Се комплетира владиниот кабинет–до Собранието доставени имињата на заменици министри

Официјализирани имињата на функционерите во вториот и третиот владин ешалон. 

Владата ги усвои и ги достави до Собранието предлозите за новите заменици министри. Седницата за нивен избор според информациите на канал 5 се очекува да се одржи во вторник на 23 јули.

Нов заменик-министер за економија ќе биде поранешниот градоначалник на Прилеп, Марјан Ристески. Поранешниот новинар Зоран Димитровски, кој до минатата година беше заменик-министер за локална самоуправа во владата на СДСМ, сега ќе биде заменик за надворешни работи и трговија. Ане Лашкоска, која зад себе има неколку пратенички мандати, ќе биде заменичка на Изет Меџити во министерството за животна средина.

За заменик на Тошковски во МВР е предложен Астрит Исени. Тој завршил на Факултетот за физичко образование, спорт и здравје, а се стекнал и со титулата доктор на Науки по Кинезиологија. Заменик-министер за правда ќе биде Ален Деребан - магистер од областа на меѓународно право и меѓународни односи, а во два мандата бил советник во Општина Струга.

Во министерството за односи со заедниците како заменик се предлага Неждeт Мустафа. Тој е дипломиран професор по филозофија, екс градоначалник на Шуто Оризари, како и поранешен министер без ресор и пратеник.

Викторија Трајков која од 2010 година е вработена во МНР станува заменичка во министерството за европски прашања, додека Николче Јанкуловски во министерство за финансии. Мирослав Лабудовиќ, досегашен менаџер на инженеринг во странскиот инвеститор Теламон, ќе биде заменик-министер за енергетика.

Ѓоко Велковски кој беше министер за труд и социјала во техничката влада, сега станува заменик во Министерството за социјална политика, демографија и млади. Во Министерството за земјоделство заменик ќе биде Флакрон Беџети, додека Јовица Андовски, кој од 2011 до 2017 година бил заменик министер за здравство, повторно ќе ја преземе истата функција. За заменик на министер за образование и наука се предлага Лулзим Алиу, а заменичка на Борко Ристовски во министерството за спорт ќе биде доскорешната пратеничка на Алтернатива, Сафије Садики Шаини.

Нови заменици има и во локална самоуправа, култура и туризам, дигитална трансформација и јавна администрација.

На вчерашната владина седница беа именувани и повеќемина директори на институции. За ребалансот на Буџетот, кој беше една од точките на владината седница, информираа и од коалицијата „Вреди“. И овојпат освен соопштение насловено „ВЛЕН се грижи за граѓаните и Албанците: Кражбата е синоним за ДУИ“, испратија и фотографија од министрите од Вреди, со албанско, македонско и европско знаменце.

Официјално пуштена во употреба компресорската станица за хируршките клиники

 Компресорската станица за хируршките клиники во комплексот клиники Мајка Тереза, денеска официјално беше пуштена во употреба.

Министерот за здравство, Арбен Таравари изрази задоволство што освен континуирани инвестирања во реновирања и опремувања во здравството, се решавале и долгогодишни наследени проблеми како овој со станицата. Тој истакна дека за среќа, функционира и старата компресорска опрема, со што, како што нагласи, би се избегнале проблеми како минатогодишните. Во изјава за медиумите, тој ги наброја салите што ја користат оваа станица, нагласувајќи дека сите што ќе сакаат, ќе можат да се приклучат.

- Станицата веќе се користи, тестирана е и по сите стандарди, подвлече Таравари.

Во месец мај, минатата година, операционите сали на Клинички центар беа затворени поради непријатна миризба. За итни интервенции, пациентите се упатуваа во Универзитетската клиника за хируршки болести „Свети Наум Охридски“ и во Градската општа болница „8 Септември”. Компресорската станица, изградена пред околу 33 години, требалo да биде променета уште пред три години. Неработењето на оперативниот блок се сметаше за тежок удар врз Клиничкиот центар како столб на здравството.

Истражување: Дури и кратка изложеност на загаденост влијае лошо на вниманието, расудувањето....

Дури и кратка изложеност на загаденост влијае лошо на вниманието, расудувањето и однесувањето.

Загадувањето на воздухот, т.e. дури и кратко изложување на загаденост, го намалува вниманието и лошо влијае на способноста за расудување.

Имено, како што пишува „Гардијан“ (The Guardian), способноста на човекот да се сосредоточи на секојдневните задачи е повлијаено и од најкуса изложеност на загаден воздух, покажа истражувањето спроведено во Велика Британија. Истражувањето, објавено во списанието „Нејчр комјуникејшнс“ (Nature Communications), покажа дека изложеноста на високо ниво на ПМ-честички влијае на селективното внимание и препознавањето на емоциите кај испитаниците - без разлика дали дишат нормално со нос или преку устата. Ова може да влијае на способноста на поединецот да се концентрира на задачите, да избегнува одвлекување на вниманието, па и да се однесува општествено прифатливо.

- Учесниците (во испитувањата, з.п.) изложени на загаден воздух не покажаа добри резултати кога им беше привлечено вниманието. Тоа значи дека можеби ќе бидете расеан во секојдневниот живот. Купувањето во супермаркет е добар пример... Може да значи дека ќе бидете повеќе склони кон импулсни купувања додека шетате низ продавницата, бидејќи не можете да се фокусирате на Вашите цели, објасни д-р Томас Фајерти од Универзитетот во Бирмингем, еден од испитувачите.

Научниците ги анализирале податоците од когнитивни тестови кои 26 учесници ги завршиле пред и откако биле изложени на високи нивоа на ПМ-честички, користејќи чад од свеќа и чист воздух, со изложеност во траење од еден час.

Загаденоста на воздухот е еден од најголемите фактори на ризик за јавното здравје во светот. Светската здравствена организација проценува дека загадувањето на воздухот на отворено предизвикува околу 4,2 милиони предвремени смртни случаи во светот годишно.

Испитувањето, исто така, покажа дека учесниците имале полоши резултати и во препознавањето на емоциите по изложеноста на ПМ-честици.

- Тие полошо препознаваат лице, во смисла - дали е исплашено или среќно, а тоа може да има последици за тоа како се однесуваме со другите луѓе, рече Фајерти.

На тој начин, некои истражувања го поврзуваат загадувањето на воздухот со насилниот криминал, особено во градовите во САД. Од друга страна, пак, работната меморија на испитаниците не била засегната, што посочува дека некои функции на мозокот се поотпорни на краткорочна изложеност на загадување.

Истражувачите велат дека наоди би можеле да се искористат во значителни социјално-економски области, како и околу образованието и продуктивноста на работа.

- Истражувањето беше спроведено кај клинички здраво возрасно население, што значи дека испитаниците беа во добра здравствена состојба и немаа клинички респираторни или невролошки проблеми... Инаку, одредени други групи може да бидат поподложни на овие влијанија, додаде Фајерти.

Студијата е дел од обликувањето на идните политики и мерки за јавно здравје.

- Поголемиот проект ги проучува различните извори на загадување коишто се сѐ почести... Како што се испуштањата од апаратите за готвење, согорувањето дрва, издувните гасови од автомобилите и производите за чистење, за да видиме дали можеме да ја насочиме политиката во одредена насока. Ако знаеме дека производите за чистење ги предизвикуваат повеќето од проблемите што ги опишувам, тогаш можеме да влијаеме на политиките, појасни Фаерти.

Целта, се вели, е да се поправи работите што се погрешни во основа, наместо само да се мери што има во воздухот откако тој е загаден.

„Еурактив“: Софија му порачува на Скопје да се држи до обврската за уставни промени

Новата бугарска Влада соопшти дека одбива да преговара со Македонија за олабавување на условите под кои Скопје може да ги започне преговорите за членство во ЕУ, наведува бриселскиот портал „Еурактив“. 

- Пред три години, Бугарија и Македонија постигнаа договор, со посредство на Франција, за меѓусебни отстапки за деблокирање на процесот за европска интеграција на Западниот Балкан. Владата во Скопје се согласи да го вклучи бугарското малцинство во својот Устав, а властите во Софија ветија дека ќе го укинат ветото за почеток на преговорите со Македонија, се потсетува во текстот објавен денеска.

Авторот на написот натаму наведува дека лани дојде до промена на власта во Скопје и дека новата Влада предводена од Христијан Мицкоски ветила дека „нема да направи отстапки кон Софија“.

„Еурактив“ ја пренесува изјавата на Мицкоски дека се чека на избор на редовна влада во Софија за да почнат преговори за укинување на бугарското вето, но посочува дека првите сигнали од бугарска страна се дека нема да има обнова на дијалогот.

- Бугарија потсетува дека вклучувањето на бугарското малцинство во Уставот на Македонија не е билатерален проблем, туку е услов на Брисел кон Скопје, наведува порталот.

Во текстот се пренесува и изјава на неименуван бугарски министер дека Бугарија останува „исклучително доследна“ на нејзината политика кон Западниот Балкан и на европската интеграција на сите земји од регионот.

- Постои европски консензус, кој во Бугарија е познат како „францускиот предлог“, што строго ќе се следи. Тоа што е постигнато како договор не е билатерален проблем меѓу Софија и Скопје, тоа е меѓу Брисел и нашите соседи од Република Македонија, вели министерот.

Од друга страна според „Еурактив“, ВМРО-ДПМНЕ продолжува да инсистира уставните измени да бидат усвоени сега, но да стапат во сила по влезот на Македонија во ЕУ за да се спречи ризикот Бугарија да стави ново вето по други основи, како и дека премиерот Мицкоски веќе побара средби со претставници на бугарската Влада.

- Во минатото веќе имавме средби со бугарското раководство на највисоко ниво и со нивниот тогашен привремен премиер. Очекувам дека во следниот период ќе има средби со бугарската Влада на различни нивоа и тоа не треба да не чуди. Ниту ние ќе исчезнеме, ниту тие ќе исчезнат, ние сепак ќе бидеме соседи. Треба да изградиме добрососедски односи, но тоа не значи дека се согласуваме за некои теми за кои имаме разлики, пренесува „Еурактив“ изјава на премиерот Мицкоски.

притисни ентер