односи со руската ФСБ. Од почетокот на руската инвазија на 24 февруари минатата година, повеќе од 60 членови на СБУ и на Јавното обвинителство кои останале на окупираната територија се осомничени за соработка со руските сили.
Во јули минатата година бил уапсен Олег Кулинич, кого украинскиот претседател Володимир Зеленски го назначил во 2020 година да ги надгледува операциите на Крим, кој е под руска контрола од 2014 година.
Минатиот октомври Украина побара од Србија да го екстрадира Андриј Наумов, кој беше шеф на одделот за внатрешна безбедност на украинската служба за државна безбедност, но ја напуштил земјата неколку часа пред руската инвазија.
„Кулинич и Наумов биле високи функционери и имале пристап до најтајните информации“, посочува Јахун. Тој наведува дека до 2010 година СБУ внатрешно го прославувала Денот на КГБ, одбележувајќи го формирањето на советската тајна служба од комунистичката ера и дека во редовите на СБУ имало проруски агенти, пишува Гардијан.
Јахун рече дека најголемиот минатогодишен напад на воена локација во близина на Лавов во западна Украина бил олеснет од 77-годишен поранешен агент на СБУ, кој ги пренесувал координатите. Поради ова, тој стравува дека многумина во украинската безбедносна служба се сметаат себеси за Руси.
Иако генерацијата што работела за советските безбедносни служби се пензионира, практиките за вработување на СБУ биле такви што нивните деца ги наследија. „Тие пораснаа со истите вредности како и нивните татковци. „Украина направи голема грешка што не го следеше водството на балтичките земји по стекнувањето независност во реформите на безбедносните служби од нула“, додава Јахун.
„Секако дека секогаш имало патриоти во службата, но тие биле во малцинство. Ситуацијата се подобрува, а од 24 февруари претседателот Зеленски изврши чистка на високиот персонал, така што не верувам дека на Русија ѝ се пренесени некои витални стратешки информации“, продолжува Јахун.
Тој е убеден дека некои агенти на СБУ биле поткупени и уценети да работат за Русија, додека други биле двојни агенти. „Другите се сметаат себеси само за Руси. Една жена која работела во СБУ беше уапсена и беше откриено дека споделувала руска пропаганда на социјалните мрежи“, заклучил тој.