УКИМ стана член на Science|Business мрежата на универзитети, компании и организации

Учесниците на конференцијата разменија мислења и идеи, што води до меѓусебно зајакнување на соработката во оваа област.

На маргините на министерската конференција, Универзитетот„Св. Кирил и Методиј“ во Скопје стана член на престижната Science|Business мрежа на универзитети, компании и истражувачки организации, и беше домаќин на конференција организирана од страна на Science|Business на тема „Улогата на Југоисточна Европа во одржување, градење и меѓусебно поврзување на истражувачките и иновативните инфраструктури во Европа“. Конференцијата беше наменета за дискусии од областа на истражувањата, науката и иновациите, со фокус на можностите за зајакнување на европската истражувачка област и интеграција на истражувачката инфраструктура на локално и европско ниво.

На конференцијата се обединија истражувачи, иноватори, претставници од академскиот и бизнис секторот, кои заеднички може да придонесат за зголемување на истражувањата и иновациите, кои водат кон зајакнување на европската истражувачка област.

Ректорката на УКИМ, проф. д-р Биљана Ангелова, во својот поздравен говор истакна дека денес истражувањето и иновациите се поважни од кога било, бидејќи тие се тесно испреплетени и поттикнуваат унапредување на различни полиња, придонесувајќи за општествениот напредок.

„Заедничките истражувачки иницијативи, усогласувањето на политиките, вмрежувањето и комуникацијата, пристапот до програмите за финансирање и поддршка, како и размената, може значително да ги подобрат истражувачките способности и да ги поттикнат иновациите“, нагласи ректорката Ангелова.

Таа, на присутните им порача дека заедничката работа е од витално значење за лесно надминување на предизвиците насочени кон зелена и дигитална транзиција, како и за создавање поотпорна средина. „Треба да поттикнеме активна соработка меѓу високообразовните институции, научните центри и приватниот сектор за да промовираме заеднички применети истражувања и иновации“, рече таа.

Ангелова потенцираше дека идните цели на УКИМ се насочени кон градење повеќе стратешки партнерства меѓу локалната и европската истражувачка инфраструктура, кои заеднички можат позитивно да придонесат кон процесот.

Покрај организаторот Science|Business и домаќинот УКИМ, партнери на конференцијата беа EIT Community на Европскиот институт за иновации и технологии, Платформата на земјите од Западен Балкан за истражувања, технологии и иновации (WBC-RTI) преку Policy Answers и ELI ERIC – Европскиот конзорциум за истражувачка инфраструктура за ласерски технологии за пан-европска интеграција на истражувачите и индустријата.

Поддржувачи на конференцијата беа Директоратот за истражувања и иновации на Европската комисија, ERA – Европскиот истражувачки простор, UNICA – Мрежата на универзитети од главни градови во Европа, COST – Асоцијацијата за наука и технологија на Европската комисија, и RCC – Регионалниот совет за соработка на Западен Балкан.

Во воведниот дел на конференцијата, покрај ректорката, говореа и Елке Дал, проектен менаџер при Центарот за социјални иновации, Едит Херцог, претседавач на групата за проширување во рамките на Science|Business мрежата, Димитрис Коуреас, директор на Центарот за биодиверзитет, Андрас Инотаи од Генералниот директорат за истражување и иновации при Европската комисија, и проф. д-р Сорин Кострие, претседател на Мрежата на универзитети на главните градови на Европа.

На панел дискусиите учествуваа претставници на УКИМ, вклучувајќи проф. д-р Валентина Гечевска, проректор за наука, и проф. д-р Анастас Мишев од Факултетот за информатички науки и компјутерско инженерство, како и претставници од Европскиот институт за технологии, Советот за регионална соработка, COST асоцијацијата и повеќе регионални и европски претставници од бизнис секторот, истражувањата и иновациите.

„Постојат одлични примери за регионална соработка, од кои повеќето се видливо поддржани од Европската комисија, но сигурен сум дека има многу истражувачки заедници кои сè уште треба да се разбудат и да се приклучат кон оваа европска истражувачка и инфраструктурна област, за да ги покажат своите капацитети и способности. Ние имаме талент тука, го знаеме тоа, но треба да најдеме начин како да ги задржиме.“, истакна проф. д-р Анастас Мишев.

Синиша Марчиќ од Регионален совет за соработка додаде дека клучниот предизвик за регионот е дека додека би се инвестирале стотици милиони евра во врвна истражувачка инфраструктура, дали ќе има доволно научници за да ја опслужуваат таа инфраструктура.

„Сè уште сме исправени пред предизвиците кои ги имаме за одредена запоставеност на регионот. Затоа, напорите за инклузија претставуваат процес во две насоки. Затоа треба да дадеме одговор на многу прашања, за истражувачите, како на пример: Зошто не се искористуваат? Каде се капацитетите? Кој инвестира за тие не само да бидат подобни,туку и да имаат доволно знаење и ресурси? Што ќе се случи со нивното работно место кога ќе аплицираат за некоја програма? Што се случува кога заминуваат и дали некогаш ќе се вратат?“, додаде Ненад Челаревиќ, Helvetas.

Каталин Алфолди од COST Association потенцираше дека треба да се фокусираат што програмата може да придонесе во регионот и како тоа ќе овозможува раст и вклученост на сите страни. Воедно Сорин Кострие од UNICA повика на зголемена акција од институции и бизнис сектор.

„Не можеме да зборуваме за Европа или да очекуваме да испорачаме резултати ако пристапот на ЕУ не е сеопфатен и не ги вклучува сите европски земји, особено оние од Југоисточна Европа. Стремежот на нашата земја е да ги исполниме истите стандарди и ресурси кои важат од запад кон исток и од север кон југ низ Европа. Само тогаш можеме вистински да испорачаме.“, поентираше проф. Гечевска.

Таа наведе дека мисијата на УКИМ е да инвестира и да ги едуцира нашите студенти да станат извонредни професионалци, без разлика дали се дома или во странство, но со надеж дека ќе се вратат.

„Нашиот стремеж е тие да останат овде и да учествуваат во развојот на земјата, како дел од Европа. Затоа е толку важно проширувањето на ЕУ и започнувањето на процесот на претпристапни преговори, паралелно со решавање на политичките прашања. Така, нашите студенти не би размислувале веднаш за да одат надвор, туку ќе сфатат дека можат да дадат вредни придонеси за својата земја, а со тоа и за Европа. Некои ќе станат истражувачи, други ќе бидат иноватори или инженери кои работат во компании со deep-tech технологии, а сите ќе придонесат во општествениот развој и образованието на идните генерации,“ истакна проф. Гечевска во своите заклучни зборови на настанот.

Учесниците на конференцијата разменија мислења и идеи, што води до меѓусебно зајакнување на соработката во оваа област.

Универзитет „Св. Кирил и Методиј“ - Скопје

Млад месар од Италија почина по дводневна треска, го тестираат семејството и пријателите

Јан Балугани (33) од Кореџо, Италија, починал по дводневна треска, а резултатите од обдукцијата покажале дека младиот човек бил заразен од менингитис Б.

Веднаш по неговата смрт, започнала истрага и тестирање на неговите најблиски членови на семејството, како и пријатели за да се утврди дали некој од нив бил заразен со оваа болест, пишува Месаџеро.

Инаку, Јан работел како месар и бил познат во својот град. Веста за неговата смрт ги изненади сите негови сограѓани, од кои многумина лично го познавале.

Младиот човек два дена пред смртта имал висока температура придружена со треска, но сето тоа изгледало како „обичен“ грип. За жал, приказната имала трагичен епилог само два дена подоцна.

„Со тешко срце и длабока тага мораме да ја споделиме веста со вас. Нѐ погоди како гром од ведро небо. Нашиот пријател, составен дел од нашето семејство, Јан Булагани, неочекувано почина на возраст од од 33. За нас тој беше повеќе од колега - работеше со нас девет години, беше столб на нашата продавница. Неговото заминување остави празнина“, напишаа од месарницата во која работел Јан.

Менингитис Б се пренесува преку капки испуштени од заразени луѓе кои зборуваат, кашлаат или киваат на растојание помало од еден метар. Периодот на инкубација е од 2 до 10 дена, обично 3 до 4 дена.

Иако е невообичаен, менингитисот Б (MenB) е сериозна инфекција. Таа е предизвикана од бактеријата Neisseria meningitidis од групата Б, која може да предизвика инфекција на мембраната што го опкружува мозокот и 'рбетниот мозок. Може да предизвика и септикемија, сериозна инфекција на крвотокот.

Дојдовме до крајот на она што мислевме дека е безбедна зона за човештвото, тврдат научниците

2024 година е најтоплата во историјата на мерењата.

Но, што е уште полошо, тоа беше и првата година во која просечната глобална температура беше повеќе од 1,5 степени Целзиусови над прединдустрискиот просек, што е прагот поставен со Парискиот договор за климатски промени што не смееме да го надминеме.

Сепак, многу луѓе не разбираат што значи тоа и зошто е важен овој праг, ниту колку е важно што ја поминавме таа граница многу побрзо од очекуваното.

Помина само една година, но истражувачите велат дека тоа е јасен показател дека светот навлегува на опасна територија, пишува Nature.

- Ова е и физичка реалност и симболичен шок. „Дојдовме до крајот на она што мислевме дека е безбедна зона за човештвото“, рече Гејл Вајтман, научник за климатски ризик од Универзитетот во Ексетер.

Податоците за преминување на границата ги објавија истовремено неколку меѓународни организации кои ги следат глобалните температури. Иако сите имаат малку различни бројки, податоците покажуваат дека годината зад нас била најмалку 1,55 степени потопла од просекот за периодот од 1850 до 1900 година. Ова се смета за прединдустриска ера не затоа што сè уште немало индустрија, туку бидејќи сè уште не сме почнале да ослободуваме огромни количини на стакленички гасови во атмосферата.

Климатолозите сè уште испитуваат дали овој огромен скок на температурите во 2023 и 2024 година, кога беа поставени и срушени рекорди, е само случајна или значајна промена што укажува на забрзување на глобалното затоплување.

Научниците велат дека овој праг не е магичен, туку само политичка цел од Парискиот договор. Тоа не значи дека светот е безбеден под него, ниту дека сè ќе се распадне над него.

„Тоа е спектар и секое затоплување е важно“, изјави за Nature Кетрин Хејхо, научник од Американската група за заштита на природата.

- Овој температурен скок над поставената граница треба да биде аларм за политичките лидери. Бидејќи ако овој скок не е случаен, туку планетата забрзано се загрева, можеби ќе треба уште побрзо да ги намалиме емисиите на стакленички гасови - вели Карлос Нобре, климатолог од Универзитетот во Сао Паоло.

Без оглед на одговорот, долгорочниот ризик од топење на мразот и промена на екосистемите се зголемува и ќе се зголеми само ако не престанеме да ја загадуваме планетата.

- Последиците веќе ги чувствуваме. И сè само ќе се влошува“, рече Вајтман.

Меланија откри каде ќе живее по инаугурацијата на Трамп- не во Белата куќа (ВИДЕО)

Меланија Трамп, сопругата на американскиот претседател Доналд Трамп, го потврди она што долго време се шпекулира.

Во интервју за Фокс њуз, таа рече дека нема трајно да се пресели во Белата куќа за време на вториот мандат на Трамп.

Кога ја прашале каде ќе го поминува поголемиот дел од своето време, таа одговорила: „Ќе бидам во Белата куќа. Кога ќе треба да бидам во Њујорк, ќе бидам во Њујорк. Кога ќе треба да бидам во Палм Бич, ќе бидам во Палм Бич“.

„Мојот приоритет е да бидам мајка, прва дама, сопруга“, додаде таа. Таа се осврна и на нејзиниот син Барон, кој моментално живее во Њујорк каде што оди во колеџ, и рече дека верува дека Барон ќе ја посети Белата куќа. „Секогаш го почитувам „да“ или „не“ на Барон, што сака да прави, каде би сакал да биде“, истакна таа.

Уште во септември минатата година, Меланија рече дека Барон одлучил да живее во Трамп Тауер, семејната резиденција на Менхетен, додека е на колеџ. И покрај тоа, има подготвена соба за него во Белата куќа во која може да остане кога ќе одлучи да го посети семејството.

За потсетување, една од нејзините први официјални одлуки беше да не одржи традиционална и симболична средба со првата дама во заминување Џил Бајден во Белата куќа. Поранешниот претседател Џо Бајден потоа беше домаќин на новоизбраниот претседател Доналд Трамп во Овалната соба.

Откако ја напушти Белата куќа во 2021 година, таа поминуваше време помеѓу Палм Бич и Њујорк додека нејзиниот сопруг се соочи со низа правни проблеми и се подготвуваше за својата трета претседателска кампања. Иако другите членови на семејството Трамп редовно му се придружуваа на поранешниот претседател на суд и во кампањата, Меланија главно се повлече од јавниот живот.

притисни ентер