Роднините на загинатите патници во автобусот на „Дурмо Турс“ кој се преврте на автопатот Скопје – Тетово во февруари 2019 година револтирани што нема никаква одговорност за изгубените 16 човечки животи. Бараат одговори од скопскиот Кривичен суд зошто една година нема судење, проблем кој следи по побараното супервештачење. Се сомневаат дека може некој од обвинетите да се спаси од одговорност, но и на веродостојноста на анализата која ја прави Бирото за судски вештачења. Рондините имаат верба во првото вештачење направено од Машинскиот факултет.
„Дали ќе организираме улици, дали ќе направиме нешто порадикално – судот ќе го блокираме... Сигурно ќе се собереме повеќе бидејќи тука се во прашање 16 жртви и 33 повредени. Сите ние ќе се организираме со наши најблиски семејства, пријатели, другари – ова вака не може да тера до бесконечност. Веќе се прелеа чашата. Нема повеќе кај нас нерви за да ова го тераме до недоглед, затоа што веќе кажав, четврта година во овој предмет нема никаква разрешница“, изјави Благојче Трпевски чии син на 13 февруари 2019 година загина во несреќата кај селото Ласкарци.-Благојче Трпевски, родител на загинат.
„До денес требаше да имаме пресуда, а не да се остава простор за сомнеж. Не сакаме да веруваме дека во позадина на сето ова има притисоци на политички влијанија или не дај боже на корумптивни дејанија“, рече Синиша Ристовски чии брат загина во трагедијата.-Синиша Ристовски, брат на загинат.
Од скопскиот Кривичен суд соопштија дека го разбираат револтот на роднините. Лани од судот се обратиле во Бирото за судски вештачења, по одбиените барања за супервештачање од неколку факултети. Од Кривичен велат дека Бирото побарало дозвола за увид на автобусот на „Дурмо Турс“ за да може да го финализираат супервештачењето.
„Во меѓувреме, судот насрочи неколку термини за продолжување на расправата заради добиено ветување од Бирото дека привршуваат со вештиот наод. За потоа Бирото да побара нова дозвола за увид, која на 10.11.2022 година им е издадена за повторно да вршат увидот на 29 – ти ноември“, соопштија од Основниот кривичен суд – Скопје.
Главниот вештак на супервештачењето Дамјан Мирчевски неодамна во телефонски разговор за Канал 5 тврдеше дека тој чекал еден месец од скопскиот Кривичен суд да му дадат одобрение за да се изврши увид на автобусот на „Дурмо Турс“.
Предметот „Ласкарци“ една година заглави во судските лавиринти. И денешното рочиште беше само формално, се одложи бидејќи во судот и ден – денеска не е пристигнато супервештачењето кое го побара самиот суд поради презентирани три различни анализи за тоа како настанала сообраќајната несреќа на автопатот Скопје – Тетово.
Судењето почна пред повеќе од три години, на само седум месеци по трагедијата во која загинаа 16 патници на „Дурмо Турс“.