Скопјанец позитивен на коронавирусот наместо во изолација се шетал низ Охрид

Скопјанец позитивен на корона вирусот наместо да седи во самоизолација заминал во Охрид.

 Се шетал низ градот без заштитна маска и ракавици, освен тоа во својот стан во Охрид повикал и вработени во кабелски оператор. Информацијата ја потврдија од полицијата. Ќе добие кривична пријава.

-Тој, на 13.03.2020 година, кога од Австрија пристигнал во Македонија, потпишал изјава за самоизолација, која ја прекршил на 20.03.2020 година. По медицинскиот наод дека е позитивен тој, самоиницијативно, не почитувајќи ги медицинските препораки за строга самоизолација, се упатил во неговиот стан во Охрид. Притоа, непречено се движел без заштитна маска и ракавици, а на 23.03.2020 година, бил во службените простории на еден оператор по што, во станот примил вработени кои му ја извршиле договорената услуга.-СВР Охрид

За прекршувања на задолжителната самоизолација казнените налози од државното обвинителство се движат од 1000 евра нагоре. А последните статистики на МВР говорат дека:

-Во текот на изминатото деноноќие (01/02.04) на територијата на државата на 59 лица им се издадени решенија за изолација, а 224 лица потпишале изјава за самоизолација. Oд страна на полициски службеници во извршените контроли над лица во изолација и самоизолација, констатирано е  дека само во еден случај едно лице што било во самоизолација не е затекнато во својот дом - МВР.

 Обвинителството отвори и предмет за лице за ширење на заразна болест во време на епидемија кој наместо да остане во самоизолација по враќање во земјава се среќавал со своето семејство и блиските како и со вработени во неговата фирма. Министерот за здравство Венко Филипче вчера информираше дека преку МИОА се изработува апликација со која лицата што се во самоизолација ќе се следат електронски.

притисни ентер