Како дел од таа посета, тој се состана со демократскиот гувернер Гавин Њусом и други официјални лица во Калифорнија. Американскиот претседател уште еднаш ја негираше улогата што ја игра глобалното затоплување во катастрофалните пожари како оние што моментално ги опустошуваат Калифорнија, Орегон и Вашингтон (држава).
„Ќе залади, само погледнете“, му одговори Трамп со смеа на директорот на Националната агенција за ресурси во Калифорнија, Вејд Кроуфут.
Имено, Кроуфут го предупреди дека е потребно „да се препознаат климатските промени и што тие им прават на нашите шуми“.
„Ако ја игнорираме науката и некако ги туркаме главите во песок и мислиме дека станува збор само за управување со вегетацијата, нема да можеме да ги заштитиме жителите на Калифорнија“, додаде Кроуфут, осврнувајќи се на инсистирањето на Трамп дека пожарите во Калифорнија се единствено резултат на лошо управување со шумите, а не на климатските промени што ја сушат вегетацијата и ја прават поподложна на ширење на пожари.
На бизарниот и научно потполно неоснован коментар на Трамп дека глобалното затоплување ќе биде заменето со „заладување“, Кроуфут учтиво одговори: „Би сакале науката да се согласи со вас“.
А, она што Трамп одговори на тоа е веројатно најдиректното одрекување на науката што некогаш го изговорил.
„Не мислам дека науката всушност знае“, рече Трамп.
Тешко е да се каже дали Трамп се шегувал или не, но јасно е дека сегашниот претседател на САД многу години го негирал научниот консензус за вештачките климатски промени.
Опозициските демократи претходно го критикуваа Трамп дека во голема мера не коментирал за најголемите пожари во историјата на Калифорнија, освен критикувајќи ја демократската влада во таа држава како одговорна за пожарите.
Да потсетиме, пожарите низ Орегон, Калифорнија и Вашингтон уништија илјадници домови и десетици помали градови од август, со изгорени 1,6 милиони хектари и во кои што загинаа дваесетина луѓе. Трамп по средбата одобри федерална помош за Калифорнија и Орегон.