Структури на УБК го организирале упадот во Собранието, тврди обвинет за „27 април"

Oбвинетиот Михаил Младеновски во своја одбрана пред судот, на денешното рочиште за настанитe во Собранието на 27 април, рече дека тој настан бил креиран од структури во Управата за безбедност и контраразузнавање.

Oбвинетиот Михаил Младеновски во своја одбрана пред судот, на денешното рочиште за настанитe во Собранието на 27 април, рече дека тој настан бил креиран од структури во Управата за безбедност и контраразузнавање со цел некои луѓе да си ги задржат своите функции, без разлика на жртвите.

Младеновски, во својот исказ, кажа дека со планот за влез во Собранието се запознал во кафулето Аристократ, преку обвинетиот Александар Василевски Нинџа, кој пак рече дека комуницирал со директор на УБК Владимир Атанасовски.

– Редовно одев во кафулето Аристократ и таму цело време беа присутни високи функционери на УБК, кои беа заедно со Нинџа како нивни прв оперативец. Упадот во Собранието почна да се спрема од овие луѓе уште во февруари, рече обвинетиот Младеновски.

По насоки на УБК Нинџа требаше да следи одредени лица кои, како што кажуваше, се државни непријатели. Објасни дека Нинџа на свое располагање имал две возила од УБК, моторола за следење на целата комуникација на СВР Скопје и полициски значки.

– Нинџа употребуваше еден збор дека ние сме надворешна 5-ка, односно група што содејствува надворешно со УБК. Тоа го нарекуваа пирамида што не може да биде урната. Никола Бошковски во една прилика ми кажа дека сме како јато и ако еден се одвои ќе биде осамена птица и незаштитена, рече обвинетиот Младеновски.

Посочи дека овие работи се правеле без знаење на јавната безбедност.

– Знам дека Владимир Атанасовски лично преку Нинџа го извршуваше својот план кон патриотските движења, кои беа форсирани да се направат за интерес на директорот на УБК, кој го нарекуваше државен интерес. Некаде после 19.30 на 27 април, кога излегов од Собранието сфатив дека сме искористени и изманипулирани од структутите на УБК за мене непознати причини, рече обвинетиот Младеновски.

Објасни дека немале насоки што да прават во Собранието, каде се движел по инерција со толпата и откако излегол се видел со другите во паркот Жена борец.

– Тогаш дојде голф петка со сива боја и застана кај Зегин, спроти Жена парк. Тоа е службено возило на Никола Бошковски. Ни кажаа дека во возилото има оружје и треба да се подели на луѓе кои знаат да ракуваат со оружје. Причината за тоа е зошто имале информации дека доаѓа група Албанци со оружје.

Ама тоа не се случи. Тогаш Синиша од кај претседателот Иванов ни кажа дека ќе се прогласи воена состојба и со воена полиција ќе се апси новото парламентарно мнозинството за државен упад. Таа неизвесност траеше до 22 часот, кога Иванов излезе и повика на смиреност и закажа лидерска средба, изјави обвинетиот Младеновски

За крај, рече дека, тоа е вистината што тој ја знае за 27 април, дека не знае дали неговиот исказ ќе делува олеснително за него, но знае дека има голем интерес јавноста да ја знае вистината. /МИА

Автомобил паднал на железничка пруга во Градско, повредени пет лица

Во Градско попладнево околу 19 часот, автомобил што се движел во близина на бензиска пумпа паднал од патот на железничката пруга. Повредени се пет лица.

Како што информириа за МИА д-р Василка Пановска Поп-Стефанова, началник на Брза Помош, повредените по укажаната помош се пренесени во Ургентниот центар на велешката болница.

Портпаролката на ЈЗУ Општа болница во Велес, Елеонора Јованова изјави дека кај сите повредени биле констатирани помали телесни повреди, по што се пуштени на домашни лекување.

Триесет и шестгодишник од Велес паднал од цреша

Триесет и шестгодишен велешанец попладнево паднал од цреша и се здобил со фрактури на ребра.

Елеонора Јованова, портпарол на ЈЗУ Општа болница во Велес за МИА информира дека попладне околу 19 часот, бил примен пациент кој паднал од цреша. Тој се здобил со фрактура на повеќе ребра. Бил снимен и му е укажан прва помош.

Повредениот е оставен на опсервација во Хируршкото одделение во велешката општа болница

Ученик испил литар водка и завршил во болница

14-годишно момче од Загреб завршило во болница откако за време на прославата на последниот ден на училиште испило литар водка, објавија хрватските медиуми.

Ученикот бил пренесен во болницата во многу сериозна состојба. Покрај него, уште пет други деца биле примени во болница поради алкохолна интоксикација, објави порталот Индекс.хр.

Според директорот на болницата во Клаишева, момчето веќе е подобро.

"Вкупно беа примени шест деца со интоксикација со етил алкохол. Сите се добро, четири се отпуштени. Последните двајца пациенти се отпуштени попладнево", изјави Горан Роиќ, директор на болницата за порталот ХРТ, додавајќи дека токсиколошките наоди на дрога кај малолетници биле негативни.

притисни ентер