Македонија

Стандарди за поставување урбана опрема на територијата на општина Крива Паланка

Локалната самоуправа на Крива Паланка ќе поставува урбана опрема на територијата на општината. Основните стандарди за нејзино поставување се истата на никој начин да не биде трајно прицврстена за подлогата, за да не ја оштети, а поставувањето треба да биде на едноставен начин.

Исто така на јавните пешачки површини не смеат да се поставуваат бариери кои можат да го попречат движењето на пешаците, како и да се оневозможи движењето на лицата со хендикеп.

На плоштадот, кејот и на атрактивната пешачка зона не е дозволено трговија на стока од улични продавачи и давање на угостителски услуги во приколки.

Во зоните со статус на културно наследство не може да се постави комерцијална урбана опрема освен на одредени локалитети, но по претходно добиено мислење од Управата за заштита на културното наследство.

Поставувањето урбана опрема на јавните пешачки површини е можно во пасивната пешачка зона која што во зависност од типот на урбаната опрема е со минимална широчина од 0.8 метри за кошничка за отпадоци, односно 1,5 метри за автобуски стојалишта, киосци, маси и столови, дрвореди.

Пасивната пешачка површина се предвидува на минимално растојание од 0.90 метри од работ на коловозот. Минималната широчина на јавната пешачка површина на која може да се постави урбана опрема изнесува 3.0 метри, а за поставување на киоск истата треба да изнесува минимум 4.0 метри. Во коридорот на пасивната пешачка зона минималната слободна височина при поставување на чадори за сонце изнесува 2,4 метри.

При поставување на настрешници и тенди над активната пешачка зона минималната слободна височина изнесува 3,2 метри со изглед и боја усогласени со околината. Времетраењето на користење на јавната пешачка површина може да биде дневно со одобрение за време од 24 часа со поставување и отстранување на мебелот, краткотрајно со одобрение за мебелот во период од 30 дена, сезонско со одобрение за урбана опрема за комерцијална употреба за период од 3 до 7 месеци и годишно со одобрение за поставување на урбана опрема за јавна намена за период до 2 години.

Одобрението за поставување на урбана опрема според оваа одлука го издава градоначалникот на општина Крива Паланка. /Извор: МИА/

Регион

За европските избори во Хрватска пријавени 25 листи

Хрватската Државна изборна комисија (ДИК) доби 25 кандидатски листи за европските избори во Хрватска, што е за осум помалку од 2019 година, јави Хина.

На 9 јуни во Хрватска ќе се одржат избори за Европскиот парламент, а на нив треба да се изберат 12 европратеници со мандат од пет години.

Со предавањето на списокот се означува и официјалниот почеток на изборната кампања, што ќе трае до 7 јуни, кога почнува изборниот молк.

Листата на ХДЗ ја предводи премиерот Андреј Пленковиќ, Божо Петров ќе биде на чело на листата на Мост, Иван Пенава на Татковинското движење ( Домовински покрет), додека листата на коалицијата собрана околу СДП ќе ја предводи Билјана Борзан.

Јунските избори за Европскиот парламент ќе бидат четврти по ред од влезот на Хрватска во Европската унија, при што првата постава на хрватски европратеници избрана во 2013 година имаше мандат од само една година, бидејќи веќе следната година се одржаа редовни европски избори.

Европските избори во Хрватска се втор изборен циклус годинава во земјата, по парламентарните избори одржани на 17 април, а на крајот на годината ќе се одржат и претседателските избори. /МИА

Свет

Германија наскоро ќе ја продолжи соработката со УНРВА

УНРВА - главниот обезбедувач на хуманитарни услуги во Газа - се соочи со голема криза .

Германската влада планира да ја продолжи соработката со Агенцијата на ОН за помош и работа за палестинските бегалци на Блискиот Исток (УНРВА) во Појасот Газа во блиска иднина, соопштија денеска германското Министерство за надворешни работи и Сојузното Министерство за економска соработка и развој.

УНРВА - главниот обезбедувач на хуманитарни услуги во Газа - се соочи со голема криза откако Израел обвини десетина нејзини вработени дека се вклучени во нападите на 7 октомври во кои загинаа околу 1.200 луѓе.

Неколку вработени беа отпуштени поради обвинувањата. Во деновите и неделите што следеа, 16 земји донатори - вклучувајќи ги и двата најголеми донатори, Соединетите Американски Држави и Германија - го суспендираа или паузираа финансирањето, оставајќи го со финансиска празнина од околу 450 милиони американски долари.

Откако се појавија наводите, генералниот секретар на ОН, Антонио Гутереш вети сеопфатен преглед.

Експертите задолжени за истрага на неутралноста на ОН во светлината на наводите дека вработени на ОН биле вмешани во нападите врз Израел на 7 октомври денеска препорачаа заострување на заштитните мерки во „осум критични области“.

Во исто време, во нивниот извештај се вели и дека Израел досега не доставил докази дека одредени вработени биле членови на терористички организации.

Независната група, предводена од поранешната француска министерка за надворешни работи Катрин Колона, беше формирана на почетокот на февруари. /MИА

Шоу биз

Фестивалот „Коачела“ казнет со 28.000 долари поради Лана Дел Реј

Популарниот музички фестивал, на којшто настапија светски ѕвезди како Шакира, Доџа Кет и „Ноу даут“, „Коачела“ (Coachella) заврши, но една од изведувачките ги прекрши правилата.

Се работи за американската поп-пејачка Лана Дел Реј, поради која организаторите на фестивалот ќе треба да платат казна од 28.000 долари... Имено, пејачката настапила 13 минути подолго од предвиденото и со тоа го прекршила договорот што организаторите го имаат со Градот Индио, каде што се одржува фестивалот, пишува „Ти-ем-зи“ (TMZ).

На фестивалот, имено, му се наплаќа дневна казна од 20.000 долари за првите пет минути од пречекорувањето на времето и дополнителни 1.000 долари за секоја минута потоа. /МИА