Референдуми во четири украински региони за припојување кон Русија

Почнуваат референдумите во четирите украински региони делумно контролирани од руските сили.

Од денеска па до 27 септември граѓаните во Луганск, Доњецк, Херсон и Запорожје ќе гласаат за присоединување кон Русија. Во регионите кои претставуваат 15% од украинската територија, среде војна се гласа од врата до врата, на некои места и во автобуси, а ретко каде има и паравани за гласање.

На некои места гласачите и јавно кажуваат како се изјасниле и кои се нивните очекувања.

- Да браќа, силно да! Првиот влезе, ура!

Гласањето се одвива со присуство на руската војска која според официјалното објаснување е присутна за заштита на гласачите. Дел од нив пак кои застануваат пред руските камери во окупираниот Херсон велат дека сега очекуваат подобар живот, а некои дека сакаат да бидат дел од Русија бидејќи Украина не ги поддржувала.

-Се надеваме дека животот ќе биде многу подобар по референдумот. Не чека светла иднина.Ние сме Руси, ние сакаме да бидеме со Русија. Украина не не поддржува нас.

Иако започна денеска и се очекува да трае неколку дена, сепак во дел од поголемите градови кои се под контрола на руските сили како Мелитопол веќе се прославува победата на референдумот.

Иако речиси целата меѓународна заедница ги осуди референдумите организирани по примерот со Крим во 2014 година, и очекуваниот исход, лидерите на сепаратистичките региони во Донбас воопшто и не кријат дека целата борба изминатиот период била со една цел - присоединување кон Русија.

-Најпрво ние станавме независна држава, потоа добивме признавање на Републиката, и сега еве го, третиот чекор – обединување со Русија. Ние се враќаме дома. Тоа е главниот мотив на сите наши дела и борби-- Денис Пушилин – Лидер на самопрогласената „Народна република Доњецк“.

Потегот за одржување на референдумите беше осуден и на советот за безбедност во ООН, како чекор кој води кон незаконска анексија на украинска територија. Во вжештената атмосфера на седницата, државниот секретар на САД Блинкен истакна дека Путин не смее да помине неказнето поради уривањето на меѓународниот поредок. Рускиот министер Лавров пак истакна дека референдумите се одговор на повикот на украинскиот претседател Зеленски за Русите да ја напуштат Украина.

-Самиот меѓународен поредок за кој ние се собравме тука да го почитуваме се уништува пред наши очи. Не смееме, нема да дозволиме Претседателот Путин да се извлече со тоа.-Ентони Блинкен – Државен секретар на САД.

-Интервјуто на господинот Зеленски од 5 Август минатата година, кога тој ги советуваше сите што се чувствуваат Руси поради своите деца и внуци да си заминат за Русија. „Одете во Русија“ кажа тој. И мислам дека одлуките кои сега ги носат жителите на неколку украински региони за спроведување на референдуми се одговор токму на неговите желби.-Сергеј Лавров – Министер за надворешни работи на Русија.

Во меѓувреме во Русија продолжува процесот на мобилизација, а на голем број од руските граѓани одлуката на Владимир Путин им го промени животот за секогаш.

-Тато, тато... врати се..

И денеска на граничните премини кон Грузија, Казахстан и Финска има долги колони на руски граѓани кои сакаат да побегнат од мобилизацијата која ги опфати сите региони на Руската Федерација. Гужва има и на аеродромите, а картите за излез од државата стануваат се поскапи. До сега сите делови на Русија почнаа да ја спроведуваат одлуката за мобилизација, а кон одлуката нема да се придржува единствено Чеченија чиј лидер Рамзан Кадиров истакна дека до сега придонеле повеќе од доволно за војната во Украина.

По грешка ѝ уплатиле милиони, почнала да ги троши, а сега ќе оди 20 години во затвор

Австралјанката Теваманогари Манивел од Мелбурн требало да добие поврат од 100 долари од платформата за размена на криптовалути Crypto.com во мај минатата година, но на нејзината сметка по грешка ѝ биле уплатени 10,4 милиони долари, пишува Дејли меил.

Откако ја видела сумата, таа наводно почнала лежерно да ги троши парите, делејќи им ги на бројни пријатели и членови на семејството, вклучувајќи ја и нејзината сестра Тилагавати Гангадори. Австралијката дури ѝ купила на својата сестра вила вредна 1,35 милиони долари со четири спални соби, четири бањи, домашна теретана и кино.

Сепак, по седум месеци од нејзиниот нов раскошен начин на живот, рутинската ревизија на Crypto.com открила што се случило. Откако компанијата започнала правна постапка во февруари оваа година, Врховниот суд на државата Викторија пресудил во корист на Crypto.com во август.

Според приложените документи, евидентно било дека Crypto.com побарал враќање на парите од Австралијката, но дел од тоа е потрошено за куќата на нејзината сестра, а остатокот бил префрлен на други сметки. Австралијката наводно била вмешана во друго кривично дело поврзано со финансиска измама, а двете обвиненија со кои се соочува носат максимална казна од по 20 години.

Политичар ја силувал колешката во зградата на парламентот на Австралија, на судењето негира

Започна судењето на обвинетиот за силување на колешка во зградата на австралискиот парламент во Канбера.

Политичкиот приправник Брус Лерман е обвинет за сексуален напад над Британи Хигинс во март 2019 година во канцеларијата на владин министер. Лерман се изјаснил за невин и негира дека дури имал секс со колешка, пишува Би-би-си.

Судењето во Крунскиот суд во Канбера се очекува да трае до шест недели. Обвинителите соопштија дека наводниот инцидент се случил по пијана ноќ. Лерман и Хигинс застанале во зградата на парламентот каде што работеле и двајцата, а Хигинс набрзо заспала на каучот во кабинетот на министерот, соопштиле обвинителите.

Таа се разбудила и го нашла коленото на обвинетиот на бедрото и тој имал односи со неа, изјавил обвинителот Шејн Драмголд. Тој додаде дека Хигинс плачела за време на наводниот сексуален напад и шест пати рекла „не“.

Кога ѝ кажала на својата пријателка што се случило следното утро, Хигинс рекла дека била едвај свесна, рече обвинителот.

Отворајќи го случајот на одбраната, адвокатот на Лерман, Стивен Хауброу, рече дека сведочењето на Хигинс содржи нелогичности.

„Марк Твен еднаш рече: Никогаш не дозволувајте вистината да го попречи патот на добрата приказна. А овој случај е пример за таа фраза“, рече адвокатот Хауброу. Тој ги повикал поротниците да ги игнорираат претходните медиумски извештаи за случајот, велејќи дека неговиот клиент негирал дека имал секс со Хигинс.

Главниот судија Луси МекКалум ги предупредила поротниците дека случајот добил прилично голем медиумски публицитет, но дека е многу важно тие да го стават надвор од умот.

Синот на Кајли Џенер има седум месеци и нема име: Чекаме да порасне и сам да се именува

Кајли Џенер ја потсети јавноста дека нејзиниот седуммесечен син се уште нема име.

Момчето се родило во февруари, а иако Кајли и нејзиното момче Тревис Скот имале намера да го именуваат Волф, тие брзо се предомислиле. Поминаа седум месеци од неговото раѓање, а нивното второ дете допрва треба да се именува. За време на втората сезона на реалното шоу Кардашијан, Кајли се отвори за името на нејзиниот син и откри дека неговото легално име е сепак Волф Вебстер, иако сакала да го промени.

Како што откри таа, почувствувала притисок за да го именува бебето и се согласила на Волф, име кое ѝ го предложила нејзината сестра Клои претходниот ден. Името на почетокот ѝ се допаднало, но како што одминувало времето сѐ помалку ѝ се чинело дека го избрала вистинското име. Сега таа објасни зошто се уште не е законски сменето името и зошто не ѝ открива на јавноста какво име би можеле да му дадат на момчето.

"Навистина немавме име. Мислев дека ќе ни падне на памет кога ќе го видиме. Но, не", рече Кајли, додавајќи дека го именувала Волф кога морала да го потпише изводот на родени бидејќи "чувствувала притисок“.

„Го нарековме Волф и веднаш откако го потпишав изводот на родените, си помислив: Што направив?“ рече таа и откри дека Тревис постојано размислувал за името.

"Тревис веќе го смени името неколку пати. Му се допаѓа, а потоа утре сака повторно да го смени. А јас реков: Не можеме да го правиме ова повторно", рече таа и се пошегува дека сега го чекаат "малиот еден да порасне и да си даде име.“

притисни ентер