Средба на претседателот на Собранието Африм Гаши со Армен Григорјан од УНДП

Претседателот на Собранието Африм Гаши, денеска оствари средба со Армен Григорјан, постојан претставник на Развојната програма на Обединетите нации (УНДП) во земјава.

На средбата се разговараше за понатамошно унапредување на соработката, како и за конкретна поддршка од Собранието за донесување и за спроведување на Националната развојна стратегија 2024 – 2044 (НРС).

Честитајќи му го изборот на новата функција, Григорјан истакна дека Стратегијата опфаќа неколку сегменти со кои УНДП соработува со државните институции, со предлог и Собранието и понатаму да биде активно вклучено: дезинформации, младински политики (корелација со Националната младинска стратегија, транспарентност на ревизорските извештаи, образовна стратегија - со фокус кон донесување на подобрени закони за основно и средно образование, образование за возрасни, стручно образование и за ученици со посебни потреби). Посебен фокус во наредниот период ќе биде поставен и на климатските прашања и еколошката правда, односно легислативно институционализирање на правото на чиста човекова околина како основно човеково право.

Претседателот Гаши ги информира присутните дека очекува на првите седници на овој парламентарен состав, Собранието да ја донесе Националната развојна стратегија, комплетирањето на Управувачкиот совет и планирање на натамошните активности во Собранието. Претседателот се заложи и на општинско ниво да бидат разработени повеќе проекти особено за помалку развиените општини, кои ќе донесат бенефит за граѓаните, при што ја подвлече поддршката од Собранието при носење закони во функција на нивна реализација.

Гаши и Григорјан заклучија дека и во наредниот период соработката меѓу Собранието и УНДП ќе остане отворена и ќе продолжи со зголемена динамика, како и со другите институции во државата, сѐ со цел да се гарантира одржливоста на НРС во опфатениот период од 20 години, се наведува во соопштението од Собранието.

Песков: Путин не ја исклучува можноста за преговори со Украина

Портпаролот на Кремљ, Дмитриј Песков денеска изјави дека рускиот претседател Владимир Путин не ја исклучува можноста за преговори со Украина, имајќи предвид дека во Украина постојат легитимни органи на власт.

-Путин не отфрла ништо. Тој не ја отфрла можноста за преговори. Тој вели дека таму има легитимни тела, во согласност со Уставот на земјата, рече Песков, пренесуваат руските медиуми.

Тој додаде дека украинскиот претседател Володимир Зеленски не е личност со која може да се склучи писмен договор бидејќи, како што наведе, „де јуре тоа би било нелегитимно“.

Зборувајќи за условите за почеток на мировните преговори кои Путин ги претстави во петокот - повлекување на украинските војници од новите региони на Русија и трајно откажување од членството во НАТО, Песков рече дека тоа не е ултиматум, туку мировен предлог.

-Тоа не беше ултиматум, тоа беше мировен предлог, кој беше претставен земајќи ја предвид реалноста на теренот, рече Песков.

Тој додаде дека договорите на хартија се резултат на многу сложени експертски преговори, рамнотежа на интереси и земајќи ја предвид реалноста на теренот, додавајќи дека така ќе биде и овојпат.

Англичаните ќе добијат бонус од 9.6 милиони фунти за европска титула

Англиските репрезентативци ќе добијат бонус од 9,6 милиони фунти доколку ја освојат титулата на Европското фудбалско првенство кое се одржува во Германија.

Информацијата денеска ја објави лондонски „Сан“.

Според истиот извор, селекторот на Англија, Герет Саутгејт, наводно ќе добие бонус од четири милиони фунти доколку неговите избраници ја освојат титулата на ЕВРО2024.

Англија вечерва го почнува настапот на ЕВРО2024 против Србија.

Избраниците на Саутгејт на 20 јуни ќе играат со Данска, а на 25 јуни со Словенија.

Сиљановска Давкова на Самитот за мир: Компромисите можат да го компромитираат европскиот мир

Компромисите со меѓународното право и принципи можат да го компромитираат европскиот и светскиот мир

Претседателката Гордана Сиљановска Давкова денеска се обрати на пленарната сесија на Самитот за мир во Украина, што викендов се одржува во Бургеншток на езерото Луцерн во Швајцарија.

Во обраќањето претседателката оцени дека тековната војна во Украина нè засега сите нас, земјата е изложена на огромно човечко страдање и уништување, безбедносната архитектура на Европа е под закана, а на глобално ниво животите на милиони луѓе се засегнати од тешките економски последици.

„На најсилен можен начин ја осудуваме неиспровоцираната и неоправдана агресивна војна на Русија и ја поддржуваме Украина на најдобар начин, дури и повеќе од она што го дозволуваат нашите ограничени капацитети, ресурси“, рече претседателката Сиљановска Давкова.

Нашата држава, посочи претседателката, се приклучи кон Кримската платформа и целосно се усогласи со Заедничката надворешна и безбедносна политика на ЕУ, а Украина беше главен приоритет за време на македонското претседавање со ОБСЕ во 2023 година.

На хуманитарен план, рече претседателката, се приклучивме на меѓународната коалиција за враќање на украинските деца и обезбедивме цивилна поддршка и итна помош за Украина и за украинските бегалци. Како поддршка на евроатлантските аспирации на Украина, посочи претседателката, испративме воена опрема преку Пакетот за сеопфатна помош на НАТО.

„Како суверена нација, само Украина може да одлучи за својата иднина. Од Украина зависи кога и како ќе ја ангажира Русија за евентуално усогласено решение. Праведниот мир мора да биде вкоренет во принципите на Повелбата на ОН за суверенитет и територијален интегритет. Обидот на Русија да стекне територија со сила е флагрантно кршење на овие основни начела. Кога опасните преседани остануваат неоспорени, тие можат да се претворат во толерирани практики. Компромисите со меѓународното право и принципи можат да го компромитираат европскиот, па дури и светскиот мир и безбедноста. Единствениот начин да се избегне ова е да се почитува Повелбата на ОН и принципите на меѓународното право, без исклучок“, рече претседателката Сиљановска Давкова, истакнувајќи дека воздржувањето од употреба на сила, почитувањето на суверенитетот, територијалниот интегритет и неповредливоста на границите, и заштитата на човековите права и основните слободи, се цврсти принципи за кои не може да се преговара.

Во обраќањето претседателката Сиљановска Давкова рече дека додека се развива рамката за иден мировен договор, ќе продолжиме да ја поддржуваме слободна, независна, демократска и суверена Украина.

притисни ентер