Сиљановска: На венецот во Рим сакав да пишува „РС Македонија“, но немаше доволно место

Претседателката Сиљановска Давкова останува на ставот дека не го прекршила Преспанскиот договор за време на заклетвата во Собранието.. 

Недоволниот простор на лентата од венецот поставен пред спомен обележјето на Св. Кирил и Методиј е причината поради која не било испишано името на државата, туку само „Претседател Гордана Силјановска- Давкова“, објасни денеска претседателката. Напомена дека нејзина идеа било на венецот да пишува Р.С. Македонија, но сепак протоколот одлучил да биде потпишана само Давкова.

Според неа неупотребата на целосното име на државата не може да биде враќање чекор назад на патот на Македонија кон ЕУ, ниту пак причина за заладување на односите со јужниот сосед. Уште еднаш повтори дека ќе го почитува Преспанскиот договор, но нема да го употребува новото име на државата, бидејќи како што рече сентиментално е поврзана со името Македонија.

Дека новата власт во Македонија нема да го употребува новото уставно име, потврди и портпаролот на ВМРО ДПМНЕ, Наум Стоилковски.

Од друга страна, грчката дипломатија е активна, согласно текстот објавен во „Реал њуз“ и Атина започнала кампања за информирање на сите европски земји, на ЕУ и НАТО за прекршувањата на Договорот од Преспа.

Грчкото МНР, како што пишува весникот, дало наредба до сите дипломатски претставништва на земјата „да ги информираат нивните колеги за секое ново прекршување на Договорот од Преспа од соседната земја“.

Особини на емоционално интелигентните луѓе

Емоционалната интелигенција често се наведува како една клучна вештина за професионален успех, но се чини, исто толку е важна и во љубовта и односот кон партнерот воопшто.

Кенди Виенс е авторка на книгата „Имунитет против исцрпеност: Како емоционалната интелигенција може да Ви помогне да изградите отпорност и да ја залечите Вашата врска со работата“ (Burnout Immunity: How Emotional Intelligence Can Help You Build Resilience and Heal Your Relationship with Work). Таа посочува четири признаци за тоа дека една личност е емоционално интелигентна. Следи појаснување за секој од нив.

„Здрави“ конфликти и судири

Надминувањето непријатни случки и конфликти со емоционално интелигентна личност, значи дека Вие и партнерот / партнерката не ги избегнувате кавгите и проблемите. Караниците коишто се остават нерешени, на крајот се претвораат во гнев и „експлозија“ од лоши зборови што неретко причинуваат и непоправлива штета.

Партнерот кој се впушта во „здрав судир“ не е несклон кон конфликти и не е пасивно-агресивен. Тој / таа не доминира во разговорот, не го напаѓа другиот и не користи навредлив јазик или однесување. Тие луѓе може да се налутат, па дури и да се развикаат, но брзо се смируваат и ја преземаат одговорноста за улогата што ја имале во кавгата. Способни се и да се извинат кога тоа е потребно.

Управување со емоциите на здрав и продуктивен начин

Способноста да се насочат сопствените емоции не значи - да се потиснуваат или негираат своите чувства. Напротив, ова значи способност да се толерираат негативните емоции и стресните искуства без да се реагира импулсивно. Умешното смирување по вознемирувачко искуство - е клучна компонента на емоционалната интелигенција и во здравите врски.

Дозволи ѝ / му да биде она што навистина е!

Емоционално интелигентните партнери не гледаат „закана“ во меѓусебните разлики и не бараат ексклузивно внимание. Тие не очекуваат од другиот да биде совршен /-а, или да се менува за да му угоди на другиот во врската или да се приспособи на неа / него, на неговите или нејзините афинитети, претпочитања и интереси, па дури и на она што не ѝ / му се допаѓа. Тие ги почитуваат Вашите интереси, граници и желбата да ги правите работите сами, на пр. - да се гледате со своите пријатели, да негувате свое хоби или едноставно да уживате во своето време сами.

Емпатија

Можеби една од клучните одлики на емоционалната интелигенција е емпатијата, којашто е од суштинско значење за градење доверба и однос со партнерот, дури и кога двајцата не се согласуваат. Може да се изрази во различни случаи, а тоа како особина добро се препознава, на пр. ако партнерот поставува прашања и покажува интерес за другиот во врската. /МИА

Лунин се извини по катастрофалниот пораз од Романија

Голманот на украинската репрезентација Андреј Лунин се извини за поразот од Романија (0:3) во првото коло на групниот турнир на Евро 2024 година.

-Сакам да му се извинам на тимот, на сите. Уште не е готово. Немаме избор, треба брзо да се опоравиме, да се префрлиме на следниот натпревар, да направиме се што е можно и невозможно за да стигнеме понатаму, изјави Лунин за украинските медиуми.

Голманот на Реал Мадрид беше виновник за два од примените три гола.

Во следниот натпревар Украина ќе игра против Словачка на 21 јуни. /МИА

In memoriam: Почина новинарот Иван Андреевски – Маче

Синоќа на 77 годишна возраст ненадејно почина новинарот Иван Андреевски – Маче. 

Роден е во 1947 година во Доленци, Демирхисарско.

Андреевски својата кариера ја почнува во Радио Телевизија Скопје, веднаш по завршувањето на факултетот за политички науки во Белград во 1971 година, како новинар во документарната редакција, работејќи на репортажи, документарни филмови и фељтони. Бил директор и одговорен уредник во Радио Телевизија Скопје од 1986 до 1990 година, бил ангажиран и како дописник на Ројтерс, Радио Слободна Европа и Јутел, а своевремено член и претседател на Советот за радиодифузија. Продолжува да ја гради професијата Македонската радио телевизија, основач е на скопската програма и утринската програма на МРТ.

Од 1997 до 2006 година бил претседател на Здружението на новинари на Македонија, а добитник е и на наградата „Мито Хаџивасилев – Јасмин“.

Погребот ќе биде на 21 јуни, во неговото родно село Доленци.

притисни ентер