„Задоволство ми е да ве информирам за почетокот на проектот“, изјавил Игор Сечин, извршен директор на „Роснефт“, за време на состанокот со рускиот претседател, со кого е многу близок, и му се заблагодарил за усвојувањето на законот што ги олеснува инвестициите на Арктикот.
„Според планот, во тек се истражувачките работи и изградба на нафтовод долг 770 километри, како и пристаниште “, додаде Сечин.
Проектот, камен-темелник на руските арктички амбиции, обединува неколку активности на Роснефт на Далечниот исток на Русија, во близина на северната морска рута што компанијата има намера да ја искористи за испораки во Европа и Азија.
Во февруари, Сечин му ветил на претседателот дека проектот ќе и донесе на земјата два процента од БДП годишно.
Потоа рече дека „оваа нова провинција за нафта и гас“ на полуостровот Таимир, најсеверниот дел на Азија, ќе има ресурси од околу пет милијарди тони нафта и дека во неа ќе бидат инвестирани 10.000 милијарди рубљи, или 132 милијарди евра.
Проектот предвидува изградба на петнаесет работни „села“, два аеродрома, едно пристаниште и создавање на 130.000 работни места. Сечин рече дека за тоа му требаат повеќе од 400.000 луѓе.
Роснефт минатата недела објави продажба на 10 проценти од уделот во проектот на сингапурската компанија Трафигура, но не ја прецизира сумата. Компанијата претходно изјави дека и Индија е заинтересирана за проектот.
Сечин тврди дека на почетокот ќе се произведуваат 50 милиони тони нафта годишно, а потоа и двојно повеќе. Тој вети дека до 2024 година ќе бидат пренесени 30 милиони тони преку рута што ги поврзува Атлантскиот и Пацифичкиот океан, познат како Североисточен премин или Северноморска рута.