„Позитивна сум на ковид-19, но добро се чувствувам, со силна одлучност денес да победи народот. Нема да дозволиме уцени!- со ваква порака и со селфи фотографија во скафандер пратеничката на СДСМ Билјана Костадиновска Стојчевска, околу пладне најави дека доаѓа во Собранието за да гласа за петтиот пакет антикризни мерки. Еден час подоцна веќе пред влезот на Собранието можеше да се забележи приватно амбулатно возило, кое, како што тврдат од СДСМ, сама го платила..
Координаторот на владејачката партија, Јован Митрески, на прес-конференција уверуваше дека присуството на двајцата пратеници било неопходно заради опасноста од блокади на опозицијата. За спроведувањето на болните пратеници биле испочитувани сите протоколи за заштита од Комисијата за заразни болести, со претходно одобрение од инфектолог, тврдеше Митрески, и потсети дека ова е втор пат позитивни на Коивд 19 да гласаат.. .
Откако во посебни кабини во собраниската сала беа сместени двајцата позитивни пратеници, власта го имаше потребниот кворум, а собранискиот спикер Џафери ја почна 32 седница, за гласање на 21 точка, меѓу кои и националната стратегија за борба против корупција. Како што и претходно најавија, пратениците од ВМРО-ДПМНЕ, не влегоа да гласаат. Штом почна 36 седница за антикризните мерки се појавија во салата, жестоко реагирајќи за присуството на заразените пратеници. Мицевски и Апасиев ја обвинија власта за кривично дело и затвор за загрозување на здравјето на луѓето, Џафери се правдаше дека постои протокол за вакви случаи.
Сепак, на крајот дебатата беше исрпена, а пратениците брзопотезно со 115 гласа „за“ ги донесоа економските закони во мирна атмосфера.
Но, реакциите за двајцата болни пратеници продолжија и по седницата. Алијанса и Алтернатива потегот го оценија како медиумско шоу и непотребен, бидејќи нивните пратеници веќе најавија дека ќе обезбедат кворум.
Пакетот антикризни мерки, кој денеска беше изгласан, се однесува на парична помош за исплата на плати за февруари и март, за која компаниите ќе може да аплицираат до 30-ти април годинава.