Ни ветуваа дека по промената на името се ќе биде поинаку, но ние се уште сме во чекалната на Европската Унија, вели мандатарот Христијан Мицкоски, коментирајќи ги изјавите на медијаторот Метју Нимиц, кој вчера индиректно му порача да не живее во илузија со неговите ставови за Преспанскиот договор. Мицкоски денеска возвраќа, вели јас живеам во реалноста во која 600 илјади сограѓани живеат со 150 денари дневно.
Вистината некогаш боли и шече, зашто излажаа народ, кој што направи се за тааа илузија, како ниту еден народ што направи, се откажа од знамето, на крајот од уставното име, за жал се уште сме во чекалната, а не на масата. Треба да поведат сметка за своето поведение. , вели Мицкоски.
Договорот од Преспа е како бебе на кое сите му се смешкаме, но не направивме доволно за да го пораснеме, е оценката на Никос Коѕијас, еден од потписниците на спогодбата пред шест години. Иако во изминатите јавни настапи изнесуваше и навредливи коментари нарекувајќи не „Славомакедонци“, поранешниот грчки министер за надворешни на меѓународната конференција синоќа во Атина, јавно застана зад земјава. Тој ја повика владата на Мицотакис да ја исправи неправдата од предолгото чекање на Македонија, на чиј пат сега е испречена Бугарија.
-Решението е многу едноставно. Грчката влада треба да ѝ каже на бугарската влада: „ние никогаш нема да гласаме за вашето пристапување во Шенген зоната, ако не отстапите од ветото кон С.Македонија. Ова е добар предлог, Никола? , изјави Никос Коѕијас, поранешен министер за надворешни работи на Грција
На вчерашните маратонски панели и дебати, во организација на институтот Алексис Ципрас и фондацијата Заев повеќе учесници упатија и директни и индиректни пораки до Мицкоски и Мицотакис да останат доследни на Договорот, кој како што рече во видео обраќањето првиот човек на Обединетите Нации, Антонио Гутереш, треба да остане столб за градење доверба и разбирање.
-Преспанскиот договор е сведоштво за моќта на дипломатијата, дијалогот и компромисите. Договорот не само што го реши спорот за името, туку и ги отвори можностите за нови прилики за раст, контролирана размена и регионални партнерства. , изјави Антонио Гутереш, генерален секретар на ОН.
Неговиот личен пратеник, медијаторот Метју Нимиц, кој вчера наполни 85 години и ја прими наградата за мир Преспа, по 25 годишно посредништво меѓу Скопје и Атина вели дека постигнувањето на компромисот бил тежок, но дека уште потежок е предизвикот тој компромис да биде прифатен од идните генерации политичари во двете земји.
-Живееме во опасен период, живееме во реалниот свет, и во реалниот свет имаме договори, па луѓето кои се на власт треба да ги почитуваат тие договори. Не можеме да живееме во светот на фантазијата, не можеме да живееме во виртуелен свет. , изјави Метју Нимиц, поранешен медијатор во преговорите за името
Последната анкета на грчката фондација „Елиамеп“ покажа дека за дури 38 проценти од Грците Договорот од Преспа е штетен. 28 проценти се изјасниле дека тој е донекаде корисен, а само девет отсто дека е многу корисен.