Републиканскиот претставник Енди Харис, застапник за правата на оружје, имал огнено оружје додека вчеравечер ја минувал безбедносната проверка на пат кон Претставничкиот дом.
Републиканецот од Мериленд тогаш се обидел да му го предаде пиштолот на републиканецот Џон Катко кој одбил, велејќи му дека нема дозвола, се вели во извештајот.
Детекторите за метал се поставени пред Претставничкиот дом за зајакнување на безбедноста по нападот на приврзаниците на поранешниот претседател Доналд Трамп на Капитол на 6 јануари. Во немирите загинаа пет лица, а пратениците мораа да се кријат.
Неколку републикански пратеници, жестоки поборници за правата на оружје, протестирале против детекторите за метал, а некои ги игнорирале.
Канцелариите на Харис и Катко не одговориле на истрагата за случајот. Полицијата во Капитол не била достапна за коментар.
Официјален извор од Капитол, кој сакал да остане анонимен, рече дека на пратениците им било дозволено да имаат оружје во областа Капитол ако не се наполенти пиштолите, но не им е дозволено да влезат во Претставничкиот дом.
Харис го напуштил Капитол и се вратил за помалку од 10 минути. Тој ја поминал безбедносната проверка и му било дозволено да влезе во долниот дом, се вели во извештајот.
Спикерот на Претставничкиот дом Ненси Пелоси повика на промена на правилата со кои се регулираат казните за оние што не ги почитуваат безбедносните протоколи - 5000 американски долари за прв пат и 10 000 долари за втор прекршок да им бидат одземени од платите на пратениците. Долниот дом на парламентот допрва треба да гласа за предложениот амандман.