На средбата , според општина Карпош,беше посочено дека сега не е време за политички надмудрувања, туку за соработка, подадена рака и одговорност.
Како што соопшти Општината, Богоев го поздравил конструктивниот пристап на опозицијата, на советничката група на ВМРО-ДПМНЕ во Карпош, со тоа што доставиле повеќе предлог мерки и активности до локалната самоуправа.
Заеднички било заклучено дека Општина Карпош сериозно е посветена на постојани активности за заштита на граѓаните од коронавирусот.
– Темелно и секојдневно се мијат и дезинфицираат улиците и урбаната опрема, во соработка со Црвениот крст се организираат мобилни тимови за помош на ранливи групи на граѓани, тековно се информираат граѓаните и заедниците на сопственици на станови за новите мерки и препораки, стои во соопштението.
На средбата се зборувало и за ослободување на угостителските објекти од наплата на такса за урбана опрема, проблематика, за која, како што информирал градоначалникот, се разговарало и на координаците во Град Скопје.
Богоев нагласил дека се разговара и за дополнителна механизација (цистерна) за миење и дезинфекција на поголемите улици во Карпош, со што, ќе се зголеми бројот на три активни цистерни кои ќе мијат и дезинфицираат улици. Станало збор и за поставување на дезинфекциони бариери, на влезните и излезни сообраќајници од Општина Карпош, за да се обезбеди дезинфекција за моторните возила кои циркулираат во овој дел од Градот.
Присутните се заложиле за постојана и тековна меѓусебна комуникациија и координација, во врска со актуелната состојба со вирусот Ковид-19. Сите ги ставиле на располагање своите капацитети и ресурси за надминување на оваа криза.
– Изминатиов период на пандемија од коронавирусот, Општина Карпош работи на интензивна заштита на здравјето на граѓаните, спроведувајќи ги мерките и препораките од надлежните институции, но и креирајќи дополнителни активности за поголема превенција на жителите. Сите граѓани, институции, организации и политички партии се обединети, за, колку што е можно, побрзо да се надмине оваа кризна состојба, се наведува во соопштението од Општината.