Книгите биле украдени од магацин во Западен Лондон пред неколку години.
Романската полиција објави снимка од пронајдените книги, меѓу кои и скапоцените први изданија на автори како познатите научници Галилео Галилеј и Исак Њутн.
Акцијата, во која се пронајдени околу 200 ретки книги, беше кулминација на полициската акција што траела повеќе од три години и вклучувала рации на повеќе од 45 адреси во три земји,а за се обвинети 13 лица.
Книгите биле украдени во јануари 2017 година од поштенски магацин во Фелтам, каде биле привремено сместени пред да бидат префрлени во Лас Вегас на аукција на ретки книги. Двајца мажи, Даниел Давид и Виктор Опариук, упаднале во магацинот со сечење дупки на покривот на магацинот и со јажиња се спуштиле во зградата. Во кражбата што Гардијан ја опишува како акција од акционата серија „Невозможна мисија“, крадците се држеле за полиците за да ги избегнат сензорите што ќе го активираат алармот.
Кражбата траела околу пет часа, а крадците го напуштиле магацинот на ист начин како што влегле. Третиот човек, Нарцис Попеску, ги чекал во автомобил паркиран во близина, и сите тројца побегнале од местото на настанот. Автомобилот подоцна бил пронајден, исчистен со варекина, што укажува на внимателно испланирана акција.
Но, автомобилот не бил исчистен доволно добро, па истражителите пронашле траги на ДНК од еден од крадците на потпирачот за глава. Мажите биле уапсени и осудени, а истражителите на крајот дошле до селото Неамт во североисточна Романија.
Локалната полиција во средата извршила претрес во една селска куќа и ги пронашла книги, меѓу кои и реткото издание на Њутн, Принципиа, една од најпознатите и највлијателни научни дела во историјата.