Македонија

СДСМ: Рамо до рамо со граѓаните на Карпош,Струга, Куманово и Сарај

ЕУ или изолација, време е за финална победа за нашата иднина.

Интензивните теренски активности на СДСМ и средби со граѓаните ширум републиката продолжија и денеска.

Во општина Карпош рамо до рамо со граѓаните беа потпретседателот на СДСМ, Стефан Богоев и Роберт Бекировски.

На маалска средба со карпошани Богоев порача дека е време за финална победа за иднината на земјава, пред се заради доброто на идните генерации.

- Ние, сегашните генерации сме сега должни да одиграме клучна улога и да го направиме финалниот чекор за да ја обезбедиме европската иднина на нашата татковина. Имаме историска шанса која што мора да ја искористиме. Стремежот е европско образование тука, европски можности и вредности на слобода, демократија, правичност и правда тука, во нашата Македонија. Затоа, ова е битка за иднината, за стабилност, за мир, за просперитет и економски напредок. Борба за правда, подобро образование, организирано здравство, повисоки плати и пензии, поубав живот за сите. Ова е борба за младите. Сега е време за финална победа за нашата иднина, рече Богоев.

Изборот на сите политички партии е помеѓу европска иднина и враќање назад, ЕУ или изолација, додаде тој.

- Изборот пред секоја политичка партија е интеграција или изолација. Eвропски блок за европска иднина или анти-европски блок за изолација. Христијан Мицкоски, наместо со денови да молчи треба да излезе пред јавноста и да каже што одлучил: ЕУ или Левица?, рече потпретседателот на СДСМ, Стефан Богоев денеска од средба со граѓаните на Карпош.

Претседателката на Форумот на жени, Јована Тренчевска денеска како дел од караванот „Рамо до рамо до победа“ беше меѓу граѓаните на општина Струга.

- Унапредување на стандардот на граѓаните е врвен приоритет за СДСМ и Владата што ја предводи. Преку успешни, ефикасни политики успеавме да ги зголемиме платите во сите сектори, минималната плата да ја донесеме на над 20.000 денари и таа да важи за сите дејности. Пензиите сега ги зголемуваме согласно новата методологија каде со последното покачување 330.000 пензионери добија покачување од 16% отсто само за една година, а следното зголемување ќе биде во септември. Просечната пензија сега е поголема за 35% споредбено со времето на ВМРО ДПМНЕ. Одлични резултати дава и Оперативниот план за вработување кој оваа година е со рекорден буџет од 32 милиони евра и со опфат на близу 15.000 лица, порача Тренчевска во Струга.

Во Куманово беа Славјанка Петровска и Гоце Георгиевски.

- СДСМ ги реализира стратешките цели на државата. Денес сме членка на НАТО и по 17 години чекање започнавме преговори со ЕУ. За разлика од нашиот државнички однос, ВМРО-ДПМНЕ и Мицкоски постојано дејствуваат спротивно на националните и државните интереси. Се противеа на членство во НАТО се противеа на европскиот предлог, а сега се противат на потребните реформи со кои ќе го забрзаме процесот на интеграција кон ЕУ. Но на крајот, треба да знаат дека нема да успеат. Нивните блокади повторно ќе бидат поразени, истакна Петровска.

Во општина Сарај помеѓу граѓаните беа Магдалена Грашковска и Дарио Николовски, кој истакна дека Владата, институциите предводени од СДСМ успеале светската енергетска криза да ја претворат во можност, а најдобар показател за тоа е рекордното зголемување на домашното производство на електрична енергија што обезбеди стабилност на цената, но и можност за враќање на евтината дневна тарифа на струјата за домаќинствата.

НБА

Њу Орлеанс последен избори плејоф во НБА-лигата

Кошаркарите на Њу Орлеанс пеликанс рано утрово забележаа победа над Сакраменто кингс со 105:98 во плејин натпреварот одигран на домашен терен.

Најефикасен играч на натпреварот беше Де'Арон Фокс ос Сакраменто кој постигна 35 поени.

Во победничкиот состав се истакна Брендон Инграм со 24 поени.

Пеликанс се пласираа во плејофот каде во првото коло ќе играат против Оклахома.

Покрај Њу Орлеанс место во разигрувањето за трофејот преку плејин обезбедија и Лос Анџелес лејкерс, Мајами Хит и Филаделфија.

Плејофот во најсилната кошаркарска лига на светот почнува вечер со натпреварите:

Кливленд кавалирс – Орландо меџик и

Минесота тимбервулвс – Феникс санс. /МИА

Технологија

Стапуваат во сила дополнителните обврски од ДСА за „Порнхаб“, „Стрипчет“ и „ИксВидеос“

Новите обврски за „Порнхаб“ и „Стрипчет“ почнуваат да важат од утре, а за „ИксВидеос“ од втроник.

Интернет сајтовите со содржини за забава на возрасни „Порнхаб“, „Стрипчет“ и „ИксВидеос“ ќе мора да се усогласат со дополнителни обврски што произлегуваат од Законот за дигитални услуги на ЕУ (ДСА), откако изминуваат четири месеци од нивното назначување за „многу големи онлајн платформи“.

Дополнителните обврски, кои мора да ги почитуваат сите „многу големи онлајн платформи“, односно социјални мрежи, пребарувачи, страници за е-трговија и сајтови кои месечно имаат над 45 милиони корисници од ЕУ, се однесуваат на поднесување извештаи за проценка на ризик до Европската комисијата, воспоставување мерки за справување со системските ризици поврзани со услуги што ги нудат, усогласување со правилата за транспарентност и за емитување рекламите, како и за обезбедување пристап на истражувачите до нивните податоци.

Новите обврски за „Порнхаб“ и „Стрипчет“ почнуваат да важат од утре, а за „ИксВидеос“ од втроник.

Целта на Законот за дигитални услуги на ЕУ е да ги натера онлајн платформи да преземат поголема одговорност за обезбедување побезбеден и потранспарентен интернет простор, со тоа што, меѓу останатото, ќе спречат ширење на илегални содржани и ќе ги намалат ризиците по малолетниците.

Општите одредби од Законот за дигитални услуги, покрај за „многу големите онлајн платформи“, од 17 февруари годинава почнаа да важат за сите интернет страници независно од нивната големи. Меѓу овие одредби се и обврските за упатување на известување за соодветност на одредена содржина на возраста на корисниците, забрана за целно таргетирани реклами, пред се насочени кон деца и зголемена транспарентност. /МИА

Култура

Хуманитарен концерт во сеќавање на Климентина Рафајловска

Во Салон 19:19 во Скопје вечерва ќе се одржи концерт во сеќавање на Климентина Рафајловска (1977-1994), која била ученик на пијано и харфа во училиштето „Илија Николовски-Луј”.

На програмата ќе бидат изведени дела од композиторите Сен Санс, Равел, Буланже, Штолцел, Пијацола, Хенсон, Капле, Форе и Шостакович.

На концертот ќе учествуваат музичари од нејзината генерација, Ема Абаџиева – обоа, англиски рог, Весна Ангелова Христов – пијано, Орце Ицковски – фагот, Гордана Јаневска – виолина, Тереза Крцоска – виолина, Јанинка Невчева – пијано, Јулија Нелковска – виолина, Надежда Рубен – сопран, Боро Станковски – виола, Елена Стојческа – флејта, Дарко Трајковски – виолина, Мерсиха Шукри – харфа.

Соученичката на Рафајловска, Мерсиха Шукри, која е единствената харфистка во земјава во изјава за МИА вели дека целта, меѓудругото, е и да се подигне свеста и поддршката за болните од рак.

- Климентина Рафајловска ни беше соученичка во музичкото училиште. За жал, за кратко време нѐ напушти, се разболе од леукемија. Оваа година се навршуваат 30 години од нејзината смрт. Во таа чест, генерацијата се собравме да одржиме концерт во нејзина чест. Воедно, да ја подигнеме свеста и поддршката за сите заболени од лошата болест, вели Шукри, додавајќи дека животот е непредвидлив и затоа е потребно многу повеќе љубов и разбирање.

Човекот е покршлив од стаклото и многу малку е свесен дека секому може да му се случи, вели Мерсиха Шукри.

Во чест на Рафајловска, од 1995 до 2008 година беше доделувана наградата „Климентина Рафајловска” за првенец на генерација, од страна на истоимената Фондација. Меѓу добитниците на оваа награда се и Симон Трпчески, Ирина Наумовска, Никола Атанасов, Александар Краповски и други.

Средствата собрани со продажба на билетите и од донаторската кутија, ќе бидат донирани на Здружението посветено на пациенти болни со рак и нивни негуватели ХЕМА-ОНКО, а наменети за потребите на пациентите на Универзитетска клиника за хематологија.

притисни ентер