На прашање на Гласот на Америка на македонски, дали Вашингтон е загрижен за можно поткупување на спогодбата со Грција, портпарол на Стејт департментот вели:

-Исто како што САД остануваат посветени на Договорот од Преспа, ние очекуваме С.Македонија да го одржи овој дух и јавниот дискурс да остане базиран на факти и вкоренет во посветеноста на иднината на С.Македонија во ЕУ, го пренесува ставот на Стејт департментот, Гласот на Америка.

За дел од поранешните дипломати, пораката на Вашингтон не е изненадувачка во услови кога двата договора со соседите се се подоминанти теми во предизборието. За екс амбасадорот Ѓорѓи Филипов, ставот на Стејт Департментот подеднакво се однесува и на грчката страна, која наскоро исто така ќе влезе во изборен циклус.

-Полека се приближува и денот за парламентарни избори за состав на Европскиот Парламент. Интересени се ставовите на кандидатите по ова прашање. Порака би рекол е испратена до двете земји. САД се чувствуваат обврзани да реагираат на ставовите и во едната и во другата земја и нема потреба сега тој спор да се злоупотребува во предизборен период и од двете страни. , изјави Ѓорѓи Филипов, поранешен амбасадор.

Токму прашањето за непочитувањето на Преспанскиот договор беше причина американскиот претседател Бајден пред три години да потпише извршен указ за замрзнување на имотот и забрана за влез во САД за лица кои работат против Спогодбата. Стејт департментот тогаш појасни дека наредбата освен за лица од Западен Балкан, се однесува и за граѓаните во други држави, прашан дали американската администрација планира да ги прошири санкциите и во Грција, која исто така е потписник на Преспанскиот договор.

И покрај спорадичните реакции во грчката јавност околу почитувањето на Преспанскиот договор во земјава, во грчкиот парламент во Атина веќе пет години во фиока чекаат за ратификација трите мемомрандуми за разбирање со Македонија. Во исто време, промената на патните табли со ПЈРМ и Скопје во Грција засега останува само на хартија.