Извештајот на СМО, меѓу другото, вклучува и податоци од Националната администрација за океани и атмосфера на САД (НОАА) и британската метеоролошка служба, кои ја рангирале 2020 година како втора најжешка година во историјата. Според податоците на НАСА, 2020 година е најтопла заедно со 2016 година.
Оваа вест е „уште еден моќен потсетник за немилосрдното темпо на климатските промени што ги уништува животите и условите за живот низ нашата планета“, изјави генералниот секретар на ООН Антонио Гутереш. „Помирувањето со природата е дефинитивно задача за 21 век“, истакна Гутереш.
СМО објави дека разликите во просечната глобална температура помеѓу трите најтопли години (2016, 2019 и 2020 година) се занемарливи.
Просечната глобална температура во 2020 година била 14,9 степени Целзиусови, или 1,2 степени Целзиусови повисока отколку во прединдустрискиот период. Договорот за климата од Париз од 2015 година се обидува да го ограничи глобалното затоплување на 1,5 степени Целзиусови.
Сите податоци собрани од СМО покажуваат дека изминатата деценија била најтопла во историјата.
Емисиите на стакленички гасови во САД, втор по големина загадувач по Кина, минатата година паднале за повеќе од 10 проценти, што е најголем пад од Втората светска војна. Ова било потпомогнато од коронавирусот што и наштети на економијата, објави Родиум групацијата оваа недела.
Падот на емисиите на стакленички гасови не значи дека САД лесно ќе ја постигнат целта за намалување на емисиите од 28 проценти до 2025 година. Претседателот на САД, Доналд Трамп ги повлече САД од Парискиот договор за клима, но новоизбраниот претседател Џо Бајден вети дека ќе ги врати по стапувањето на должност на 20 јануари.