Шилегов: Создаваме град без метеж и загадување, град со најголема пешачка зона

Во следните четири години Скопје целосно ќе се промени драги скопјани, вели Шилегов.

Скопје за четири години од денес ќе биде град без метеж со целосно нови сообраќајни решенија. Скопје ќе биде град без загадување, ако за четири години успеавме да го намалиме за 33%, за уште четири можеме прашањето да го елиминираме. За четири години од сега ќе се шетаме по 70 хектари пешачка зона во центарот со многу зеленило и слободен простор“, порача градоначалникот Шилегов од големиот собир на граѓани во спортска салата Борис Трајковски.

Погледнете го драги скопјани слободниот Кеј 13 ноември, тоа е визијата за Скопје која ја имам! Погледнете го паркот Ибни Пајко, тоа е јавниот простор кој сакам да го создавам. Погледнете ги новите МАН автобуси, тоа е стандардот кој сакам да го постигнам. Тоа е Скопје кое ќе продолжиме да го градиме а не згради и споменици на секој чекор! За една година од сега драги пријатели, Скопје ќе има нов ГУП, кој ќе гарантира дека никој повеќе нема да го злоупотребува Скопје за приватни цели, кој ќе гарантира хумана урбанизација надвор од центарот на градот. Скопје десет години е жртва на ГУП-от од 2012 кој го донесе ВМРО-ДПМНЕ. Да не дозволиме истите луѓе да го носат ГУП-от во 2022 бидејќи знаеме што не чека“, кажа градоначалникот Петре Шилегов пред присутните граѓани.

Димковски го презентираше буџетот за агросекторот за 2022 година

Заменик-министерот за земјоделство, шумарство и водостопанство, Димковски го презентираше буџетот за агросекторот за 2022 година.

Денеска, заменик-министерот за земјоделство, шумарство и водостопанство, Трајан Димковски одржа прес-конференција во медиа центарот во Владата на Република Македонија, на која за јавноста го презентираше Буџетот за агросекторот за 2022 година.

Вкупниот буџет за 2022 година за секторот земјоделство, што подразбира неколку институции изнесува околу 9,13 милијарди денари. Во оваа сума спаѓаат основните буџети на Министерството за земјоделство, шумарство и водостопанство, Агенцијата за финансиска поддршка во земјоделството и руралниот развој, Агенцијата за поттикнување на развојот на земјоделството, Агенцијата за храна и ветеринарство, Државниот инспекторат за земјоделство, Државниот инспекторат за шумарство и ловство и Управата за хидрометеоролошки работи.

Основниот буџет на Министерството за земјоделство, шумарство и водостопанство за 2022 година е проектиран на 2,025 милијарди денари. Средствата од буџетот ќе овозможат континуитет во реализирањето на мерките и политиките за развој на земјоделскиот сектор. Најголемата сума во износ од 1,27 милијарди денари од буџетот на Министерството за земјоделство, шумарство и водостопанство, е наменета за Управата за водостопанство. Буџетот на Министерството за земјоделство, шумарство и водостопанство за 2022 споредено со 2021 година е зголемен за околу 255,7 милиони денари и овие средства се главно насочени во водостопанството, односно околу 165,5 милиони денари од зголемената сума за буџетот за 2022 година се наменети за проектите за водостопански капитални инвестиции. Ова е логичен чекор, креиран од потребата за стабилно наводнување и е во насока на намалување на влијанието на климатските промени.

„Веќе неколку години го потенцираме значењето на обезбедување услови за развој на стабилно, конкурентно и модерно земјоделско производство. Тоа не е можно без вода. Затоа, и во 2022 година, продолжуваме со инвестиции во водостопанството кои опфаќаат продолжување на започнатите проекти и изградба на нови системи", потенцираше Димковски.

Тој изјави дека сите започнати проекти од областа на водостопанството, ќе продолжат и во наредната година според динамиката на градба, потенцирајќи дека Браната „Конско" ќе биде завршена.

Во 2022 година ќе започне нов проект - Програма за наводнување на Македонија, во износ од 10 милиони денари.

Останатите средства од буџетот на Министерството за земјоделство, шумарство и водостопанство се наменети за инвестиции во земјоделството и руралниот развој во износ од 279.880 милиони денари, потоа за шумарскиот сектор, во износ од 223,52 милиони денари од кои 197,4 милиони денари за Шумската полиција и 28,1 милиони денари за Програмите за шумарство и ловство. Фитосанитарната политика за заштита на растенија и семе и саден материјал е поддржана со над 67,3 милиони денари, од кои 20 милиони денари се наменети за фитосанитарната програма, што е исклучително важно за поголем извоз на европските пазари и обезбедување на висок квалитет и заштита на здравјето на потрошувачите.

Институциите кои функционираат со сопствен буџет, продолжуваат и во 2022 година со отприлика истиот буџет како и за 2021 година.

Како и секоја година, најголем дел од средствата од буџетот на секторот земјоделство се алоцирани во Агенцијата за финансиска поддршка во земјоделството и руралниот развој.

Во 2022 година, Агенцијата ќе располага со 6.14 милијарди денари од кои околу 5,6 милијарди денари се наменети за финансиска поддршка во земјоделството и руралниот развој или подетално околу 4,5 милијарди денари се наменети за редовна исплата на субвенциите и 1,15 милијарди денари за капиталните инвестиции во руралниот развој.

Овие средства ќе овозможат континуирано реализирање на Програмата за финансиска поддршка во руралниот развој, програма во која се инкорпорирани и популарните мерки како што се „Млад земјоделец" и „Рурална жена". Новина за оваа година е креирана кај мерката популарно наречена „Рурална жена", каде износот на поддршката за жените носители на земјоделски стопанства е дуплиран и од оваа година, поддршката се зголемува од 180.000 денари на 360.000 денари.

Во буџетот за 2022 година планирани се средства во износ од 500.000.000 денари за современа рурална инфраструктура. Овие средства се наменети за проекти за локална патна инфраструктура, водоснабнителни и канализациони системи, опрема за детски, младински или пензионерски културни центри, означување на културни и природни знаменитости во рурални средини, одбележување и унапредување на планинарски и велосипедски патеки и други проекти значајни за локалниот развој.

За модернизација на земјоделските стопанства, планирана е поддршка во вредност од 360 милиони денари, наменети за набавка на висококвалитетен добиток, подигнување на нови повеќегодишни насади, набавка на трактори, набавка на комбајни за ориз и инвестиции во иригациони системи „капка по капка".

Уште една нова мерка за 2022 година е овозможена со усвојувањето на Програмата за финансирање на микро земјоделски компании. Преку оваа програма обезбедени се средства за „start–up" на мали бизниси за земјоделци кои имаат семејни стопанства, без разлика дали се правни или физички лица. За „start–up" идеите предвидени се грантови до 10.000 евра.

Во однос на другите институции кои се дел од секторот земјоделство, АХВ во 2022 година ќе располага со вкупен буџет од 623 милиони денари. Буџетот на Управата за хидрометеоролошки работи во 2022 година е проектиран на над 94 милиони денари.

Другите институции располагаат со значително помали буџети во однос на Платежната агенција и АХВ и нивните буџети се отприлика исто колку и за 2021, без големи отстапувања.

Заменик-министерот Димковски на крајот од своето излагање потенцираше дека буџетот за агросекторот за 2022 година е креиран домаќински, без непотребни трошоци и со силен стимулативен ефект за, развој и заштита на земјоделското производство и приближување до европските аграрни политики.

„Вашингтон пост": Русија подготвува офанзива врз Украина со околу 175.000 војници

Русија подготвува офанзива врз Украина која би вклучувала до 175.000 војници и тоа веќе следната година, јави „Вашингтон пост".

Москва се подготвува да почне офанзива со „100 баталјони составени од тактички групи со проценета сила од 175.000 луѓе", а во офанзивата ќе бидат вклучени и тенкови, артилерија и друга опрема, изјавил за весникот неименуван висок американски функционер.

Пентагон одбил да ги коментира информациите, но изразил голема загриженост поради „агресивните планови на Русија против Украина", пренесува Бета.

– Продолжуваме да поддржуваме намалување на тензиите во регионот и дипломатско решение на конфликтот во источна Украина, изјави портпаролот на Пентагон, Тони Семелрот.

Руските сили сега се концентрираат на четири различни локации со 50 борбени тактички групи, тврди „Вашингтон пост", повикувајќи се на еден американски воен документ.

Претседателите на САД и Русија, Џозеф Бајден и Владимир Путин, наскоро треба да разговараат за тензиите околу Украина на видеосредба, седум години по руската анексија на полуостровот Крим и бунтот на проруските сепаратисти во источниот дел на Украина.

На денешната седница Владата ги „замрзна" цените на основните артикли

Прифатени дел од амандманите, Буџетот 2022 оди на усвојување во Собрание; Донесена Фискалната стратегија за 2022-2024 година.

На денешната 124-та редовна седница, Владата донесе Одлука за определување на највисоки цени на основни прехранбени производи во трговијата на големо и трговијата на мало.

Со оваа одлука се определуваат највисоки цени во трговијата на големо и трговијата на мало на основните прехранбени производи, и тоа за: леб; шеќер; брашно – тип 400; сончогледово масло за јадење; трајно млеко со масленост од 2,8%, 3,2% и 3,5%; свежо месо и сувомеснати производи; и сирење и урда.

Највисоките цени на производите се утврдуваат на нивото на цените кои се применувале на 1 декември 2021 година, во трговијата на големо и трговијата на мало.

Одлуката ќе се применува до 31 јануари 2022 година, со можност за продолжување доколку состојбата на пазарот и понатаму го бара тоа.

На оваа своја седница Владата ги утврди дополнувањата на Предлог-буџет на Република Македонија за 2022 година, кои произлегоа од амандманската расправа во комисиите во Собранието.

Владата утврди дека од вкупниот број на амандмани прифатени се 23 во вкупен износ од околу 382 милиони денари.

Дополнително, на денешната седница на предлог на Министерството за финансии Владата на Република Македонија да ги усвои и следните измени како дополнување на Буџетот за идната година: Зголемување на средствата во Министерството за информатичко општество и администрација во износ од 250 милиони денари за реализација на програмските активности на Македонската радио телевизија; зголемување на средствата во Уставен суд на Република Македонија во износ од 1 милион денари за избор на нови уставни судии; зголемување на средствата во Финансиска полиција во износ од 1 милион денари за преземени обврски за набавка на возило, како и некои други.

Со овие измени, дополнетиот Предлог-буџет за 2022 се враќа на усвојување на пленарна седница на Собранието.

Владата денеска ја донесе и ревидираната Фискална стратегија на Република Македонија за 2022-2024 (со изгледи до 2026), како клучен инструмент за среднорочно буџетско планирање и при креирањето на среднорочната фискална рамка.

Ревидирањето на Фискалната стратегија на Република Македонија за 2022-2026 година е во согласност со праксата на развиените земји и е неопходнo заради промените настанати во тековната 2021 година во однос на макроекономските и фискалните параметри.

Подобрувањето на управувањето со јавни финансии, а со тоа и на Фискалната стратегија како еден од најважните стратешки документи на една влада е поставено меѓу клучните приоритети на Владата, а се базира на определбата за постигнување на фискална консолидација и одржливост на јавните финансии; на забрзан економски раст, на зголемен обем на реализација на јавните инвестиции, на подобреното буџетско планирање согласно меѓународни пракси, на зголемувањето на фискалниот капацитет и дисциплина на општините, како и на подобрената фискална транспарентност.

Среднорочната фискална стратегија e во согласност со среднорочните фискални цели и стратешките приоритети на Владата како и на утврдените стратешки приоритети за 2022 година како што се обезбедување забрзан и одржлив економски раст, повисок животен стандард и квалитет на живот на граѓаните; справување со последиците предизвикани од светската пандемија предизвикана од пандемијата со КОВИД-19; успешно водење на пристапните преговори со Европската Унија; развивање на одбранбена политика во функција на развојот, независноста, територијалниот интегритет, безбедноста на граѓаните и колективната безбедност; владеење на правото, независност на правосудството, доследна и неселективна борба против криминалот и корупцијата со широка и обврзувачка транспарентност; квалитетно образование достапно за сите, согласно побарувачката на пазарот на трудот, развој и унапредување на културата и спортот; модерна и ефикасна јавна администрација, базирана на дигитализација која обезбедува квалитетни и брзи услуги за граѓаните и деловните субјекти; целосно спроведување на Охридскиот рамковен договор, градење на граѓанска држава со етничка и социјална кохезија, врз принципите на меѓусебна толеранција и почитување; и заштита на животната средина, зелен развој, намалување на аерозагадувањето и влијанието на климатските промени.

На денешната седница Владата ја донесе и Ревидираната стратегија за управување со јавниот долг на Република Македонија за 2022-2024, со проекција до 2026 година, со која се утврдува висината на јавниот долг на среден рок, максималниот износ на нето задолжување во првата година во која се однесува стратегијата, максималниот износ на ново издадени државни гаранции во првата година за која се однесува стратегијата и структурата на државниот долг.

Ревидирана стратегија за управување со јавен долг ѝ дава рамка на Владата на Република Северна Македонија за дејствување во насока на прудентно управување со јавниот долг на државата на среден рок и финансирање на потребите на државата со најнизок можен трошок, на среден и долг рок, и со одржливо ниво на ризик.

Владата денеска го утврди и текстот на Предлог-одлуката за прераспределба на средства помеѓу буџетските корисници на централната власт и помеѓу фондовите, со заклучок таа да биде доставена на усвојување на Собранието на Република Македонија.

Целта на предложената Одлука е обезбедување на средства за справување со енергетската криза, финансиска поддршка на јавните претпријатија и акционерските друштва во државна сопственост погодени од кризата (ЈП „Македонски шуми", АД „Водостопанство", АД „Еурокомпозит", АД „Македонски шуми", АД „Македонска пошта"), набавка на COVID вакцини, подмирување на обврски за заштита на населението од HIV, набавка на метадон и бупренорфин за лица со болести на зависности, обврски кон ЈЗУ задолжени за лекување на лица со болести на зависности, побарувања по основ на партиципација за осигурени лица, набавка на лекови за ретки болести, обврски кон ФЗОМ за целосно здравствено осигурување, плаќање на обврски согласно Програмата за финансиска поддршка во земјоделството и руралниот развој и Програмата за рибарство и аквакултура, плаќање на времени ситуации за Брана „Конско", Брана „Речани" и ХС „Равен Речица", ХС „Злетовица", средства за затворање на проектот Јужновардарска долина, експропријација за Брана „Речани" и ХС „Равен Речица", компензирање на трошоците при давање на услугата од јавен интерес во железничкиот превоз на патници, реализација на проектот Ф/П за домување на социјално ранливи групи, обезбедување на средства за подмирување на платено политичко рекламирање за Локалните избори 2021 година, дообезбедување на средства за стипендии и студентски домови, дообезбедување на средства за финансиска поддршка на инвестиции (домашни компании), дообезбедување на средства за уредување на ТИР зоните и исплата на државна помош, дообезбедување на средства за набавка на меркантилна пченица за стоковите резерви, како и дообезбедување на средства за подмирување на тековните приоритетни обврски на одредени буџетски корисници.

притисни ентер