Починале над 5.300 Швеѓани поврзани со инфекцијата на „ковид-19“, додека тој број изнесува 250 во Норвешка, 600 во Данска и 325 во Финска, додека сите имаат популација за половина помала од Шведска.
Шведска, за разлика од другите скандинавски земји, одлучи да не ги затвора училиштата и економијата во пандемија, со цел да се бори против ширењето на вирусот.
„Не е прашање дали Шведска ќе се промени како резултат на оваа истрага, прашањето е како“, рече шведскиот премиер Стефан Лофвен на прес-конференција.
Комисијата има широк мандат да утврди како вирусот стигнал до Шведска, како се раширил, да ги доведе во прашање одговорите на владата и другите власти.
Одговорот на Шведска на избувнувањето на епидемијата, што во голема мерка се потпираше на доброволни мерки и правила за хигиена според совеста на граѓаните , доведе до тоа нејзините соседи и другите европски држави на крајот да ги затворат своите граници за шведските туристи.
Бројот на починати, иако е релативно голем, сепак е помал отколку во некои други европски земји, како што е Велика Британија, која има една од најлошите стапки на смртност во светот.
Критиката во Шведска главно се фокусира на стапката на смртност забележана кај постарите лица, сместени во старечки домови, кои сочинуваат најголем дел од смртните случаи, како и на доцниот почеток на тестирањата во земјата.
Шефот на Агенцијата за јавно здравје рече дека Шведска ја следи воспоставената практика.
Андерс Тегнел, човекот кој беше главен автор на антивирусната стратегија на Шведска, за Ројтерс изјави дека останува нејасно дали воспоставувањето карантин е ефикасно.
Комисијата ќе достави извештај за грижа за старите лица во ноември, но нејзините конечни заклучоци нема да бида објавени до 2022 година, пред изборите што ќе се одржат во земјата.