„Ќе има многу смртни случаи“, рече Трамп во обраќањето.
Тој ги отфрли критиките дека неговата администрација не сторила доволно за набавка на респиратори кои им биле потребни на многу критично болни пациенти, наведувајќи дека некои државни гувернери бараат повеќе респиратори отколку што им треба.
„Стравот од недостиг доведе до побарувања и недостиг “, рече Трамп, коментирајќи ги барањата до неговата администрација за обезбедување медицинска опрема од стратегиските национални резерви.
САД имаат најголем број на инфицирани во светот. Повеќе од 306,000 луѓе се позитивни во САД, а над 8.300 заболени од коронавирус починале.
Медицински експерти од Белата куќа предвидуваат дека меѓу 100.000 и 240.000 луѓе би умреле во пандемијата, дури и со мерките за останување дома.
„Се приближуваме до времето што ќе биде ужасно“, рече Трамп пред Белата куќа. „Можеби досега не сме виделе вакви бројки. Можеби само за време на Првата светска војна или Втората светска војна“, рече американскиот претседател.
Во најцрниот ден во државата Њујорк за време на пандемијата, 630 луѓе биле заразени со коронавирус во последните 24 часа, изјави во саботата гувернерот Ендрју Куомо.
Болеста однесе 3.565 животи досега во Њујорк , а ситуацијата е особено вознемирувачка во Лонг Ајленд, каде бројот на заразени лица се шири „како пожар“, рече Куомо на прес-конференција.
Според здравствените експерти, Њујорк би можел да го достигне врвот за една недела.
„Сè уште не сме на врвот, но се приближуваме. Според нашите проекции, тоа ќе биде за околу една недела“, рече Куомо.
Во градот Њујорк се повеќе од една четвртина од сите смртни случаи поврзани со коронавирус во САД, според Универзитетот Џонс Хопкинс. Болниците и мртовечниците во градот се борат да ги прифатат сериозно болните или да ги погребаат мртвите.
Поради ризикот од инфекција, многумина кои имаат сериозно болни роднини во Њујорк не можат ни да ги видат своите најблиски во последните моменти.
Вработен во болницата во Њујорк соопшти дека тој и неговиот колега морале да направат неколку телефонски повици за време на секоја смена минатата недела, а тоа биле известувања за смртта. „Многу е тешко да се раскажат вести за смртта на некој близок без да бидат во можност да се видат своите најблиски“, рече тој.
Специјалните резерви на медицинска опрема што и се на располагање на владата на САД скоро се при крај , а тоа се однесува на заштитна облека за лекарите и медицинските сестри.
Гувернерот Куомо објави дека кинеската влада обезбедила донација од 1.000 респиратори кои пристигнале во саботата. „Тоа многу ќе ни помогне“, рече тој.
Испраќањето на респираторите е резултат на разговорот на 27 март меѓу Трамп и кинескиот претседател Си Џинпинг, изјави извор близок до владата.
Скоро сите Американци се дома по наредба на сојузни или локални власти, освен ако не мора да одат по продукти или на лекар.
Областите како Флорида или Тексас, кои полека преземаат строги мерки, исто така воведоа мерки на социјална оддалеченост и престој дома.
„Гледаме што се случува во Њујорк, гледаме дека луѓето умираат“, изјави сенаторот од Флорида, Рик Скот, за „Фокс њуз“.
„Луѓето почнаа да сфаќаат дека единствениот начин да се забави болеста и да се избегне смртта е да останат дома и да излезат само како последно средство“, рече гувернерот на Тексас, Грег Абот.
Сепак, имало и собири. Така, пасторот од Луизијана, Тони Спел, вели дека планира три верски служби во неговата голема црква во Батон Руж во недела, и покрај наредбите да избегнуваат какви било собири во поголеми групи.
Луизијана стана една од главните фокусни точки за инфекција со коронавирус во САД, бележејќи вчера 409 смртни случаи.