Само осум проценти од кандидатите за градоначалници се жени

Локални избори со родова неедаквост меѓу кандидатите – само 8,81 отсто од вкупниот број предложени за градоначалници се жени, а политичките партии имаат близу 200 кандидати мажи. 

СДСМ има пет кандидатки, ВМРО-ДПМНЕ четири, ДУИ само една, а Алијанса за Албанците и БЕСА ниту една жена кандидатка. За разлика од градоначалничите кандидатури, партиите им даваат повеќе простор на жените во Советите, 45 отсто се кандидатки, но потребни се законски измени и за задолжителна квота за кандидатите за градоначалници, оценуваат од здружението Маргини. Според нив мажите доброволно не им отстапуваат простор на жените во политиката, па затоа е потребно балансирано учество и во раководствата на политичките партии.

За унапредувањето на родовата еднаквост во Македонија се зборува долго, но и понатаму секој извештај покажува дека жените немаат еднакви права со мажите, немаат еднакво учество во политичкиот живот и носење на одлуки. На конференција на тема Ковид 19 и економското влијание врз жените, министерката за труд и социјална политика Шахпаска денеска рече изминатата година ипол покажала дека жените доминантно го носат товарот од здравствената криза.

-Фактот дека 74 проценти од здравствените работници се жени говори за нивното присуство во првите борбени редови во справување со пандемијата. Во градинките, во образованието, во трговијата, каде доминантно се вработени жени се покажа нивната храброст и упорност. – Јагода Шахапска – министер за труд и социјална политика.

Од здружението Маргини се согласуваат дека жените се најмногу застапени во образованието, но само во градинките. Во повисоките образовни нивоа, на факултетите каде што професорите земаат повисоки плати, повторно доминираат мажите.

Средба на министерот Бесими со Матуела и Худолин од ЕУ

Дизајнирањето на макроекономските политики и мерките за поддршка на стопанството клучни за остварување забрзан раст.

Дизајнирањето на макроекономските политики, јавните финансии, структурните реформи, како и поддршката што ја дава Владата на стопанството за справување со пандемијата, како и зелената и дигиталната трансформација, беше тема на дискусија помеѓу министерот за финансии Фатмир Бесими и Мишела Матуела, директор на Директоратот за проширување и соседска политика и Штефан Худолин, раководител за соработка во Делегацијата на ЕУ.

„Македонија е посветена на остварување економски раст и опоравување од пандемијата, со фокус на остварување подобар раст што би значело – зелен, дигитален, паметен, забрзан, инклузивен и одржлив раст. Планот за финансирање забрзан раст на којшто работиме има за цел да овозможи забрзан одржлив раст притоа одржувајќи финансиска стабилност преку мобилизирање капитал од приватниот сектор како дополнување на средствата од Буџетот", потенцира министерот.

На состанокот се дискутираше и за Законот за буџети, за реформата за унапредување на фискалната децентрализација којшто се подготвува во рамки на Министерството за финансии, како и за реализацијата на проектите што се финансирани од инструментот ИПА.

Во однос на преземените мерки за справување со пандемијата, Бесими истакна дека се имплементирани 6 пакети во вкупен износ од 1 милијарда и 180 милиони евра.

„Македонија се водеше од пристапот „сѐ што е потребно" – првично, финансирањето беше предизвик, но подоцна ни беа доделени меѓународни средства. Во 2021 година, беа имплементирани 2 дополнителни пакета во вкупен износ од околу 180 милиони евра, во кои беа вклучени не само интервентни мерки, туку и мерки за поддршка на закрепнувањето и растот, со потаргетиран пристап, воедно фокусирајќи се и на компаниите со добри перформанси со цел поддршка на инвестициите. Во моментов, сите показатели (раст на БДП, буџетски приходи, трговска размена, итн.) укажуваат на заздравување на економијата", потенцира Бесими.

Притоа тој нагласи дека и понатаму внимателно се следат случувањата.

„Свесни за предизвиците, продолжуваме со поддршка преку потаргетирани мерки, што се поориентирани кон пазарот, притоа фокусирајќи се на фискалната консолидација на среден рок. Политиките на Македонија ги следат овие насоки", рече Бесими.

Во пожар кај Струмица гореа стари гуми

Пожар денеска околу 14:15 часот избувна во атарот на село Костурино, каде биле запалени стари гуми и стрниште.

Според информациите од ТППЕ Струмица во гаснењето на пожарот учествувале 20 пожарникари и шест против пожарни возила, како и помош од Валандово.

Пожарот е локализиран, а црниот чад кој се издигнуваше над местото на пожарот е предизвикан од запалени стари гуми.

Радост во домот на пејачот Тони Цетински

Балканската музичка ѕвезда Тони Цетински пред бога го изговори судбинското „ДА“ на својата сопруга Дубравка.

Популарниот пејач убавата вест ја објави на социјалните мрежи. Тони на Инстаграм објави фотографија со сопругата со која ја сподели убавата вест. Веднаш по објавата Цетински доби бројни чечстики и коментари од своите фанови.

Тони инаку неодамна стана дедо на внуката Елена.

притисни ентер