Сиљановска Давкова: Да се покрене дискусија за отслужување воен рок врз доброволна основа

Дел од младите луѓе имаат желба како некогаш да бидат дел не само од професионална армија, туку доброволно во вооружените сили, можеби би требало за тоа да поразговараме. 

Претседателката Гордан Сиљановска – Давкова, како врховен командант на вооружените сили, денеска од Охрид посочи дека можеби би требало да се размислува во насока да има се овозможи на младите луѓе кои би сакале на доброволна основа да служат воена обврска.

- Дел од младите луѓе имаат желба како некогаш да бидат дел не само од професионална армија, туку доброволно во вооружените сили, можеби би требало за тоа да поразговараме. Независно која би била одлуката по дускусијата, ова што го видовме ни дава чувство за безбедност, рече претседателката која денеска присуствуваше на показната вежба на припадниците на Армијата од Баталјонот на специјални сили кои изведуваат обука во Кампот за обука на вода на Охридското Езеро.

Нејзиниот став е дека треба да се размислува во таа насока, да се иницира дискусија, да се чујат експертите по прашањето.

- Сме имале ние такво искуство, да, мислам дека треба да се размислува. Има луѓе кои би сакале да служат воена обврска, доброволно, зошто тоа да не го овозможиме. Мислам дека тогаш и односот кон армијата ќе биде попозитивен. Треба да се отвори темата, да се разговара, треба да се слушнат аргументите, да се тестира расположението кај луѓето..., рече Давкова пред медиумите, при што додаде дека ќе има разговори и консултации по прашањето со одговорните, со началникот на Генералштабот.

- Јас сум за цврста и силна граѓанска контрола на Армијата, ќе ги прашам сите, така што слободно може да се размислува на таа тема, рече претседателката.

Сиљановска Давкова посочи на времето од поранешната државна заедница кога отслужувањето воен рок значеше интеракција на најразлични профили луѓе, градење односи на солидарност, разбирање...

- Тоа го видовме тука денеска, колку е потребна таа соработка. Се разбира дека можеби тоа навистина е важно во ова време, рече таа, посочувајќи ја потребата посветеноста, дисциплинираноска да бидат императив во секоја област од професионалниот ангажман.

Нетанјаху се обрати во Американскиот конгрес: нашата борба е и ваша борба

Израелскиот премиер Бенјамин Нетанјаху одржа жесток говор во Американскиот конгрес во кој апелираше САД и Израел да застанат рамо до рамо за да се спротивстават на Иран.

Нетанјаху доби овации кога излезе на говорницата за да се обрати на заедничката седница на конгресот, а пратениците постојано стануваа за да му аплаудираат во текот на речиси едночасовниот говор. Тој ги опиша САД и Израел дека се на „раскрсницата на историјата“ и оти во ова време на глобален „пресврт“ си требаат еден на друг повеќе од кога било. - нашите непријатели се ваши непријатели. Нашата борба е и ваша борба. И нашата победа ќе биде ваша победа, рече израелскиот премиер.

Највисоките хрватски функционери си ги зголемија платите за 83%

Хрватската влада денеска ја усвои одлуката за зголемување на платите на највисоките државни функционери.

Со оваа одлука, месечните примања на претседателот Зоран Милановиќ, премиерот Андреј Пленковиќ и на претседателот на парламентот Гордан Јандроковиќ од август ќе пораснат за 2.500 евра..

Основицата на платата на околу 270 функционери ќе се зголеми за 83,45 посто, па место досегашните 516 евра бруто, ќе изнесува 947 евра.

Според новите пресметки, Пленковиќ ќе има плата од 5.535 евра, а Милановиќ од 6.074 евра.

Соработка -Министерството за локална самоуправа- Министерството за дигитална трансформација

Министерството за локална самоуправа во соработка со Министерството за дигитална трансформација и со општините ги интензивира активностите за дигитализација на локалните услуги

Министерот за локална самоуправа Златко Перински денеска имаше состанок со министерот за дигитална трансформација Стефан Андоновски на кој се разговараше за конкретните чекори за дигитализација на општините, со вклученост и на донаторската заедница.

На состанокот беа презентирани можностите за вклучување на сите општини во процесот на дигитализација со цел и помалите општини да можат да го фатат чекорот со поддршка од надлежните министерства. Притоа беше констатирано дека основите се веќе поставени со воспоставената електронска платформа од страна на УНДП и на Министерството за локална самоуправа, а ќе се направат напори за вклучување на услугите на националниот портал за услуги воден од Министерството за дигитална трансформација.

Претставниците од УНДП истакнаа дека изразената подготвеност од страна на надлежните министерства да се интензивираат работите дава можност целиот процес на дигитализација на локално ниво да се заокружи многу побрзо од планираната динамика.

Министерот за локална самоуправа Златко Перински истакна дека Министерството за локална самоуправа ќе го води овој процес и очекува поддршка од сите вклучени страни, а општините нема да бидат оставени сами.

-Ќе работиме на обезбедување на сите технички услови и на зајакнување на административните капацитети на локално ниво, а помалите општини ќе бидат вклучени без исклучок, со воспоставување на меѓуопштинска соработка со поголемите и покапацитетни општини, рече министерот Перински. Перински нагласи дека целиот процес ќе се води системски за што веднаш ќе се ревидираат планираните активности во нацрт Акцискиот план за спроведување на Програмата за одржлив локален развој и децентрализација и по неговото усвојување од страна на Владата целиот процес ќе биде предвидлив со точно утврдена временска рамка за реализација на сите конкретни чекори.

притисни ентер