Македонија

Средба Шолц-Ковачевски во Њујорк: Германија ја очекува Mакедонија во ЕУ

Германија ја очекува Македонија во Европската Унија, а европскиот пат е единствената алтернатива за земјава – ова е пораката која на македонскиот премиер Димитар Ковачевски му ја пренел германскиот канцелар Олаф Шолц. 

Канцеларот како што соопштија од владината прес-служба нагласил дека промената на македонскиот устав треба да се донесе во следниот период и оценил дека тоа е единствена шанса да се осигура квалитетот на животот на македонските граѓани. Во спротивно, според него, земјава би можела да се соочи со изолација на долг рок.

-Државничката одлука која треба да се донесе во периодот што претстои, е единствена шанса да се осигура квалитет на живот на македонските граѓани според европските стандарди и постигнување членство во ЕУ до 2030 година. Во спротивно, македонските граѓани и државата е извесно дека ќе соочат со изолација на долг рок, што не од интерес ниту на Македонија, ниту на регионот и Европа. - Олаф Шолц – Канцелар на Германија.

Стои меѓудругото во владиното соопштение за средбата Шолц – Ковачевски која се одржа во рамки на настанот за одбележување на 50 –годишнината од германското членство во ООН. Од таму додаваат дека Ковачевски му се заблагодарил на Шолц за поддршката која земјава изминатите години ја добива од Германија на својот евроинтегративен пат. Средбата Шолц-Ковачевски инаку, доаѓа на маргините на 78 генерално собрание на Обединетите Нации.

Претходно германскиот канцелар се сретна и со шефот на државата Стево Пендаровски, а на средбата како што соопштија од Вила Водно, повторно тема на разговор бил евроинтегративниот пат на земјава и уставните измени. Покрај Пендаровски и Ковачевски, во Њујорк се и вицепремиерите Фатмир Битиќи и Бојан Маричиќ, како и министерот за надворешни работи Бујар Османи, а со нив и 20 –члена придружба, односно вработени од нивните кабинети, информација која отвори дилеми во јавноста и медиумите, дали дел од функционерите имале реална потреба да партиципираат со толкава бројка на придружен персонал.

Македонија

Претрес во скопско Количани, пронајдени пушки, приведено едно лице

Полициски службеници од Единицата за недозволена трговија при СВР Скопје денеска  го лишиле од слобода М.И.(35) од с.Долно Количани.

Како што известуваат од МВР, при претрес во неговиот дом, извршен со судска наредба, биле пронајдени и одземени две пушки.

Лицето било задржано во полициска станица и по целосно документирање на случајот ќе биде поднесена соодветна пријава.

Македонија

Владата утре ќе носи одлука за намалување на цените на пијалоците

Владата утре ќе носи одлука за намалување на цените на пијалоците, во тек анализата на хигиенските производи.

Владата утре треба да донесе одлука за намалување на цените на пијалоците, а во тек е анализата за хигиенските производи која најверојатно ќе биде завршена до крајот на неделава.

- Тоа што знаеме точно е дека утре ќе има одлука за намалување на цените на безалкохолните и алкохолните пијалоци. За хигиенските производи најверојатно во текот на оваа недела ќе бидат завршени сите консултации и ќе видиме дали има простор да се донесат одредени мерки, изјави денеска министерот за економија Крешник Бектеши по посетата на компанијата „Алма-М“ во Визбегово.

Следниот месец, според најавите на премиерот Димитар Ковачевски, ќе бидат направени и анализите за деветиот пакет антикризни мерки кои ќе бидат насочени кон ранливите категории на граѓани и кон сите оние што во време на криза не остваруваат дополнителни приходи.

Македонија

Отворен повик за грантови за земјоделски задруги до 37 000 евра

Македонската асоцијација на земјоделски задруги го отвори повикот за грантови за постоечки и новоформирани земјоделски задруги, од северозападниот, североисточниот, југозападниот и Преспанскиот регион. 

Задругите регистрирани во овие четири региони можат да аплицираат за грант до максимум 37 000 евра.

Според Асоцијацијата, на располагање се 260 000 евра кои ќе бидат доделени на овој повик.

Повикот за грантови е дел од активностите од ЕУ проектот „Конкурентни земјоделски задруги” што го имплементира Македонската асоцијација на земјоделски задруги заедно со Здружението за бизниси и консултанти Креација.

Вкупниот буџет на проектот е 500 000 евра, од кои 90 отсто се обезбедени од ЕУ преку ИПА програмата, а останатите 10 проценти се директно учество на проектниот конзорциум.

Рокот за аплицирање е до 10.11.2023 година, а деталите од повикот и целосната документација за аплицирање може да се прочитаат на: https://mazz.mk/novosti/otvoren-povik-za-grantovi-za-zemjodelski-zadrugi-do-37-000-evra/.

притисни ентер