Шахпаска: Продолжуваат политиките за обезбедување поддршка на слепите лица

Министерката за труд и социјална политика Јагода Шахпаска денеска се сретна со претставници од Националниот сојуз на слепи лица со кои разговараа за моменталната состојба  во смисла на правата кои ги користат и можностите за нивно унапредување.

-Како ресорно Министерство на кои на врвот на агендата е грижата за најранливите категории на лица, со посебен акцент на лицата со попреченост продолжуваме посветено да работиме на унапредување на правата и услугите и обезбедување на подобри услови за живот на оние на кои тоа им е неопходно. Оттука и нашите заложби за измените во Законот за социјалната заштита во делот на личната асистенција, односно спуштање на возрасната граница од 18 на 6 годишна возраст, за деца со потешка или најтешка телесна попреченост како и потполно слепи лица. Ова законско решение е во собраниска процедура и очекуваме наскоро да го види светлото на денот, истакнала министерката Шахпаска на средбата.

Претставниците на Националниот сојуз на слепи лица, како што соопшти МТСП, го поздравиле ова законско решение оценувајќи го како мошне значајно и за нив како поединци и за нивните семејства. Од нивна страна било истакнато дека помошта и поддршката кон слепите лица треба да продолжи и да се унапреди во смисла на обезбедување на поголем опфат на помагала кои за нив имаат големо значење во однос на подобро секојдневно функционирање.

-Со цел поттикнување, социјално вклучување и еднакви можности, лицата со попреченост односно лицата со тешка или длабока попреченост, лицата со најтешка попреченост, потполно слепо лице и потполно глуво лице, се корисници на надоместокот заради попреченост. Исто така, слепите лица користат и права за помош и нега од друго лице. Секоја година врз основа на доставена Програма од страна на Министерството за труд и социјална политика, изготвена врз основа на поднесени програми и проекти од страна на националните инвалидски организации, нивните здруженија и нивната асоцијација, Националниот сојуз на слепите на Република Македонија (НССРСМ), добива средства од Владата на Република Македонија, информираат од МТСП.

Министерката за труд и социјална политика Шахпаска на средбата изразила уверување дека помошта и поддршката на лицата со попреченост ќе продолжи и понатаму, во насока на обезбедување на подобри услови за живот и нивна вклученост во општествениот живот.

Во Нигерија стигнале речиси 4 милиони вакцини преку програмата на СЗО

Нигерија денеска примила скоро 4 милиони дози вакцини од АстраЗенека против ковид-19, објави Министерството за здравство на таа земја на социјалните мрежи.

Контингентот од 3,92 милиони дози вакцини е прва испорака за најнаселената африканска земја, според Би-Би-Си.

Нигерија сега е трета западноафриканска земја што примила вакцина против коронавирус, по соседните Гана и Брегот на Слоновата Коска, и сите се доставени преку програмата COVAX на СЗО.

COVACS е глобална иницијатива која им помага на сиромашните и помалите земји да добијат пристап до вакцините.

Националната агенција за развој на примарната здравствена заштита (НПХЦДА) вчера објавила дека прво ќе се вакцинираат здравствените работници кои се на првата линија на борбата против пандемијата, пренесува Би-Би-Си.

Менкиноски: Ова што се случува со Бугарија е очекувано и наследено од 1941 година

Последните пораки од официјална Софија се со цел да се откажеме од Македонците во Бугарија кои имаат добиено повеќе пресуди од судот во Стразбур, а поради кои официјална Софија е притисната од меѓународните организации.

Ова го вели во интервју за Канал 5 адвокатот и застапник на здруженијата на Македонците во Бугарија, Тони Менкиновски... Тој смета дека официјална Софија врши притисок врз Македонија и Македонците во Бугарија.

Менкиноски смета дека Бугарија покажува јасна агресија кон Македонија и затоа може да се соочи со исфрлање од Советот на Европа, најстарата европска институција.

Менкиноски прашува дали со договорите со Бугарија и Грција се поништени правата на Македонците во овие држави?

Смета дека македонската Влада проблемот со Бугарија треба да го крене на меѓународно ниво.

Со пресудите од Стразбур, Бугарија е задолжена до јуни да го признае македонското малцинство, потсетува Менкиноски.

За жал, Бугарија преку административни забелешки и притисоци кон Македонците не ги извршува пресудите. Од друга страна Македонија не може да се откаже од права на бугарските државјани, вели Тони Менкиноски во интервју за Канал 5.

Со него разговараше Јован Ѓорговски.

Турција ги отвори рестораните, докторите загрижени

Денеска се отворија рестораните во Турција, а многу ученици се вратија во училиштата откако владата олабавила некои мерки против коронавирусот и покрај зголемувањето на инфекциите, што го загрижи водечкото здружение на лекари во земјата.

Претседателот Реџеп Таип Ердоган го укинал полицискиот час за време на викендите во градовите со низок и среден ризик и го ограничил затворањето во недела во областите со поголем ризик, што тој го нарекол „контролирана нормализација“.

Сопствениците на кафулиња и ресторани, кои главно биле ограничени само за испорака во текот на минатата година, долго време барале да се отворат објектите бидејќи приходите на секторот се намалиле за 65 проценти. Тие исто така бараат ослободување од данокот.

"Служевме 4.000 до 5.000 луѓе неделно. Сега со услугата за достава имаме само 500 муштерии", вели сопственикот на ресторанот Пидебан во Истанбул, Јусуф Каптаноглу, пред да се објави олеснувањето на мерките.

„Јас немам користа од каква било поддршка, вклучувајќи го и заемот“, рече Каптаноглу.

Делумното враќање во училиштата се спроведува низ цела Турција.

Попуштањата се случиле откако во понеделникот биле потврдени нови 9891 случаи, најмногу од 11 јануари, покажуваат официјалните податоци. На крајот на јануари, имало околу 6.000 случаи на ден.

„Бројот на инфекции со новите соеви на коронавирус расте. Не гледаме услови за враќање во старото„ нормално “, порача на Твитер Здружението на турските лекари, повикувајќи на повеќе тестови и вакцинација.

„Политичките и економските интереси не смеат да имаат предност пред човечкиот живот и науката“, додаваат тие.

Турција, која има околу 83 милиони жители, дистрибуира 8,96 милиони вакцини во кампањата за вакцинација што започнала кон средината на јануари. Повеќе од седум милиони луѓе ја примиле првата доза, а 1,89 милиони втората доза.

притисни ентер