Шефот на американската дипломатија на европска турнеја , ќе бара отфрлање на Хуавеи

Американскиот државен секретар Мајк Помпео утре започнува турнеја на четири пријателски земји во Централна и Источна Европа, во услови на затегнати односи со Германија околу одлуката на претседателот Трамп да ги повлече американските трупи.

Утре Помпео тргнува во петдневно патување кое завршува со посета на блискиот сојузник, Полска. Варшава го поздравува преместувањето на дел од американските трупи од Германија на нејзината територија, под заштита од историски непријателската Русија.

Американскиот министер за надворешни работи ќе ги посети и Чешка, Словенија и Австрија, каде се очекува да побара отфрлање на Хуавеи, кинески телекомуникациски гигант за кој Вашингтон смета дека е закана, еден од лидерите во воведувањето на 5G мрежата ширум светот.

Во Словенија, што ќе биде прва држава на турнејата, Помпео ќе потпише договор за 5Г во четврток, соопштија официјални лица, без да дадат дополнителни детали.

Патувањето на Помпео доаѓа неколку недели откако Пентагон објави дека Соединетите држави ќе вратат околу 6,4 илјади војници од Германија и ќе преместат 5,6 илјади од други членки на НАТО, вклучително и од Италија и Белгија.

Трамп има напната врска со германската канцеларка Ангела Меркел. Таа ја одби поканата за состанок Г7 во Вашингтон во мај, наведувајќи ја пандемијата на коронавирус како причина, додека Републиканците ја обвинуваат најголемата економија во Европа за нелојална трговска политика.

Помпео ги посети Велика Британија и Данска минатиот месец, а беше и во Полска минатата година. Полскиот претседател Анджеј Дуда, неодамна реизбран на функцијата, воспостави блиски односи со Трамп.

Американскиот претседател го покани во Белата куќа неколку дена пред изборите во јуни, на кои конзервативниот полски лидер ја однесе победата со мала разлика, по поларизирачката кампања во која ги нападна ЛГБТ правата.

Полскиот министер за одбрана Мариуш Блашчак најави дека Соединетите држави ќе испратат најмалку илјада дополнителни војници на нејзина територија.

„Мислам дека е фер да се каже дека Полска е една од нашите најблиски и најсилни сојузници. Нашите билатерални односи се на досега невидено ниво“, рече Фил Рикер, висок претставник на Стејт департментот за Европа.

Рикер рече дека Полска е една од ретките сојузнички на НАТО што издвојува два проценти од својот БДП за одбрана, што беше барање од американскиот претседател. Тој додаде дека Помпео исто така ќе го отвори прашањето за енергетска независност од Русија.

Помпео минатиот месец го отвори патот за санкции над гасоводот „Севертен тек2“,што се гради од Русија кон Германија.

Полска остро се спротивставува на проектот, плашејќи се дека ќе го засили влијанието на Русија во Европа, додека учествува и Австрија, едно од дестинациите на Помпео.

Исто така, ќе има силна историска симболика. Шефот на американската дипломатија ќе го посети градот Пилсен во Чешка за да го означи ослободувањето на таа земја во 1945 година, под команда на генералот Џорџ Патон.

Барем една од неговите средби ќе биде напната. Чешкиот претседател Милош Земан е познат по неговите зборови за поддршка за Русија и Кина. Рикер рече дека Помпео ќе одржи само „краток разговор“ со чешкиот претседател.

МТСП: Понеделник неработен за граѓаните од католичка вероисповед

Понеделник, вториот ден на Велигден, според Грегоријанскиот календар, неработен за граѓаните од католичка вероисповед.

Министерството за труд и социјална политика соопштува дека согласно Законот за празниците, 1 април 2024 година (понеделник) вториот ден на Велигден, според Грегоријанскиот календар, е неработен ден за граѓаните од католичка вероисповед во Република Македонија.

Министерството за труд и социјална политика на граѓаните од католичка вероисповед им го честита празникот.

АВМУ: Донесено упатство за радиодифузерите за Претседателските и Парламентарни избори 2024

 Агенцијата за аудио и аудиовизуелни медиумски услуги (АВМУ), со цел појаснување на начинот на примена на правилата од Изборниот законик донесе упатство за радиодифузерите за Претседателските и Парламентарни избори 2024.

Како што соопштија денеска од АВМУ, со упатството се опфатени правилата за лимитите за платеното политичко рекламирање (ППР), означувањето на нарачателот на рекламирањето, распределбатата на времето во вести кај Јавниот сервис, бесплатното политичко претставување на Собранискиот канал, обезбедувањето пристапност на содржините за изборниот процес за лицата со попреченост, правилата за известување во деновите на изборниот молк особено за периодот на преклопување на двата изборни процеси.

- За време на изборната кампања за Претседателските избори, во првиот круг на гласање, радиодифузерите може да емитуваат вкупно девет минути и триесет секунди дополнително време за рекламирање на реален час емитувана програма, исклучиво наменети за ППР. Во упатството е точно утврдена распределбата на овие минути меѓу седумте подносители на листи/кандидатите за претседател. Во вториот круг на гласање вкупното време за ППР ќе зависи од времето за ППР што го користат подносителите на листи/кандидатите за претседател кои ќе ја продолжат изборната кампања во вториот круг, се наведува во соопштението.

За време на изборната кампања за Парламентарните избори, се појаснува во соопштението, радиодифузерите имаат право на дополнителни девет минути и триесет секунди за рекламирање на реален час, исклучиво наменети за ППР. По потврдувањето на поднесените листи на кандидати за пратеници од страна на Државната изборна комисија, Агенцијата соодветно ќе го дополни упатството за радиодифузерите за Претседателските и Парламентарни избори 2024.

- За време на изборниот молк за Претседателските избори, на 23 и на 24 април (до 19 часот) 2024 година, продолжува изборната кампања за Парламентарните избори, но запира медиумското покривање во вестите и во посебните-информативни емисии на учесниците во изборните кампањи за двата изборни процеси, се додава во соопштението од АВМУ.

Јавниот сервис и телевизиите на државно ниво што ќе објавуваат платено политичко рекламирање, треба да емитуваат содржини поврзани со изборниот процес во формат пристапен за лицата со попреченост.

Упатството за радиодифузерите за Претседателските и Парламентарни избори 2024 е достапно на веб страницата www.avmu.mk.

Коалиција Вреди: ДУИ во руско сценарио бара лек за изборниот пораз

Навреме предупредивме дека очајниот ДУИ смислил сценарио за предизвикување политичка криза после првиот круг на претседателските избори со цел да избегне чесно признавање на извесниот пораз.

Нивен сон е Техничката Влада на Талат Џафери да опстои повеќе од предвидените 100 дена.

Бујар Османи избегнува одговор на многу логичното прашање што правел како претседавач со ОБСЕ во текот на 2023 за оваа меѓународна институција да оцени дека постои потенцијал за нарушувањето на безбедноста во изборниот процес и го зголеми бројот на набљудувачи. Исто така молчи дали Османи како домаќин на Лавров го прашал за рецептот за суспендирање на демократската волја на граѓаните.

Но, контурите на ова РУСКО сценарио полека излегуваат на виделина. Владата на Талат Џафери незаконски спречува поставување на началник и дополнителен началник на СВР Тетово за да може да ги злоупотребува партиските војници на ДУИ инсталирани во полицијата во кампањата. Потврда за ова е последниот скандал со училиштето во Житоша кое не само што е претворено во штаб на ДУИ, туку во него полицајци отворено агитираат за Али Ахмети, се фотографираат и објавуваат на социјалните мрежи.

Очекуваме дека раководството на МВР соодветно ќе ги евидентира и санкционира овие девијации од страна на полициски службеници.

Јасно им порачуваме на полициските службеници и останати кадри на ДУИ во државните институции, добро да размислат какви партиски задачи прифаќаат и спроведуваат. Ништо не може да ја смени реалноста. ДУИ после 08 мај преминува во опозиција и за секој нивен кадар кој се огрешил пред законите ќе следи соодветна правосудна постапка. Добро е секој партиски активист на ДУИ да размислува трезвено и да не се впушта во незаконски авантури лажно верувајќи дека ќе продолжат кариерите на Али Ахмети, Бујар Османи и Артан Груби.

Знаеме дека исплашеното раководство на ДУИ и нивните коалициони другарчиња се подготвени на различни предизборни далавери, но треба да земат предвид дека на секој обид за спречување на слободно, фер и демократско гласање на Албанскиот народ, жестоко ќе одговориме. Ништо не може да ги спречи промените. Гласачите уште повеќе се мотивираат да гласаат против ДУИ кога ги гледаат овие нивни очајнички потези. Бранот е тргнат и тој секојдневно ќе расте додека не се претвори во цунами за ДУИ на изборите.

Коалиција Вреди

притисни ентер